يعيش الحب شي عادي يموت الحب وش يعني
مدام قلوبنا ماتت مشاعرها وهي حيه
أحس بالحب لا جيته على كيفه يطاوعني
مغفل من يعيش بالهزمان أحلام ورديه
وكثر ما كنت تكذب في كلامك كنت تقنعني
دليل أني على كثر الجفا مشفوح حنيه
عشاني قلتلك مابي أدخل في هالجو طلعني
تروح وتأخذ الدنيا معاك وتقطع الجيه
مع إني قلت إذا مطاوعك الوقت الردي طعني
وإذا ما جيتني كلك تعال شويه شويه
لك الله يوم أجي مشتاقلك والشوق يدفعني
كأني رايحن للموت بيديني ورجليه
وأعرف إن مر في بالك تولعني تولعني
مدامه شي في بالك تجيه ميه بالميه
وصلت لمرحله حتى الشعور العذب يخدعني
وأحس إني على النيه وأنا فعلا على النيه
بكمل لك كلامي بس تكفى لا تقاطعني
بقا جمر الكلام و دمعتين بالعين مخفيه
أمانه قبل أروح وينتهي كل شي طالعني
عشان تعرف وش معنى العطا قبل الانانيه
أبي ارحل والطريق اللي يودي ما يرجعني
يبي يغنيني الله عن هوى حبك وطاريه
خذ كل شي بطريقك والعذر ما عاد ينفعني
ترى ما عاد لك قيمه ولا للحب أهميه
وما دامنك تبي الوداع أبيك تسمعني
وداعيه يا آخر وداع يجمعنا وداعيه[/align]