نسيتنى علمنى وشلون ابانساك
فى هالزمن نسيان الاحباب عادى
وشلون لامرت على البال ذكراك
وطيفك سرق منى لذيذ الرقادى
وشلون لاقالوالى الناس وش جاك
من كنت فى لذه منامك تنادى
وشلون أعيش اللى بقالى بلياك
لامن غدينا كل واحد بوادى
لوقلت أداوى جراحى اللى تباطاك
ماكل جرح يفيدفيه الضمادى
أعلنت حبك لين كل تمناك
غلطه وغيرى من خطاى أستفادى
لولى مثل قلبك تمنيت فرقاك
واكيد قبلك بالجفا صرت بادى
حلوه عذاريبك وحلوه مزاياك
حتى بيوم فراقنا كنت هادى
كن الليالى ودها تكسب رضاك
وأنا يطول مع الليالى جهادى
فى ذمتى ماهى غريبه خطاياك
مبطى وقلبك لو تنبهت غادى
سهله على من كان مثلك وشرواك
مثل الثياب يغيرون المبادى
علمتنى أكره ذكرياتك وطرياك
وأنسى من الليله صدوق الودادى
ولانى بقايل عقبها وين ابالقاك
راضى ولوان جروح قلبى جدادى
ولا القصايد جعلها من فداياك
لبستها مبطى ثياب الحدادى
باكر على المخطى يدورن الافلاك
ونشوف من يصعب عليه البعادى