من قصايد خلف ابن هذال الغزلية
يازين حالي قسم اربـاع وانصـاف
لاوالله الا قلقـل الـهـم حـالـي
القلب اصابه من سبايبـك خفخـاف
وارخصت دمعي عقب ماهوب غالي
عليـك قلبـي تالـي الليـل يـلاف
لف الحبال اليـا طواهـا المحالـي
وعليك قلبي بالحشا يرجف ارجـاف
رجف الصواقع في ثقيـل الخيالـي
منولٍ في الحب لا كمر والا اخـاف
واليوم افزز واستحي من ضلالـي
واهنـي حـيٍ لاتولـع والا شـاف
ولا سامر النجمه شهـور وليالـي
وانا وليفي ماحكم لـي بالانصـاف
وانا على جمعاه اخاطر مـا بالـي
اشري محبة صاحبي زين الاوصاف
لو طيرو سعـر الذهـب والريالـي
العين عين اللي بدا راس مشـراف
عين الوحش والعنق عنق الغزالـي
والجسم غصنٍ بين الاغصان غرياف
يلعب اليـا هبـت عليـه الشمالـي
ابو ثمانٍ وضـحٍ بيـض ورهـاف
طعم العسل فيهن تسلسـل وسالـي
اتلف حياتي عاضـه الله بالاتـلاف
يوم ارتكيت لحكمتـه مـا رتكالـي
ظالم وجدد مشـي قـدام بخـلاف
وبعـد جـروحٍ مرمسـاتٍ بوالـي
ادري تصاديده ماهي بغض وعيـاف
قصـده تغلـي والتغلـي دلالــي