بعد حمله الشايب داخل شبة الجزيره وخارجها لعلاجة من كســر بساقة
قراء اعلان عن وصول برفيسور عالمي مشهور ذهب اليه وعلي متنه
الشايب ليعرض عليه حالته وعند خروجة من عند البرفيسور قال :
عسـا فالأمـر ياسـداح خيـره
يقوله من غـدت عينـه سهيـره
تمنّيـت وتـلاشـت أمنيـاتـي
وتـال الليـل بيّحْـت السريـره
وانا وش حيلتي والحـظ شايـب
ثمـان سْنيـن مافـارق سريـره
يـونُّ وْحالتـه صعـبٍ دواهـا
طريح فراش وعظامـه كسيـره
أزوره كــل يــومٍ واتـحــــــــرّا
متى بِيطيـب ويفـك الجبيـره
ولكن عقـب ماطـال انتظـاري
ونار الهم في صـدري سعيـره
حملته ثـم شلتـه فـوق متنـي
ودوّجْت ابْه في شبـه الجزيـره
نقلته مـن عيـاده فـي عيـاده
وسافرتبْـه مـن ديـره لديـره
أدوِّرْ مـن يجبـر عظـم ساقـه
عسـاه يقـوم ويقـود المسيـره
وقريت اعلان عن دكتور زائـر
عليه العلم مـن أسمـا شهيـره
بروفيسـور متعـلـم وراقــي
وقلـت اروح يمّـه واستشيـره
ودفعت الكشف في كشك المحاسب
مع البخشيـش للسستـر سميـره
وقلت الوضع صعبٍ واسمحولـي
أبا الدكتـور والحالـه خطيـره
أخاف الشايب اللي جبتـه الْكُـم
يموت وْعندكـم يلقـا مصيـره
وقالوالـي تفضّـل مـن هنـيّـا
ودخلت بجوف غرفـه مستديـره
بها الدكتور جالس فوق كرسـي
علـى أيّـة جهـه يبغـا يديـره
وقلـت الْحـق عليّـه لاعدمتـك
يقولون انْت ابوالطـبّ وْسفيـره
وقمت امْدح واكيل الْـه المدايـح
كأنّـه ماخلـق دكتـور غيـره
وبيّن لي من الضحكـه طرفهـا
وقام ايْسـلَّ سيفـه مـن جفيـره
وقـال العظـم يبغالـه اشاعـه
وقيمتهـا بخمسيـن الـف ليـره
وقلت الوضـع يادكتـور عـادي
قليل المال يغنـي عـن كثيـره
وش اللي يصير لوكثرت ديونـي
ببيع البيت وافْرش لي حصيـره
يهون المال والا العـود غالـي
تـرى ماللعشيـر الا عشـيـره
وجبتلـه الاشاعـه فـي دقايـق
بعـد ماشِيِّعَـتْ بايـدي خبيـره
وقلّبهـا وقـام يـحُـكّ راســه
وانا عيني تناظـر لـه بحيـره
وقـال العظـم هـشْ ولايجبّـر
ولاعنـدي لتجبيـره بصـيـره
وغادرت العيـاده ضايقـت بـي
فجاج الأرض ودموعي غزيـره
وبعد فِشْلَـتْ جميـع مْحاولاتـي
عسـا فالأمـر ياسـداح خيـره