قصيدة الولاء
قصيدة الولاء قصيدة وطنية جميلة ألقاها الشاعر / فايز نايف بن دمخ ,من محافظة حفر الباطن
أمام صاحب السمو الملكي الأمير / مشعل بن عبدالعزيز
في حفل جائزة الملك عبدالعزيز طيب الله ثراه للإبل الممتازة الخميس الماضي بأم رقيبه
[poet font="Simplified Arabic,4,green,bold,normal" bkcolor="transparent" bkimage="backgrounds/16.gif" border="none,4,gray" type=0 line=200% align=center use=ex length=0 char="" num="0,black" filter=""]
تصبّر يا وطنا والزمان يبيّن الأنذال = هل التخريب خدّام الكلاب اللي تقديها
رماد النار طلاب الدعايه عابدين المال = عصاة الدين عدوان البلاد اللي ربوا فيها
حثالة شر شذوا في فعولٍ تذهل العقّال = ولا تهدى الخلايق كود رب الكون يهديها
يبون المجد في قتل الضحايا والضحيه أطفال = نسوا دمعة يتيمٍ جرّحت منهو يعزيها
وجودي وجد أمٍ لا نشدها طفلها باذلال = (متى يرجع أبويه) جرت الونه بخافيها
يلوح بعينها حزن الحياة وموتة الآمال = سبب زمرة فسادٍ جعل رب الكون يمحيها
يحسبون انهم هزوا أمانٍ تحتميه جبال = عمارة طاحت وتبنى عماراتٍ تباريها
ولكن الجزاء مذكور من جنسية الأعمال = ويدينٍ خربت لا تحسبن الله يخليها
يحسبون الحكم يا موطني لعبه بيد جهّال = يحسبون العظايم كل رجالٍ يسويها
ويحسبون الولايه بالبشر تبنى بقيل وقال = يحسبون اللجاجه بالخطأ تفتك راعيها
ولا يدرون عن حكامنا اللي فكرهم شغّال = يقومون الليالي والعرب هجعاً لياليها
أمورٍ ما يثمنها ضعيف النفس والجهال = أمورٍ خير بس وين الذي يفهم مساعيها
أمرنا الله بتطبيق الشريعه والشريعه ظلال = ونفسٍ عاهدتنا واجبٍ بالدين نحميها
وأنا ما نيب مفتي لكن اني حافظ الأقوال = كلام الله وأحاديث الرسول أنظر معانيها
وأنا بقول باسم المخلص اللي ما بولاه جدال = عسى الله يحمي الدوله وحكامٍ نواليها
هل العوجا مدابيس العدو يوم الهروج أفعال = هل المجد العريق اللي نتفاخر في أساميها
هل التوحيد يوم ان المعارك رجلي وخيّال = هل السيف الحدب من اول الدنيا إلتاليها
نجيهم في مصايبنا ونطلع طيبين الفال = قلوبٍ حطها الله رحمةٍ للناس ترجيها
يعينون اليتامى في كبير الجاه والأموال = ويكسون الحريم اللي تعرت في بلاويها
ويعطون الفقير المستحق الي ضعيف الحال = ويا ما فرّجوا ضيقه عن عيونٍ تجزيها
ولو بقول وش سووا ولاة الأمر من أعمال = أببطي والقلم يكتب أفعولٍ ما أقدر أحصيها
يكفّي أمننا اللي ما يقدَّر في ذهب وأموال = ويكفي أبيوتهم مفتوحة للي أمتنصيها
رجالٍ بالمواقف من رجال معقبين رجال = معاوين الرفيق وعوق من ينوي يعاديها
وأنا يا موطني فردٍ من أجيالٍ وراها أجيال = تحفظ الطيب لولاةٍ نقدرها ونغليها
غلانا للفهد أكبر من هروج تبي تنقال = زعيم العُربْ مركاها الياكبرت تواليها
له الطاعه ابو فيصل اليا جار الزمان ومال = نطيعه والقلوب السود نفتقها ونكويها
واليا ما جت بنا الدنيا وثارت غبة الأهوال = لقينا اللي بمعرفته وتفكيره يرسيها
أبو متعب ولي العهد راع القول والأفعال = قوي الباس طب الناس لامن صاح شاكيها
نواليهم من اخلاصٍ يبيّن بأصعب الأحوال = لأن دم الولاء بارواحنا ينبض ويحييها
ورثنا المجد ولا ننظر لجاهل تابعٍ دجّال = وروسٍ ترتفع في وجه حاكمنا نوطيها
[/poet]
ارجوا ان تحوز على رضاكم
ولكم خالص تحياتي
اخوكم المشرف العام