[poem=font="Arial,5,blue,bold,normal" bkcolor="white" bkimage="" border="none,4,gray" type=0 line=1 align=center use=ex num="0,black"]
البارحه يا حسيـن مركـاي كوعـي = من العشاء لين أذن الفجر يا حسيـن
ما غير أسلـي خاطـري بالدموعـي = مثل الذي من يقضي الديـن بالديـن
وكل السبب طيري حسين الطبوعـي = النادر اللي شوفتـه تطـرب العيـن
اللـي إلـيـا منـي ندبتـه فزوعـي = مثل الشجاع إلـيـا نهمـوه القريبيـن
قمـت أتذكـر تلتـه للطلـوعـي = بخدن قنصنا فيـه حـروة اسبوعيـن
مدري ثمان أيـام معهـن اسبوعـي = لا شك كنهن يا ابن الاجواد يوميـن
وفي تالـي المقنـاص يـوم الربوعـي = أتلى العهد به راهـي (ن) بالجناحيـن
أقفى وراء خـرب مسقـر جزوعـي = متذير وأردفت مـن عقبـه بطيريـن
وسقنا معاهن وسـط خـد منوعـي = أقفن شمال ومبعـدات عـن العيـن
وقفت أدربل مير مـا مـن سنوعـي = وقالوا جهاز الطير ما نسمعـه زيـن
وأجهدت رجلي بكل رجم (ن) رفوعي = أرقى وألوح وأدبل الصوت صوتيـن
وما قصروا وقـت المنافـع ربوعـي = وأخذت في جـو القطامـي نهاريـن
لا شك طيري ما نـوى بالرجوعـي = وأنا بعـد حـدرت يـم البلاديـن
ما كـان ودي والمفـارق فجوعـي = ليتـه موادعنـي سـوات المحبـيـن
الله يلـوم الطيـر بعـده يلـوعـي = خلانـي أسهـر والمخاليـق ممسيـن
عساه يسلم مـن يديـن الطموعـي = اللي عـن النشـاد يخفـي البراهيـن
وإلا الرجال اللي تعـرف السنوعـي = تلقى على حجله مع السبـق رقميـن
وإلا عسـاه بنـايـرات التنـوعـي = ورزقه على اللي خالق الناس من طين
ومما جرى يا حسيـن قلبـي قنوعـي = لو كان عقبه خاطـري صايـر شيـن [/poem]
الشاعر / مشعل بن حمود الحبيني العازمي
دولة الكويت