اتصل بادارة الموقع البحث   التسجيل الرئيسية

 


العودة   منتديات عاصمة الربيع > القسم الادبي > مشــــاعر الــــروح

مشــــاعر الــــروح يختص بالشعر النبطي

إضافة رد
 
أدوات الموضوع انواع عرض الموضوع
قديم 26-03-15, 09:58 AM   رقم المشاركة : 1
نديم المجره
شاعر
الملف الشخصي






 
الحالة
نديم المجره غير متواجد حالياً

 


 

طيرٍ غدى ياليتنا مالقيناه = ليت الهبايب ابعدن في مطيره.......

السلام عليكم ورحمة الله وبركاته

في يوم السبت الموافق 1436/5/16 كان العميد / خالد محمد الهملان الحربي(من اهالي عرعر) يقوم بتدريب طيره الذي اسماه (ذياب) في مخيم استراحتنا الواقعه على مدخل الدمام طريق الرياض وبعد ان عشاه قام بفك سبوقه. فشلع الطير واتجه الى مكان غير معلوم وكان ابو محمد رحمه الله قد وضع رقم هاتفه برجل الطير وبحث عنه في كل مكان ولم يعثر عليه وفي عصر يوم الاثنين الموافق 1436/5/18. تلقى اتصال من احد الاشخاص يبشره بوجود الطير لديه في ديرة شفية.وتقع شفية بعد شمال عريره باكثر من 50 كم. فرح ابومحمد بالعثور على طيره وقام باصطحاب الشاعر صادر حمود العنزي والشاعر عبدالله بن نازل المطيري. وكان التواجد في مقر المخيم حيث ترك صادر وعبدالله سياراتهم عند المخيم وذهبو مع العميد خالد بسيارته لاستلام الطير حيث طلب منا ابومحمد عبر اخر رساله صوتيه ان ننتظره بالمخيم حيث قال انه سيعود مع الطير (ان شاء الله) خلال ساعتين الى ثلاث ساعات وكنا في انتظارهم بالمخيم
وعندما تاخروا حاولنا الاتصال عليهم عدة مرات حيث كان جوالات صادر وعبدالله مقفله وجوال ابومحمد كان يرن ولا احد يجيب. وبعد الاتصال المتكرر رد احد الاشخاص وعند سؤاله اين صاحب الهاتف اجاب بانه حصل لهم حادث انقلاب بين عريعره وشفيه وانتقل الى رحمة الله خالد وصادر بينما عبدالله مصاب اصابه خطيره
صعق جميع من كان بالمخيم
وبعد انجلاء الصدمه اتفقنا على طريقة ابلاغ ذويهم باسلوب مناسب وذهبوا لاداء مهمة الابلاغ بينما بقيت في المخيم وكتبت هذه الابيات.
لذا ارجوا عدم الانتقاد لمعاني القصيده حيث خرجت في لحظة ذهول ولم اجد احد ازيح عليه العدوان سوى هذا الطائر النحس رغم ايماني بالقضاء والقدر
وبعد ذلك ارسلتها الى الشاعر احمد السراد الخثعمي والذي قام بمجاراتها وبعد ذلك انتشرت عبر وسائل التواصل الاجتماعي وقام بعض من الشعراء بمجاراتها


واليكم القصيده وقصائد المجاراة
..........
هذه قصيدتي


طيرٍ غدى ياليتنا مالقيـنـاه = ليت الهبايب ابعدن في مطيره

ليته تعدى الحد وابعد بمرماه = وعدى ورى بغداد وارض الجزيره

طير النحس حلفت انا لتوطاه = واحوس لو جا للمخيم مريره

والله ﻻنتف كل ريشٍ تعلاه = واسمل عيونه لين تصبح ضريره

وحلفت لخلي الحصاني تعشاه = واحط له عند الصقاقير سيره

مرحوم يامن باسم اذياب سماه = اذياب خلى نفوس ربعي حسيره
............................


مجاراة الشاعر/ احمد السراد الخثعمي

طيرٍ غدى من صاحبه عقب عشاه = ماهو بكيفيه جاه يمه نذيره

جاه النذير اللي على الحـق وداه = وداه لارضٍ كان فيها مـصيره

كنه يقول الموعد هناك تلقاه = وخذ صادر إبن حمود ماريد غيره

وراحو على داعي حكيم ن عبدناه = وهناك لحظات الحياة الاخيره

لا يالعريفي ... لاتزيد المعاناه = وحزنٍ سطا باقصا الحشا لاتثيره

قلبي شلع وارتاع من حر ماجاه = صادر غدى وابومحمد وطيره

..................

وهذه مجارات الشاعر اللواء / ضيف الله بن نايف الذويبي

لا لاتطير يازميلي وتشناه = الطير سبه والسبايب كثيره

لو تنتفه لو تسمله ما استعدناه = الحكم لله والليالي قصيره

ماله غريمٍ يالعريفي وننصاه = ناخذ بثاره في بواتع شطيره

الموت حق وكل نفسٍ تحراه = ولافيه شخصٍ عارفٍ وش مصيره

صادر وخالد تحت رحمتك يالله = تلطف بهم عند السؤال ونكيره

الحزن ماينفع ولو كثر ببكاه = لو سيل الوديان وايضا محيره

يالله يارب المخاليق يالله = تجعل لهم جنات عدنٍ وفيره

والصاحب اللي صار وقت المعاناه = ثالث ثلاثه من مصابه تجيره

عبدالله النازل تحرسه وتاقاه = وتقومه بالعافيه من سريره

وابشارة العجمي لها وقع ماحلاه = وقعٍ على قلبي سواة المطيره

يفرح بها المسلم ويصعد بها جاه = والله بها ياقاه لاهب سعيره

بشارة العجمي : اتصل احد الاخوان من قبيلة العجمان والذي تواجد في مكان الحادث اثناء وقوعه حيث قال انه حضر اولا عند صادر ووجده ينطق الشهاده وفاضت روحه ثم ذهب الى خالد ويقول انه رفع راسه وابتسم وفاضت روحه ( وانا والله كشفت عن وجه خالد بعد تكفينه وكان وجهه اقرب الى الضحك منه الى الابتسامه)

........................
وهذه مجاراة الشاعر/ مدلج بن عوض الشيباني


غنا العريفي واحرق القلب بغناه = زود على قلب المشقى سعيره


يشكي على فرقا خويه وينعاه = ويدعي عسى رب الخليقه يجيره

مرحوم ياللي كل من جاه يلقاه = رجل المواقف والامور الكبيره

خالد محمد جعل في عدن مثواه = يالله عسى جنات عدنٍ مصيره

اطلق سبوق ذياب لوح وعشاه = وكفخ قبل لايقضب الوكر سيره

وبدا على راس الطويله وناداه = لكن طيره مسرعٍ في مطيره

قفى وصلفات الهبايب تقفاه = كنه يقول لصاحبه ذي الاخيره

كنه يعرف ان القدر حان لقياه = والله عليم بخافيات السريره

والعبد يومن بالقدر مثل ماجاه = يرضى بقدر الله شره وخيره

يالله عسى الجنه مقره وملفاه = ياوحدٍ مانعرف اله غيره

....................
وهذه مجاراة الشاعر / عايد بن مهدي الوهبي


اليوم ثالث مونس الجمر واكناه = عيت تروح من الضلوع السعيره

جيت الثميري ثم زبنت المواساه =لا بردوا قلبي ولا اطفوا هديره

النوم عاف الرمش فاته ولا جاه = وعفت الوساده والتخوت الوثيره

يامن يرجع زحلنا واحلالاه = من هو يسوي بالنشاما بريره

ياليت ينفع في مثل غيبته جاه = وفعل السواعد والسطر والذخيره

والله ليومي كل وافي بشلفاه =من مركز العاقر لجال الزبيره

وتفزع رجالٍ بالطواريق تنعاه = وقفة وفاء جزله ولو هي قصيره

غنا بها احمد واوجع احمد وجاراه = الله من حبال الليالي يجيره

الذيب يلقا ذيب بحلاه وعواه = وراس ابن عمي بالمدايح جديره

الله كتب يومه وقدر وناداه = راح وعلى البيضاء نهاية مسيره

ربه دعاه وجل ربه تولاه = لا فعل شيهانه ولا فعل جيره

عساه بالجنه ومن كان وياه = ووجيههم من رحمة الله منيره

والله يوفقنا لخيره وتقواه = اجمل مافي بنادم بياض السريره
......................


وهذه مجاراة الشاعر / صافي السريره


لا .. لوم ياحمد في كلامٍ قريناه = ابيات تودع من قراها سعيره


فيها الوفا بادي وكامل بمعناه = وبين السطور تحس جور المريره

في جنة الفردوس يامن فقدناه = خالد وصادر والمعنّى تجيره

واللي حصل كلٍ على درب ممشاه = نرضى القدر ياحمد بشره وخيره

....................
.............................

وبعد يومين ذهبت الى المخيم وكانت سيارات صادر وعبدالله لايزالٍ في مكانهن عندما ركبوا مع خالد بسيارته لاحضار الطير وتركوهن عند المخيم
فقلت


جيت المكان وشفتهن واقفاتي = وسفي الرمل بين التواير له اثار

وقفت اطالعهن وهن صامتاتي = صمتت يتيمٍ فارق الاهل والدار

ومن الغلا غطيتهن في عباتي = اخاف يلفح بديهن شمس وغبار

الله يتغمدهم برحمته ويشفي ثالثهم الشاعر / عبدالله بن نازل المطيري

احمد بن عبدالرحمن العريفي
(نديم المجره)






رد مع اقتباس
قديم 06-04-15, 07:12 PM   رقم المشاركة : 2
{..تَنآهِيـ’ـد!
عضو جديد
الملف الشخصي







 
الحالة
{..تَنآهِيـ’ـد! غير متواجد حالياً

 


 

رد: طيرٍ غدى ياليتنا مالقيناه = ليت الهبايب ابعدن في مطيره.......

،/
صح الخفوووووق ي’الامير
كفيت ووفيت
وربي يرحمهم ويغمد أرواحهم آلجنه ،،
سلمت آليمنى
" هذا حال آلدنيا وآلموت مقدر ومكتوب ~







التوقيع :

رد مع اقتباس
قديم 13-07-15, 01:09 PM   رقم المشاركة : 3
صدى ضامي
شاعر
الملف الشخصي






 
الحالة
صدى ضامي غير متواجد حالياً

 


 

رد: طيرٍ غدى ياليتنا مالقيناه = ليت الهبايب ابعدن في مطيره.......

صح االله السانكم واعتلا شانكم
والله يتغممدهم برحمته







رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 01:47 AM


Powered by vBulletin® Copyright ©2000 - 2024, Jelsoft Enterprises Ltd.
تعريب :عاصمة الربيع

تصميم وتطوير سفن ستارز لخدمات الاستضافة والتصميم