السكن مع اهل الزوج بين مؤيد ومعارض

[زيـد العنزي]

انا اشوف العكس
ثلاثا من اخواني { متزوجين } وساكنين عندنا في البيت يعني بيت واحد ولا في اي مشاااكل والله براحه تامه وناسه لمى اجي من الدوام واشوووف اخواني واهلهم وعيالهم ... كل واحد يناديني ( يا عمي ) والله شي ... لكن في بعض الاسر عسى الله يهديهم ويسر امورهم تكون فيها مشاكل اما من زوجه الرجل او من اهلها يعني مجرد خلافات ... وانتو ادرى في بعض المواضيع ... بنسبه لي مؤيد وليسى معارض والواحد هو ادرى في ظروفه...

[غير البشر]

السكن تحكمه الظروف الخاصه بعائلة الرجل وكذلك ظروف الزوج الماديه اذا كان البيت مليان شباب يجب على الزوج ان يستقل بالسكن وبشكل فوري مع المداومه على الزياره لهم لان الزوجه لن ترتاح كل شوي ياداخل يامار اخوه وتجدها متغطيه 24ساعه اما اذا البيت فيه محارم للزوجه كاب الزوج وزوجته واخواته واخوانه ساكنين برا او لا يوجد عنده اخوان وفيه مجال انه يسكن معهم هو وزوجته فمن الواجب ان يسكن معهم على شان لو احتاجوا شيء يكون قريب منهم والله يرزق الجميع السعاده والتوفيق

[تسواهن]

.
.



بالنسبة لي معارضة وبقووة السكن مع اهل الزوج


مو للسبب بس الاستقلاليه حلووه وراحة للطرفين الاهل والزوج



وبعدين ظلم للزوجه تدخل على عايلة كبيرة وتتقيد وهي باول حياة الزوجيه !!



وبعدين حتى يصير لها غلا ومحبة اذا كانت بعيده !!

بس اذا دايم عندهم والوجه بالوجه تصير مشاكل !!




لا بالله انا من الحين اللي يبي يخطبن ترى شرطي سكن لحالي << انثبري هي ثبرتس








يعطيتس العافيه يالاجوووديه




..

[abontf]

[align=center]أنا أؤيد الاخوان والاخوات اللي يرون الاستقلالية
وأزيد عليهم من وجهة نظري القاصرة إن الاستقلالية لابد تكون من أول أيام الزواج
قبل لايحصل مشاكل , وعلشان من البداية تصير النفوس صافية , لأن وللأسف الشديد إن عداوة أخوات الزوج أول من يتضرر منها زوجات أخوانهم , وزوجة الأخ دائما ينظرون لها بعين الكمال ولايتحملون الخطأ منها ,
أنا شخصيا حصل لي بعض المشاكل بين زوجتي وأخواتي , وكنت صابر وأصبر زوجتي علشان الوالدة الله يطول بعمرها , لأنها حريصة جدا علي وعلى أطفالي , ويوم لاحظت أن المشاكل بدأت تتفاقم , رأيت من المناسب إني أستقل في بيت , لاسيما وإن أموري المادية ولله الحمد طيبة , وحاولت أسوي مقارنة بين سلبيات مكوثي مع أهلي واستقلالي في بيت , ولقيت ان سلبيات الخروج من البيت أقل بكثير من المكوث, ولعل أهمها إن المشاكل لن تتفاقم إذا خرجت , وبالفعل طلعت في بيت مستقل وأبشركم إن أموري ولله الحمد من أحسن لأحسن والنفوس صفت وكل شيئ على مايرام[/align]

[الجادل]

لكل انسان وجهة نظر
وانا في نظري ان كل شي سواء خير اوشر في ايدك انت يالزوجه الجديده
اذا انتي حاطه في بالك او معبى راسك من اللي حولك انك راح تدخلين الى عالم ثاني ليش ماتفكرين انه يكون احسن بكثير من عالمك عند اهلك وبعدين ليش تتهمن ام الزوج او خواته بالغيره وخلق المشاكل ليش مايكون انتي السبب او بالادق تصنعين المشاكل انا اتكلم عن تجربه شخصيه البيت بدون الشيبان مافيه بركه وهم الخير والبركه وعماتنا مافيهن البلا وربي البلا من تحت حنوككن
تحاولن تسون المشاكل بس علشان تطلعن بروحكن
ياختي اذا بتطلعين طسي بدون ماتسوين هالحركات والمشاكل
وبعدين اللي ماتسعد زوجها وهو مع اهله واخوانه صدقوني لو تقعد معه بروحها بكوكب ماراح يذوق طعم السعاده لان مواريها واضحه وصدقيني اصبري وبيجي يوم راح تطلعين منهم بطيب خاطر وبذكرى حلوه
وبعدين ياختي بطيطه ليش وجهتي المشكله من عمتك وبناتها ليش مايكون السبب منك وهذا بين من لسانك الزفر ودعاويك عليهن الله يصلحك بس زيني النيه ومحد مانعك من طلعات وروحات بس يمكن طلعاتك واجد يعني منقود عليها
وصدقيني اذا ماطلعتي اليوم او بكره بيجيك يوم بتجلسين في فله بروحك وبدون ازعااااااج ونصيحه اذا تبين تكسبين اهل زوجك مهما كان طبعهم ابتسمي بوجيهم وطعمي لسانك بالكلام الحلو وكلمة ابشر او ابشري لاهل بيتك ماتكلف عليك واذا سمعتي الكلمه الزينه اثني عليها والكلمه اللي ماتعجبك طنشي مو تراددين وتتصيدين وترفعين صوتك مثل الدلال يلعلع هههههه
واذا فيه اي مشكله لاتكبرينها بالعكس عالجيها وكل شي له حل

[نواف التويجري]

وجهة نظري اذا كان السكن مع اهل الزوج ليس فيه مشاكل

فلا ارى بأس

ولكن هناك فقدان لبعض الخصوصية قد تحدث مثلا ان الزوجة لا تستطيع ان تلبس ماتريد لزوجها في

البيت الذي تسكن فيه العائلة

فهنا تفقد بعض من الخصوصيات الزوجية والاستقلال

اما اذا كانت هناك مشاكل

فيجب على الزوج تقدير هذا الشيء دراء لان تحدث مشاكل اسرية

وقطع في صلة الرحم

[الدوحي0]

السالفه ليست تاييد ومعارضه كلهاا اذا مقتدر الزوج يفتح بيت فافضل له يفتح بيت واذا مايقدر فمجبور يسكنها معا اهله،،

[روح التوت]

ما أعتقد في فرق بين بيت الأهل أو بيت مستقل ‏..‏ ‏
يعطيك العآفيه ‏...

[الدلوعه*امل]

والله احسن بيت بروحها وموشقه فوق اهله علشان يرتاح من وجع الراس لانه في امهات على نياتهم وفي امهات اعووذ بالله يجنون الواحد

[abontf]

اقتباس: المشاركة الأصلية كتبت بواسطة الدلوعه*امل    والله احسن بيت بروحها وموشقه فوق اهله علشان يرتاح من وجع الراس لانه في امهات على نياتهم وفي امهات اعووذ بالله يجنون الواحد

والله انك صادقة والمشكلة إن كثير من الأزواج يعتقد إن أمه أطهر وحده بالكون ولايمكن تغلط أو تخطي , والضحيو زوجته المسكينة , بينما إذا جينا للواقع لقينا وللأسف الشديد إن كثير من الأمهات شرسات والشيطان متمكن منهن أعوذ بالله من الشيطان