:
اخواني واخواتي مشرفين واعضاء وزوار منتدى حفر الباطن
السلام عليكم ورحمة الله وبركاته
لقد قراءة هذه القصيده واعجبتني واحببت ان انقلها لكم
هذه مساجلة بين الشاعر منصور المعمري وبين الشاعر الكبير سعود معيوف العنزي وهو احد ابرز الشعراء الذين لم يخدموا اعلاميا :
:
نام الجميع وناظري مابعد نام
عاثت به هجوس الظروف اللعينه
جابت تفاصيل اللقا تالي العام
وأفراق من عاشت بروحي سجينه
ونصيت من شعره مثل روس الاعلام
كن المعاني لعبة في يدينه
شاعر ومتمكن وفاهم ورسام
وبنى له بفعل الجمايل مدينه
سعود ابن معيوف من نسل الاكرام
ملجى دخيل ٍ ضاع سبة ظنينه
الليا غدى من قاسي الوقت منظام
يدلّهووونه عن عذاب وغبينه
ياسعود مابين الاماني والالام
ووعود بنت ٍ تستحق الثمينه
صادفتها في شهر شعبان بالشام
غربي ( مظايا ) وبظروف ٍ حزينه
تبسمت لي قلت : ياكل الالهام
وش ياخذ اللي يعشقك من سنينه ؟؟
لاصار وصلك حلم من ضمن الاحلام
وإنتي على جمر الجفا تتركينه
قالت وعدنا ياهوى البال قدااام
لكن تحلا بالصبر والسكينه
ويوم أبعدت ثارت من الخافق ألغااام
أحيت بدون اسباب بااارد حنينه
راحت وانا ارجي وصلها مثل الايتام
( آآآآمال واحدهم يرى والدينه )
واليوم هذا عام من خمسة اعوام
يمر والميعااااد ويني ووينه
بنت حكمت في خافقي حكم الاعدام
حلوة وجذابة كثير وذهينه
باوصافها تعجز دواوين واقلام
هي البحر كان الوصايف سفينه
معلقتني بين صبري والايام
((ومن طال صبره يالله انك تعينه ))**
ويوم ان صبري اضرم بقلبي اضرام
ارسلت من يحضر خبرها بحينه
ورجع يقول يكفي احزان وهيام
غاااليك شفته وبيدينه جنينه
يلاعبه ويقول له أحلى الانغام
ويقبّله على خدوده بلينه
وشفت الرجال اهل معاميل وخيام
بافعالهم حب العرب كاسبينه
الابو حلال النشب سقم الاسقام
تشرق شموس المرجلة من جبينه
ماهو بهلمت كول .. ماهو بصدام
ولاهو أبوش الابن وابو ردينه
الليا عتزا خروا مشايخ وحكام
من هيبته كن القمر في يمينه
راهي ولو الامر اشبه بالاوهام
واقرب عليه الطيب من رمش عينه
واخوانها خالد ونايف وبسام
المجد من جدانهم وااارثينه
واحدهم الليا قام عز العرب قام
ولاهو غريب العز من محتمينه
وهي بينهم تسهر على الفخر وتنام
مااساهرت مثلك جروح دفينه
واقفى رفيقي قلت يارب الانام
ياعارف وش تحتويه الخزينه
فيني جروح حطمت كل الارقام
تقول من بين المحاني مكينه
ياسعود قلبي صاير عشرة اقسام
( كنت احسب إن الوعد بأيد ٍ أمينه )
عجل برايك صاحبك بالحزن هام
والقلب ماعاد يتحمل انينه
وإسلم سلام العز في شرع الاسلام
يالشاعر اللي بالجزل ذاكرينه
وهذا رد الشاعر الكبير سعود بن معيوف العنزي :
جاني كتاباً وأسهر الجفن مانام
دقات قلبي مثل رجف المكينه
اوجس على قلبي تقل كهرب لحام
متوسطاً بين الاذين وبطينه
خلا وريد القلب من دون صمام
تلخبط الكربون مع اكسجينه
هاضت على بالي تفاكير واوهام
وتنقضت كل الجروح الدفينه
بديت افكر باليالي والايا م
واسترسلت لحضة فراقا حزينه
ذكرني اللي في هوى صاحبه هام
المغترب يشكي مفارق خدينه
يقول حزنه صار له خمسه اعوام
اسباب من عاشت بروحه سجينه
انا انكويت.فراق تسعة عشر عام
و في عامي العشرين ذقت السكينه
راع الهوىدايم يقولون جزام
ما يقتنع لوهو يشوف الغبينه
سهم العيون ان صاب يا مسندي سام
كم جادلاً يرمي خصيمه بعينه
خطو الهنوف ان ناضرت نضرة اعدام
لاصار محتشمه وخطوه رزينه
تذبح بعيناً كنها عين غنام
صقراً من اعلى ماكره محضرينه
من يوم شالو برقعه فز قدام
شاف الحباري واهله خابرينه
يوم انتهض لو شافه الخرب ما قام
سوه على ثدي الحبارى السمينه
صفق الاولى وارتفع بالهوى وحام
ثم انكسر يدلي يضربه مكينه
وتكررت يدلي على صيده شمام
ياما انتهى واهل الولع لاحقينه
طرد الهوى يا مغترب سل وهيام
مجنون ليلى بالقصص ذاكرينه
صدفتها في شهر شعبان بالشام
فتره وحال البعد بينك وبينه
وصارت نتايجها هواجيس والام
انته بعيد وهوهله مانعينه
مادامت المرسول جاك بخبر هام
انه على يمناه ينقل جنينه
يقبله ويسمعه اجمل انغام
ما فكر بماضيه زينه وشينه
لو كان حبه حازم قلبك حزام
ما ينرجي بعد الحبال المتينه
قد صفط الكاتب وجفن الاقلام
ويحكم الانسان عقله ودينه
انصحك يا منصور يا نسل الاكرام
دورعنه تلقى بجماله وزينه
يابن القروم اللي علىالواجب افهام
افعالهم كل العرب شاهدينه
احرص على الي تلبس حجاب ولثام
بالسوق تمشي بالعباة الثخينه
تمشي هدو تقصر بخطوات الاقدام
باهي بسمعتها تجي مستهينه
بنت الذي يعجبك فعله لياقام
مجرباً معروف طيلة سنينه
اليا لفو بيته عزيزين وحشام
يضحك حجاجه والعشى مدركينه
يقوم بالواجب ولو خبز وايدام
من واقع الميسور تبذل يمينه
تراه متوفر لدى كل الاقسام
مع البدو واللي بوسط المدينه
واليا نويت اجزم ترى اخوك مقدام
يقدم على مطلبك لو كثر دينه
نصيتني وانا التزم عندك الزام
نفسي من اجلك يالسنافي رهينه
ننخاء هل النخوات شعباًوحكام
ونروح معهم كلنا قاصدينه
عقب السهر يرتاح منصوروينام
والمغترب يرتاح من سهرعينه
** شطر من قصيدة جزلة للشاعر الكبير لافي حمود الغيداني
العرض العادي
