اكيد للجوري سعاده بالاشراق
باسباب خوفه من دجى حالك الليل
ويودع الجوري شعاعه من اشفاق
ويصافح همومه بليل التعاليل
عزاه للجوري مواصيل وافراق
ومسروق عطره دون ذنبن وتأويل
مطلع قصيدي يكشفه ضوح براق
لامن تدلقس جو من يكره السيل
افاق يمكن خلف الافاق افاق
ربي علم ماغاب عن علم عن قيل
يستوطن الروح الشقيه بالاعماق
حب امتلاك الشي لو كان به ميل
يانفس خلي للمقادير الاوراق
وعيشي رضيه والمرازق بلا كيل
وياحبي العذري لك اليوم مالاق
من فل من جوري ماهو ورد باكليل
قطفت لك ماقد زرعه من اشواق
من روض جوفن ماوطوه المغاليل
حبي وحبك مانزل قلب خفاق
حبي وحبك يخفق الروح وتسيل
حبي وحبك غير عن باق الارناق
حبي وحبك يلمس الغيم ويعيل
بس المسافه خلت الحال منعاق
ياويل ويلي يالرموش المضاليل
حمًّلت كتفي حمل والحمل ماطاق
الحمل عيا عن كتوفن مناحيل
الحلم يبقى حلم لو صاحبه فاق
بس القهر من حلم ماحققه جيل
والا المربي يجلد ويحرق احراق
والجلد مازوًّد سوى سرعة الخيل
عزاه يالجوري تبي نور الاشراق
تبطي مادامك في دجى حالك الليل
غازي مطر العفتان