هلا أمير ، يسلم لي هالراس ، والأمور مبدئياً ماشيه تمام التمام ( ضحكت عليهم وقلت لهم إني بالإتصالات خخخخخخ ) . وبالنسبة للمحفظة ماأبي منها إلا الوصيه ، وصيه كتبتها سنة 2001م ، وعلى طول حطيتها في المحفظة فقدتها وأنا ناسي وش كاتب فيها . وبالنسبة للإثباتات ما فرقت معي لقيتهم او لا ، على الأقل أطلع بطاقة الأحوال الجديدة ، والرخصة الممغنطة . البنك طلعت بطاقة أمس العصر بدون أي تعقيد . والله يسهل .
* * * *
أهلين هنوف ، أتعس خبرين سمعتهم في حياتي صحوني من النوم ، واحد في تاريخ 12/02/2005 والثاني في تاريخ 01/06/2006م ، دايم أخبار الصبح تنكد ، على العموم إن شاء الله أخر الأتعاس :)
وبالنسبة للعزيمة ، ذيك الليلة كنت جوعان ، يعني ما راح تفرق معي سواء أكلت خيارة بوسطها ملح ولا لحم حاشي ، بس الحين بحكم إني شبعان فأكيد ما أرضى إلا بمفطح ، وأبن البلد ما يقصر ( بس أنتظر تلميحه منه خخخخ ) .
* * * *
ابن البلد حياك ، وش محوله الله يهداك ، شكلك تعاني من فواتير الكهرب ، المهم ما تقصر وأيامك عسل إن شاء الله .
أمس إستأذنت من الدوام واليوم مستأذن وبكره يمكن ، قلت بخلص اشغالي الخاصة وبطلع أي إثبات قبل لا يطرحني باص الجوازات ، طلعت للشرطة أمس ورزقني الله في واحد الله العالم اول مره يسوق ، يحذف عليه متعمد يوم وقف جمبي قلت شفيك قال ليش تسقط عليه ، ياشيخ ناقصك انت الثاني ، عاد المشكلة كبير عمره بالثلاثين ، قلت يابو الشباب تراني دقيت إشارة بعدين حنا كنّا في طريق ثلاث مسارات والطريق اللي حنا فيه الحين مسارين يعني لازم واحد يضحي للثاني ويسمح له بالمرور ، قال ما شفت إلإشارة ، وبلاش إستهبال ، قلت إربط الحزام الحين بعدين خذ راحتك بالكلام . دعمني وحط رجله :( أحس إنه حفراوي خخخخخ .
المهم وأروح للشرطة ومع أول درجة زلقت ، لقيت قدامي ضابط قال مستعجل على وشو ؟ قلت ماني مستعجل بس الأرض هي اللي دارت وزلقت ، قال طيب وش عندك ؟ قلت محسوبك مشكلته كذا وكذا ، وجهني لواحد وضبط أموري وقال بكره تجيب لنا صورة أي إثبات لك ونعطيك ورقه مراجعة لبقية الدوائر . وأطلع منهم وعلى طول للأحوال لقيت أمة الثقلين ( إذا البطاقات الجديدة يصدرونها بالحفر علموني ) المهم ، وأخذ شروطهم
1 / اربع صور شخصية ، ياعيال اللذينا وش تبون بالأربع ، داخل على غرفة مشعوذ أنا ؟ وحده للبطاقة الثانية للملف ، ابي أعرف الثالثه والرابعه وش يبون فيهن ؟ بس بيني وبينكم قسماً بالله أرتحت يوم عرفت إن الدعوه مافيها ملف علاقي اخضر .
2 / خطاب من جهة العمل .
3/ إحضار ما يثبت وجودك في المدينة ، مثل فاتورة كهرب او عقد إيجار بغيت أجيب لهم صورتي وأنا افتح باب العمارة عشان يتأكدون .
4 إحضار ثنين شهود من ذوي الكفاءة ، وهذا أصعب شرط ، النايف لا ترسل لي ثنين من الأعضاء ، أرسل لي أربع من العضوات ، على الأقل العضوات راح يطبخنّ لي ويغسلن ملابسي ، الأعضاء بيقولون ودنا للسوق الفلاني ودنا للمقهى الفلاني . وبالأخير بينقزون للبحرين .
طلعت من الأحوال قافله معي ، قلت بصوت قوي ( شروطكم مرفوضه يا معقديّن ) اشك إن اللي كان يمشي جمبي سمعني ، ورجعت كملت النومه ، بعدها مشيت تقريباً لمدة ساعة عالكورنيش ، مسخروني عيال صغار بالكوره ، فتحوا فيني كباري ، عرفت بعد هالكباري إن ما ضيع فريق المدرسة أيام الثانوي إلا أنا ، من أجمل الأشياء إنك تحس بعد فترة طويلة إنك جبت العيد في يوم من الأيام خخخخخ .
المهم بطس بعد شوي أشوف رخصة السواقه ( أدري بيقولون سدد المخالفات الثلاث اللي عليك بعدين تعال كمل الإجراءات ) بس من باب الإحتياط بشوف وش الشروط ، عندي إحساس أنهم بيكونون أقل تعقيد من بتوع الأحوال .
نشوفكم بكره
فتكم بعافية
جروح الذاكرة