.
السلام عليكم
اعتذر لطول غيابي في الاواني الاخيره لانشغالي وظروفي الخاصه
واقدم لكم هذه المتواضعه وهي موجهه للشاعر الكبير والاديب ./ حمود جارالله المزيني
وتشرفت في مجاراته الجزله وحروفه العذبه ........ ادام الله عليه الصحه والعافيه
واقول
.
الله على اللي يعجبك في وقوفه
......................... وليا شلع صاروخ محدٍ يباريه
مكينته قيره وباقي وصوفه
....................... متبرمجه بجنون وجنون راعيه
جمس حمر تطربك نغمة بلوفه
......................... وراعيه قرم ٍ للمهمات يزويه
اول وثاني ثالثه ما يطوفه
.................... منهو نوى طرده وخابت هقاويه
واليا تمشى بالوعر كالهنوفه
...................... فيها دلع طاغي وهالزين كاسيه
يا راكبه وصل كتابي اكفوفه
.................... كف الكريم اللي على الدين هاديه
حمود راع النادرات امعروفه
...................... فنجال فكره يروي اللي يقهويه
يا مسندي حال الهواوي كسوفه
.................... من الجفا والهم والشوق مشقيه
بعد الهنا يا حمود كثرت صدوفه
..................... والدمع سايل واضحات مجاريه
وده بشوف الخل ( والخل جوفه
................ يشكي مرض) للوصل ماعاد يمديه
يا حمود روحه في هواه امخطوفه
.................... والقلب وافي ما يبي غير غاليه
في كل ساعه والطواري تلوفه
................ ويعيش ذكرى سورها من قوافيه
كان الصبر مييت وعينه تشوفه
............. جرح الهوى يا حمود منهو يداويه
وقال الشاعر الكبير / حمود جارالله المزيني
حيّ الكتاب الليّ قرينا حروفه
................. من صاحبٍ قلبي يعزه ويغليه
قريت قافٍ فيه بانت ظروفه
.............. شكوى هوى طول الليالي معنـّيه
فكرت لين احترت لحـْقَن كلوفه
.............. وشلون يشكي لي ولا اقدر أخلّيه
راع الهوى ياخوك ينقل حتوفه
..................على كتوفه قاضبٍ سكة التيه
أحدٍ حبيبه ما بقلبه مروفه
.................. يشعل فتيل الشوق ولا يطفيه
واحدٍ هواه اقصى حدوده بروفه
.......... مثل المسلسل بين ( يابا ، ويابيه )
والاَ انت حبّك ساطياتٍ سيوفه
................عزاه لك بك واضحاتٍ مصاطيه
تبكي على خلٍ شكى الضرَ جوفه
................. عسى الولي مما يعاني يشافيه
هذا الذي عليه غبن الحسوفه
............... لو ينفدي من شان عينيك نفديه
و دنياك لو تقبل سريعٍ نكوفه
................. مثل الحيا يصبح هشيمٍ تواليه
وان كان نفسك بالمواصل شغوفه
............... من لامها عسى الليالي توازيه
واصبر عسى الايام تثمر قطوفه
................... الله كريم ولا يخيّب مراجيه
وسلامتكم
اخوكم الشاعر / عبدالله سعيد الشمري ( صدى ضامي )
[COLOR="White"
.
[/COLOR]
العرض العادي
