اتصل بادارة الموقع البحث   التسجيل الرئيسية

 


العودة   منتديات عاصمة الربيع > القسم الادبي > القصــه والقصيــده

القصــه والقصيــده قصص الماضي وحكايات الحاضر

 
 
أدوات الموضوع انواع عرض الموضوع
قديم 29-05-09, 02:04 AM   رقم المشاركة : 1
غلاها من غلاي
عضو نشط
الملف الشخصي






 
الحالة
غلاها من غلاي غير متواجد حالياً

 


 

Wink معانات زوجة لاكن حكمة خخخخخخخخ


قصة أعجبتني ولاكن غيررررررر

إبداع ولاكن حكمة وأبي ردكم للحكمه


زوجتي المسكينه

هذه المخلوقة التي حيرة جميع علماء الأرض في تصنيفها... فهي تحمل سمات الضفادع لحبها للمستنقعات ، وتلتفت بجذعها دون رقبتها كالضبعات ، وتسن مخالبها كاللبوات ، وتهرش رأسها تحت الكفرات ، وتهيم طوال الليل في الحارات
وبعد عمر طويل ذهب فيه علماء وحضر فيه علماء وكاد أن يتغير شكل الأرض
توصل العلماء إلى تركيبة شكلها ،، وقالوا بأنها من مخلفات المفاعل النووي ( تشير نوبل )
فهي لم تنهشها ذرات الغبار الذري بل سقطت في قلب المفاعل مما أدى إلى تشويه في الخلقة وتغير في السلوكيات من إنسانة إلى مخلوق ضن الكثير بأنه فضائي حتى أثبتت المختبرات عكس ما قيل .. وتم تزويد مبنى الأحوال المدنيه بنوع هذه المخلوقه بأنها أنثى ..
وهانحن نسرد لكم قصة جديدة من حياتي البائسة معها !!!!



كوووووح طووووخ

<< صوت حادث عند باب بيتنا
برب
افصلوا الاشتراك قبل أن ندخل في الموضوع



( البدايــة )

اول ما طلع صوت الحادث طلت زوجتي هاله مع الدريشة .. وهي تصارخ وانا جالس اسبح فرحان وأغني اغنية مزعل فرحان ( ست الحبايب يا حبيبه ) و هاله تصارخ دحيم تعال سيارتك انصدمت .. كانت تتكلم والصابون مغرق جسمي ما قدرت اسمعها كنت حاط فوطة بيالات في اذني عشان انظفها ، مدخل الفوطة من الاذن اليمين ومطلع طرفها من الاذن اليسار وأنا أغني
شوي انفتح باب الحمام علي أول ما شفت الباب انفتح غطيت صدري الا هاله تصيح وهي حاطه خمسين شباصه فوق راسها كنها محل (( كل شي بريالين ))
قربت مني وأنا اقول بصوت مستحي اطلعي تراني مفصخ وهي تجي عندي يوم شفتها قربت مره تلويت في الستارة حقت البانيو وجلست أصارخ ليش ما ضربتي الباب يا الدبشة على بالك داخله مقلط الحريم وانا اتكلم اشوفها تحرك شفايفها بس ما اسمع شي .. تذكرت اني حاط الفوطه داخل اذني قلت لها بالله اسحبي الفوطه بشوي شوي عشان اسمع صوتك اللي كنه حكة هلل على سراميك ... انا قلت بشوي شوي .. ما دريت الا ماده يدها وبكل قوتها سحبت الفوطه حسيت ان مخي طلع كنه ماطور استراحه من قوة السحبه
ناظرت فيها وأنا متلفلف بالستارة وسنوني تجرش مع بعض وهي خايفه وتقولي وش فيك معصب .. قلت مدري عنك داخله علي بدون ما طقين الباب .. قالت وهي مستحيه معليش دحيم ما دريت انك تستحي مني .. وبعدين وشوله مغطي صدرك اللي كله (( حفر )) : ... ناظرت فيها وقلت هذي حفر الله يخلف على امك هذي كويات يا بسكال الشيون .. قاطعتني وهي تقول تصدق يا دحيم مدري احس ان اللي كاويك على صدرك ما استخدم مقص وإلا حديده أتوقع انه كب المنقد حق الجمر كله على صدرك وبطنك عشان يوفر جهد .. وإلا فيه احتمال ثاني .. قاطعتها وأنا واصل حدي قلت وش الاحتمال الثاني .. قالت أتوقع أنك كنت جالس في ملحق عزوبيه وأنت صغير وقلبوا صدرك طفايه زقاير لهم وخصوصا الجهة اللي تحت صدرك شكلك جالس مع ناس حقين بلوت كل ما خسروا ولعوا زياده وطفوا والضحية هالمنطقة ... قالت كلامها وقامت تضحك ...
وهي تضحك مديت يدي على المغسلة واخذت منها صابونة (( لوكس )) وعلى طول رميتها في وجها من قوة الضربة رجعت على ورى وصفق راسها بالسخانه ويطيح سلك السخانة وتزلق على البلاط والصابونة جمبها .. اول ما فتحت عيونها حاولت توقف وهي توقف وطت الصابونة وعلى طول زلقت ثاني مره .. مع الزلقه مسكت سلك السخانة عشان تتماسك لكن السلك كان عريان ما امداها تحط يدها الا قام السلك ينفضها في الحمام ويرجفها في كل محل وشباصاتها قامت تنور وبعضها ذاب من حرارة الكهرب ..
أنا يوم شفتها كذا ما عرفت وش أسوي قمت وفصخت الشبشب البلاستك وجلست أصوب على يدها اللي ماسكه السلك
وأرمي الشبشب بكل قوتي وفي أجزاء من الثانية جت الشبشب في وجها ... وهي تصارخ وأنا مرتبك قمت وفصخت الفردة الثانية وأسمعها تصارخ وتقول خلاص لا ترمي شي يا الحول الموت بالكهرب أهون من الموت بالشبشب
سويت نفسي ما سمعتها يوم جيت أرمي الفردة الثانية انقطع الكهرب عن الحارة كلها وفي الزاوية أشوف جسم هاله خمد وقام يطلع شرار
وشعرها يلمع من قوة الشحنات اللي فيه .. قربت منها وقلت لها أقول هاله الكهرب شكله طفى عن الرياض كله ..ناظرتني بحقد وهي تقول وإذا صار طافي وش تبيني أسوي له .. قلت لها والحياء ماكل وجهي أنت عارفه أن جسمك مكتسب شحنات فا عشان كذا يا ليت تمسكين فيش الثلاجة الين يرجع الكهرب ... عدلت جلستها وهي تقول وليش امسك الفيش .. قلت وأنا منزل راسي عشان الثلاجة مليانه لحم ودجاج واخاف يخرب قبل رجعة الكهرب ..
ما أمداني اكمل كلامي إلا الكهرب رجع و هاله توقف كنها (( ساحره )) بشعرها هالمطشم .. أول ما فتح النور وشفت هاله قلت اللهم اني اعوذ بك من الخبث والخبائث .. وش هالشعر وراه موقف طالع كنه سور الصين العضيم
وانا أتكلم اشوف وجه هاله صار احمر كنه علبة صلصة ضاربتها الشمس ومورمه
وأنا أناظرها حسيت بتأنيب الضمير وشي عصر قلبي وخلاني أجي عندها وجلست أفكر وأحاول أني ادور كلام حلو ما لقيت إلا أني اقول ( ماتشوفين شر عزالله مقامك وانت بكرامه )
توني ابكمل كلامي الا انفجرت في وجهي وهي تقول وش هالكلام يقالك علوم رجال هالحين وإلا تبي تواسيني .. قاطعتها وقلت كل شي إلا رجولتي يا هاله أنا من عمري وأنا اللي اصب الشاهي والقهوة في مجلس أبوي .. قالت لي وهي تضحك تدري ليش يا دحيم يخلونك تصب الشاهي والقهوة ؟ .. قلت لها ليش ؟ .. قالت عشان أبوك يبغى يوفر حق القهوجي ، وبعدين شكلك مهوب بعيد عنهم ما نقصك إلا صديري تلبسها ويكمل شكلك ... المهم ما علينا من هذا كله نسيتني وش أبقول من اليوم يا عديم الاحساس سيارتك انصدمت .. يعني ما فيه سفر يعني مافيه (( حج )) تعال شف قالت كلامها وهي تمسك يدي وتسحبني للدريشة وبيدي الثانيه ماسك الفوطه على خصري وأنا اقولها شوي شوي ترى ان اسرعت اكثر من كذا بتطيح الفوطه ثمن ( ....... )
قاطعتني وهي تقول .. وإذا طاحت الفوطة يا (( راغب علامة )) منزين جسمك هالحين .. كله شعر اللي يشوفك وانت مفصخ يحسبك لابس بنطلون جنز .. وبعدين يا دحيم أنا استغرب على كثر الشعر اللي في جسمك ما تعاقد معك مصنع المسامير وإلا منجرة عشان تمدهم بشعرك
وهي تتكلم وأنا اناظر مع الدريشة ( النافذة ) جالس اشوف سيارتي اللي صارت حطام من قوة الحادث و هاله تصارخ يعني شلون مافيه ( حج ) هالسنه قلت لها دقيقة خليني افكر .. قالت وش تفكر فيه السيارة انعدمت يعني تبينا نستاجر ( بعير ) والا ننظم لنا قافله ونروح .. هي قالت قافله على طول طقت فكرة في راسي قلت جتني فكرة وانشاء الله ( بنحج ) هالسنه بس انت صكي فمك شوي عشان الهوى تلوث من ريحة الفطيس



.. تدرين يا هاله حنا البيت الوحيد اللي ما يجيه ذبان والسبه ريحة فمك قالت لي ليش والله لو أن ريحة فمي مبيد .. قلت لها على طاري المبيد يا هاله ترى كلموني شركة (( ريد للمبيدات )) يبون شوي من سعابيلك عشان يسوون تركيبه تقضي على اليهود مهوب الحشرات وبس
وأنا اتكلم مسكت سماعة التلفون وجلست اتصل وأناظر في هاله وفي شعرها الموقف كنه محصول الذرة الامريكيه
قالت لي وش جالس تسوي .. قلت اتصل على خويي مصقال هو يعرف حملات حج كويسه .. قالت لي وهي معصبة مجنون انت العالم بتمشي اليوم بالكثير بكره يعني مافيه حمله تستقبل هالحين .. قلت لها ما عليك بس انت هدي وروحي غسلي وجهك ... وإلا أتصلي على أي مؤسسة جلي بلاط يجون يغسلونه :)
وقولي لهم لعب فيه الكهرب ولخبط ملامحه .. وخليهم يوخرون السواد اللي فيه طالع كنه قضبان سجن
قالت ما نيب مغسله ألين اشوف وش بتسوي انا هالسنه لازم ( أحج ) .. ناظرت فيها وانتابني شعور بأني ودي اتفل عليها .. بس مسكت نفسي خفت أنه ينشف ريقي
قلت لها خلاص روحي صلحي شاهي
مالك إلا تحجين يا ( الجليلة بنت مره )


رحت ،، واتصلت على خويي مصقال وشرحت له الموضوع كله وقال خلاص تجيني بكره في البطحاء عند مجمعات النقل وجب معك صورة للمدام .. أنا هنا وقفت قلت لازم صورة .. قال إيه لازم صورة .. قلت طيب ما ينفع أجيب لك صورة ( حماره ) في مزرعة جدي .. سكت شوي وقال وش دخلني في ( الحماره ) أبي صورة لزوجتك .. قلت يا مصقال صدقني مافيه فرق كلهم نفس الشبة اللهم انهم يختلفون في شي بسيط .. قالي مصقال وش يختلفون فيه .. قلت ( حمارة ) جدي فيها حبة خال تحت الدقن مثل نوال الزغبي .. و ( هاله ) فيها وطيات جزم لأنها من يومها صغيرة وهي تحب تنام عند مدخل الفله عشان كذا كل ما دخل أحد مسح نعاله في وجها وبعضهم يستعد عليه .. سكت مصقال ثمن قال دحيم أنت تتكلم عن زوجتك .. قلت وأنا أتأفف يا عمي ودي أوريك صورتها بس المشكلة مافيه .. قالي كيف مافيه ما عندها جواز .. قلت إلا عندها بس مافيه صورة ... مصلحة الجوازات منعت وجها يطلع قالت
حطوا بدال وجها صورة شجرة وإلا ابجوره .. قاطعني مصقال طيب ليش منعته .. قلت يا خوي كانوا بيعاملون وجها مثل قناة الشوتايم بيحطون صورتها ويكتبون تحت لا ينظر لها أقل من (18 ) سنه .. لكن مالقينا مصور قدر يتحمل وجها ولا كاميرة تلقط وجها كل ما صورناها طلعت الصورة مربعات كنك تشوف وجهك في مويه معكرة ... سكت شوي ثمن قال الله يعينك ،، بس أنت كيف صابر .. جيت أبتكلم سمعت صوت صرصرة وأحتكاكات ..
قلت لـ مصقال خلاص الوعد بكره انشاء الله نجيب عفشنا ونجي زين .. قال اوكيه .. سكرت وجلست أتسمع الصوت .. صوت غريب كنه صوت ركب عجوز يبغالها تشحيم .. وأنا جالس اسمع شوي دخلت علي هاله وهي نافشه شعرها ومعها الشاهي .. أول ما جت قلت بقرف .. الله ياخذك خربتي البويه شوفي السيب كله امخش من شعرك .. قاطعتني وهي تقول هذا جزاي مسويه لك تسريحه .. ناظرت فيها وجتني رغبة في التطريش عليها .. قلت هالحين هذي اللي عليك تسريحه .. هزت براسها .. أول ما هزت براسها قلت شوي شوي ودنقي لا تلقط المروحه شعرك ثمن يتلفلف عليها وتسحبس في السقف ... وبعدين ما أتوقع اللي عليك تسريحه أتوقع دالوب ثلاث درف ناقصها ثايب ... تعالي بس أجلسي .
جت وجلست جمبي .. وأنا ماسك نفسي بالحسرة من كثرة شعرها .. قلت لها هاله تدرين أن كثافة شعرك غريبة .. قالت لي ليش ؟ .. قلت مدري بس أحس أني لو أبحركة بيطلع منه هنود منحاشين من الجوازات .. جت بتتكلم قلت كلي تبن وهاتي الريموت حق الرسيفر .. مدته لي وجلست اقلب في القنوات الين وقفت عند قناة نجوم .. وكان فيها فديو كليب (( البرتقاله )) جلست أناظر فيهم وفي رقصهم وفي أجسامهم وفي نفس الوقت أختلس النظر في كيس الطحين اللي جمبي وهي مهيب يمي جالسه تصب الشاهي
شوي رفعت راسها وجلست تشوف الفديو كليب وهي تتأفف وتقول .. دحيم غير القناة ... أنت على بالك أنهم زيون ... الله يخلي الميك أب اللي محليهم والا والله لو يطلعون على الحقيقة كان تشوف الفضايح .. ناظرت فيها وقلت المشكلة هذولي على الأقل الميك أب يبين فيهم لكن أعرف ناس لو يجي كريستانديور ، وجفنشي بأنفسهم ما حركوا شي ويمكن يقلبون ماركاتهم ويخلونها ماركت ( جزم ) ، وبعدين شوفي أم اصفر ،، شوفي خصرها كنه غرشة كاكولا .. ناظرتني وهي تقول حتى أنا خصري كنه غرشة كاكولا .. ابتسمت وقلت أنت خصرك كنه غرشة أورنجينا وإلا ببس العائله ،، وبعدين شوفي رجليهم صغار .. مهوب مثل رجلك عشان نشتريلك نعال نفصلك يختين كل سنه .
قاطعتني وهي تقول فكنا من خرابيطك وقلي وش قالك خويك .. قلت يقول تعالوا بكره فيه حملة يعرف راعيها .. حملة قويه فيها جميع الخدمات .. قالت لي وهي متحمسة يعني خلاص بتتحقق أمنيتي و ( بحج ) .. قلت وأنا أتأفف أيه يارابعه العدويه .. قلت كلامي هذا وقمت رحت نمت وخليتها وهي تصارخ وتقول ابرتب الشناط مهوب جايني نوم

* * * *

( اليوم الثاني )



صحيت من النوم لقيت جمبي كيس سمنت .. فتحت عيوني زين لقيتها هاله متحضنه المخده ونايمه .. قلت منتب عاقله يا ( اليسا ) ماناقصك الى تقومين على كلب يطامر فوق السرير ويلعط في خشتك
وخرت البطانية وقلت يا الله قومي .. سفهتني ولفت وجها الجهه الثانية .. لفيت من الجهه الثانية ومعي شبشب أول ما جيت قدام وجها رفعت يدي ولشطتها على خدها طلع صوت فرقعه كنه محول ضارب شوط .. على طول صحت وهي مرتاعه وقامت تهذري حرام عليك كذا الزوج يصحي زوجته .. ناظرت فيها باشمئزاز وقلت وأنا أبي اصرفها معليش كان فيه صارور يمشي على خدك وحسيت أنه تعبان وهو يمشي والسبة الحفر اللي في وجهك .. قلت خلني اقتله عشان أريحه من المجهود اللي جالس يسويه وفي نفس الوقت أكسب أجره أني ريحته من العذاب
قلت كلامي وطلعت من الغرفة ووقفت في الصالة .. وجلست أناظر في الشناط وعيني طايره .. قلت يا هاله بالله كل هذي شناط ... وين حنا رايحين .. ترى كل الدعوه سبعة أيام في الحج وراجعين .. قالت لي وهي في الحمام يمكن نحتاج ثياب هناك وغيارات .. قلت وين يا هاله الشناط اللي هنا تنفع نفتح فيها بسطه قدام مستشفى الامير سلمان .. قالت اقول رح وقف تكسي ترى تأخرنا على خويك
مسكت الشناط ونزلتها كلها الين انقص ظهري .. وحملتها في التكسي وبعدها رقيت فوق وأنا منهد كني حرمه ولدت توم طالعين في وقت واحد بدون عمليه .. جيت ورميت نفسي على الكرسي حق الصالة وهي طالعه غاسله شعرها .. وفي المكان ريحة خوره .. ريحة فطيس .. ريحة واحد ميت .. قلت هاله تشمين الريحه .. قالت أي ريحه قلت مدري فيه ريحة فار ميت له أسبوع .. قالت ما أشم شي .. قالت كلامها وجت وجلست جمبي وزادة الريحه .. قلت بس خلاص عرفت وين مصدرها .. أقول قومي من جمبي تراني تعبان .. قالت ليش ؟ .. قلت مدري عنك ريحة هالفطيس كله جايه منك .. لعنبو خيرك أحس اني متزوج يهودي .. من يوم عرفتك ما حلقتي باطك كله شعر من كثر الشعر اللي فيه ما تقدرين تضمين يدك على جسمك ... من كثر الشعر صرت أشك أنك حاطه راس سوداني في باطك ومسكره عليه ..
وبعدين عمرك ما أستخدمتي الحلاوة في سيقانك .. قلت كلامي وأنا أرفع ساقها .. وأقول شوفي بالله هذا ساق حرمه .. ساق مليان شعر كنه حصى زفلت .. وش خليتي للأتراك هم أهل الشعر .. وبعدين شوفي براطمك اللي كنها حواف كنب ..
هذا غير خشمك هالكبير اللي يشوفه يحسبه معصاد سليق .. وأنا أتأمل وأشبه صرخت وقالت خلاص يا رامي عياش .. خلاص يا وائل كفوري .. خلاص يا طوم كروز .. إلى متى تجلس تعذرب قم لا تفوتنا الرحله .. ترى الحملات الهاي تروح بسرعه ما تنتظر .. قلت لها أنا جاهز .. وانت قالت أنا جهازة بس البس عباتي .. قلت قومي .. جيت أبنزل قالت باقي شنطه ما نزلتها .. قلت خلاص قومي ..
راحت تلبس عباتها .. وانا رحت عند الشنطه وخطفتها .. بس ما أمداني أخطفها إلا حسيت بيدي انفكت وطاحت جمب الشنطه .. حاولت أني أشيلها لقيتها ثقيله .. قلت وش فيها عسى مافيها جثة جارنا اللي كل يوم هاله تتهاوش معه .. نزلت الشنطه وجلست أفتحها وأنا أفكر قلت شكلي أبلقى اليدين والرجلين محطوطين في جهه والراس محطوط في حق الاقلام لأن جارنا كان راسه صغير كنه محايه قلم مرسم .. وأنا أفكر أنفتحت الشنطه وأول ما أنفتحت ناظرت لقيتها مليانه (( حصى )) .. أستغربت .. قلت وشوله (( الحصى )) لايكون مفكرة أن حنا بنروح لفلسطين .. أو أنها بتتبرع لياسر عرفات بها .. وأنا أفكر جتني وقالت هاه نزلت الشنطه .. التفت عليها وقلت تعالي هنا وشوله هاالبلك اللي أنت جايبته
قالت يا دحيم بصراحه خويتي ناهد تقول أن مزدلفه حصاها صغيرة .. عشان كذا نزلت البارح للعماره للي تبنى قدام بيتنا وأخذت بلك وعبيت الشنطه ..
قلت لها ... طيب وش دخل حصى مزدلفه بالبلك اللي في الشنطه .. يعني هل كلمتك بلدية مكه وقالولك إذا ما عليك أمر يا هاله وانت جايه لمكه هاتي معك حصى عشان الحصى اللي عندنا خلص.. قالت والله يا دحيم تبي الصراحه أنا ما يبرد قلبي الحصى الصغير .. أبي أحط حرتي في الشيطان أبي إذا رجمت أحس أني راميه ...
فتحت فمي .. وقلت أنا والله اللي ودي أرميك من فوق مبنى المملكة .. وش ترجمين ووش تبردين قلبك يا جعله الفضخ ... أنا على بالي يوم شفت كمية هالحصى قلت في نفسي يمكن تبين تبنين ملحق وإلا غرفة سواق عشان أخوك إذا جا يمرح عندنا نحطه فيها ... قالت لي وهي مبوبزه .. هذا جزاي أبي أزيد أجرك وأجري إذا رمينا .. قلت وش اللي ترمين وبعدين تعالي هنا إذا تحسين أنه عندك هواية الرمي ..ليش ما سجلتي في نادي الرمايه للمكفوفين .. ناظرتني وقالت بسم الله علي الحمد الله أنا مانيب مكفوفه .. قاطعتها وقلت أنا مهوب قصدي أنت مكفوفه أنا قصدي المكفوفين عشان ما يشوفون وجهك وتجيهم روعه ويغلطون في الهدف لأني أتوقع وهو مكفوف بيطق أكثر من وهو مفتح وانت جمبه .
ناظرتني بحقد وقالت وبعدين ... بنطول هنا .. يا الله خل الشنطه هنا وخلنا ننزل بسرعه .. التكسي خلص بنزين سيارته وهو ينتظرنا ..

نزلنا وجيت أبركب قدام قالت لي دحيم أركب ورى معي .. قلت ليش قالت عشان أتكيت وعشان اللي يشوفنا يقول وش هالاجانب اللي جايين سياحة ... التفت عليها وقدام راعي التكسي وقدام الخلق اللي في الشارع كلهم جمعت ريقي وتفلت في وجها تفله من قوتها رجع راسها على ورى وصفق في حافة الباب وطاحت جوى السيارة وصار نصفها داخل والنص الثاني برى .. قمت ومسكت رجليها وبكل قوتي رميتها داخل وتقلبت جوى السيارة وأنا أقول أجل عشان يحسبونا أجانب .. ركبت قدام وراعي التكسي .. مطير عيونه خايف مني من بعد الموقف وقلت له اطلع للبطحاء
قالي أن بغيت نطلع للقمر بس انت هد أعصابك
وصلنا للبطحاء .. ونزلت وهي جالسه تصيح ورى وراعي التكسي ساد أذنه يقول لازم تتراضون .. شينه قدام الناس خصوصا في الباص
قلت له أقول حلات هالشنب اللي انت حاطه كنه فرشة مطويه في زاوية
قلت كلامي ونزلت من السيارة ونزلت الشناط وهي جمبي تصيح .. تقول والله لوريك أجل تتفل في وجهي والله لو أني مغسله قدامك عشان تسوي كذا .. قلت لها وتأنيب الضمير رجع لي ثاني مره .. قلت يا هاله يا حبيبتي .. ما أمداني اكمل جملتي إلا نقزت في حلقي وحضنتني وهي تصارخ .. وتقول أشهدوا قال يا حبيبتي الكلمة اللي كنت أبي اسمعها من زمان .. وهي تصارخ تجمعوا المصاريا والعمال اللي في المجمع يحسبونها هوشه وواحد من المصاريا يقول : ياخسارة على الجدعنه مراته بتضربه ... ناظرت فيه لقيت وجهه سايح كنه كريمه في ثلاجة خربانه .. وأنا جالس اجاهد أني أبعدها عني سمعت صوت مصقال يقول وش فيه يا جماعه وخروا واحد يحضن زوجته مشتاق لها .. هو قال كذا بغيت ارفع هاله وارميها عليه ..

شوي تفرقوا العالم وجا عندي لقى هاله لازقه في خدي وتبوس و مصقال يقول يا جماعه مهوب في الشارع ترى الهيئة تمر كل شوي هنا .. قلت له إذا همك الهيئة لا تخاف عادي مهوب قايلين شي بيقولون واحد جالس يبوس واحد بس المشكلة أني بديت أحس بحرارة في بشرتي والسبة هالأسيد اللي يطلع من شفايفها
شافها مصقال لازقه قام وسحبها من عباتها وهو يقول مهوب معقول كذا خلاص .. وهي تصارخ تقول وخر أنا ما صدقت يقول يا حبيبتي .. قلت لها أنا آسف طلعت بالغلط
وخرت عني و مصقال يقول وينكم تأخرتوا مره .. الحمله راحت .. قلت تكفى دبرنا يا سنايدي .. قال شف فيه باص يوصلكم لمكلة المكرمة وهناك دوروا حملتكم أسمها ( أم لهيمان ) حملة راقية على كلام اللي كلمته عندهم يقول فيها جميع الخدمات وكل شغلهم فايف ستار ...قلت له زين ثمن قلت وين الباص .. قالي شف يا دحيم هالباص يعتبر آخر شي وما يروح معه اللي يتعطلون والا اللي فلوسهم قليلة .. قلت مهوب مشكلة .. قال هذاك الباص اللي هناك
ناظرت شوي ثمن التفت عليه .. وقلت وينه .. قال هذاك .. قلت ما أشوف شي .. قال شفه زين .. قلت ياخوي فيه باص خرابه وشكله عطلان وين اللي تقوله .. قال هذا اللي أقوله لك الباص الخرابة والعطلان اللي تتكلم عنه ..
سكت شوي ثمن قلت ... هذاك الباص حق خط البلده .. تبينا نسافر فيه ... هذاك ما أتوقع انه يطلعنا برى الرياض .. وإن طلعنا من الرياض أتوقع نكمل طريق مكه وحنا ندفه .. توني جاي أبقول لا هونت طمرت في حلقي هاله وهي تصارخ .. أبي ( احج )
قلت الباص قديم ومعفن كنه خبزة تميس في شقة أفغان .. وشكل اللي بيروحون عليه رجال كلهم .. وين نحطك فيه قالت ما علي منك ... دبرني
قلت خلاص بنروح معهم .. عساهم يوافقون ما يقول نركبك في تانكي البنزين
قلت كلامي وشلت الشناط أنا و مصقال اللي جالس يقرقر فوق راسي كنه عجوز جالسه على صحن فستق وحالفه تخلصه ..
ركبت الشناط في الباص .. وجينا بنركب جوى أنا و هاله أول ما دخلت الباص شفت مصاريا وهنود وباكستانيين أشكال تجيب الهم كني داخل على مكتب العمل ... والباص فوووول ثمن قلت للسواق بكامل الذرابة .. عفواً الباص مليان .. ناظرني السواق ووجهه كله شعر كنه حاط فوق كتوفه قنفذ قالي .. أقول لا يكثر منتب داخل النقل الجماعي .. ترى هذا خط البلده يعني تحمل مافيه مكيف وتحمل ريحة أباط هالعالم اللي هنا .. قلت له يا خوي أنا معي حرمه .. قال وينها قلت شفها برى .. ناظرني ثمن ناظر فيها وحسيت أن وجهه انكمش طلع كنه فنيلة علاقي مغسوله بمويه بطاريه .. قالي يا خوي أنت متأكد أنك ماخذ حرمه ..
قلت ليش السؤال؟ أنت شاك في
الشي هذا .. قال لا بس أتوقع أنكم لو ركبتوا الباص أبخاف أنه يصير فيك شي أنت ،،مهوب هي .. هي وجها مكتوب عليه ممنوع الأقتراب .. هو قال كذا على طول أنا عصبت .. وقلت أحترم نفسك .. عطاني ظهرة وقالي يا عمي أنت مسوي تغار ... ترى أنت متزوج برغي محلي .. ما أمداه يخلص كلامه إلا هاله تقوله أقول أنت يا دبة الغاز من زين جسمك هالحين اللي يشوفك ما يعرف أن كانك رايح والا جاي .. شكلي ما مليت عينك .. أقول دبر لنا محلات جوى الباص .. والا شف لنا مكان .. قال أقول الباص فووول .. تبون تجلسون فوق التنده انت ويا علبة هالدبابيس اللي معك ... قالت له بالله أنت شفت ضروسك اللي كنها خرامة ورق
ضحك وهو يقول اللهم لا شماته ... والله أخاف أتكلم فيك يبلاني الله في عيالي

* * *

ركبنا فوق التنده .. وجلست أنا وياها هي ويا عباتها كنها (( ساحرة )) .. وهي تقول هالحين هذي الحملة اللي يقولها خويك .. أنها زينه .. تأففت وقلت لها .. هو يقول تأخرنا لو جينا بدري كان لقينا شي حلو ... وبعدين تغطي زين ... ترى كبدي لايعه من منظر سنونك وهالجسر اللي انت مسويته ... كنه جسر البحرين مصفوق في وجهك .. قالت لي وهي معصبة .. أقول بالله ما عجبتك سنوني .. قلت من زينها كل ضرس أعرض من الثاني .. وخصوصا اللي قدام كنهم بيبان مطعم
وأنا اتكلم السواق قام يصارخ .. ترى حركنا تمسكو .. تمسكت و هاله ما سمعت السواق .. أول ما حرك على طول طاحت علي وأنا أقول وخري لرجفك على كلاك هالحين .. قالت هذا بدال ما تقول بسم الله عليك .. قلت لها تبيني أقول بسم الله عليك .. قالت إيه تسمي علي عشان ما يدخل فيني جني من الروعه ... ضحكت في وجها .. وأنا أقول أنا أتوقع لو دخل فيك جني يا هاله بيطلع وهو يطرش من القرف .. وبعدين انت من جوى اتوقع كنك دهاليز الحصن مخارجك مهوب واضحه يعني الجني اللي بيدخل معدوب طالع ... ناظرتني شوي ثمن صدت وقالت اللي غاير يروح لمه طاير ... هي قالت كذا وأنا راودتني فكرة مش بطاله أني أفصخ الزبيريه والينها على ظهرها فوق تندة هالباص ومافيه شهود لو صار فيها شي لكن خفت أن الزبيريه تخرب :)
جلسنا فوق التنده والشمس تصفق فوق روسنا .. وأنا من قوة الشمس حسيت أن مخي يغلي كنه بريق فواح و هاله تقول وش هالحر أحس أني عطشت قلت لها لا تعطشين هالحين .. ما معنا لك مويه مقطرة ... وشكل هالسواق مافيه أمل يصب لك من موية الرديتر .. ناظرتني وهي حاقده وتقول وش قالولك سيارة عشان اشرب من الرديتر .. قلت أقول هاله نفسي اعرف شي .. قالت لي تفضل وشوا .. تنحنحت شوي ثمن قلت ... ودي أعرف يوم جابك أبوك ما قال لأمك ... ( ياليت مازال فيه شي أسمه وادي البنات ) .. لفت براسها وقالت أحسب عندك سالفه يا جلد النعامة

* * *

وحنا جالسين نسولف ونتناقش أظلمت علينا الدنيا .. وبدى البرد ينهش في أطرافنا .. وأنا جالس أتفرج عليها وهي متلفلفه في عباتها كنها بات مان .. قلت لها أقول هاله تذكرين يوم ولد خالك يروح للبقاله وجا بيطلب ( باونتي ) ونسى أسمه قاله عطني كاكاو محشي بسليق .. ضحكت وهي تقول بالله تذكر سالفة ولد عمك اللي أمتحن مدرس الجغرافيا كل شوي يسأله خط الأستواء فواتير والاسوى ( يقالك أنه مندمج مع الدرس ويبغى يفهم أكثر ) ابتسمت وقلت تذكرين ولد عمك مع فريق الأغبياء يوم جاب هدف تسلل ورفع حكم الرايه وألغى الهدف قام وعاند الحكم وطلع الحكم كرت أحمر وقال يطلع ( 11 ) قام طلع الفريق كله يحسبون الحكم يوم قال يطلع حدعش انه يطلع الفريق كله ... انسدحت ضحك وهي تقول على طاري الغباء تذكر يوم أنك حضرت سباق في نادي الفروسيه وكان السباق بين ( حصان ) و( حمار ) .. يوم فاز ( الحمار ) وجا التلفزيون تقابل معك وقالك كيف فاز ( الحمار ) .. قلت فاز ( الحمار ) لأنه على أرضه وبين جمهوره يقالك أنك ذكي وعارف الجواب .. تأففت وأنا أقولها على الأقل أحسن من اللي كانت تدرس وهي متحمسة وجت عند أبوها وقالت يبه جب لي مٌدرسه خصوصيه قالها إذا نجحتي جبت لك مدرسه يحسب المدرسة هدية نجاح ...
وحنا جالسين ننبش الماضي السحيق .. قال السواق ترى باقي على الميقات شي بسيط هو قال كذا على طول هاله وقفت من الفرحه وهي تصارخ يا سلام وصلنا ... كانت تصارخ والسيارة مسرعه وكبري الميقات يقرب شوي قمت أناظرها وأناظر في اللوحه اللي تقرب .. جيت أبقولها ترى فيه لوحه .. ما أمداني أقول شي إلا صافق وجها في اللوحة وتدربت وطاحت في الشارع وأنا دنقت على قزازة السواق وقلت وقف طاحت .. طاحت .. وقف السواق ونزل ومعه العصا وهو يقول وش القصة وش فيه .. توني أبقوله أن زوجتي طاحت على طول راح لها وقام يناظرها وجيت أبلحقه مسكني مصري يقول هو فيه إيه .. ايه اللي حصل القوازات عملة كبسه .. قلت لا عملة مرقوق كمل نومك جعله في وجهك اللي كنه فخذ نعامة .. قلت كلامي وتركته ورحت للسواق اللي لقيته يضرب هاله بالعصا وهي تتنهد ومغمي عليها ..
قلت وشفيك قال يا خوي اول مره اشوف خفاش بالحجم هذا .. قلت أخاف أنك مشبه هذا مهوب خفاش هذي زوجتي ... ناظرني بعين حاره .. ثمن قلت له وأنا مرتبك .. بس يخلق من الشبه أربعين .. وإذا انت مبسوط على الضرب وتحس أنك تمارس هوياتك فا ياليت تقوي شوي عشان نضمن أنك تقضي على المخلوق هذا .. وأنا أتكلم قامت هاله وهي تتأوه وتقول ما هقيت أنك ذروق يا دحيم .. خاف السواق وهو يقول .. بعد يتكلم .. هذا أكيد انه صنف نادر .. قالت هي أقول انت يا كيس الرز ... أنا زوجة دحيم اللي واقف جمبك
قالي وهو يتأسف معليش العتب على النظر والظلمه كانت شديدة
قامت وهي تتأهوه وتقول المشكلة مهوب في الظلمة المشكله في مخك هالثقيل اللي كنه شحم سيارات .. قم خلنا نركب عشان نوصل بسرعه .

* * * *

وصلنا الميقات ونزلوا الركاب كلهم و هاله تقول أسمع يا دحيم أنا أبروح أغتسل وألبس عشان الحج .. قلت .. أنا خلاص أجل أنا أبروح اشيش في القهوة .. ناظرتني بعين .. ثمن قلت تستهبلين يا هاله كلنا جايين عشان ( نحج ) وواقفين عند الميقات يعني انت بتغتسلين وأنا أبجلس افلي راس سواق الباص .. أكيد أبغتسل معك
قلت كلامي هذا ثمن قلت شوفي نتقابل هنا بعد نصف ساعة ..
راحت وهي مبسوطه أطامر كنها كنغر توه والد ... راقبتها الين اختفت ثمن رحت لدورة المياه .. ودخلت الدورة .. ثمن سمعت صوت بابين ينصكون جمبي عن اليمين واليسار ثمن سمعت المصري يكلم خويه يقول ( حمدي ) عاوز صابون .. يرد عليه ( حمدي ) أيوى يا ( حماده ) عاوز .. شوي ناظرت فوق لقيت الصابونه تطير من حمام لحمام شوي قال ( حمدي ) شكرا يا ( حماده ) أنت عاوز ليفه .. قال ( حماده ) أيوه عاوز .. شوي طارت الليفه وطاحت عندي .. وقال ( حمدي ) هاه وصلت .. قال ( حماده ) لا يا ( حمدي ) ما وصلتش .. قلت أنا طاحت عندي دقيقه يا ( حماده ) .. وأرمي عليه الليفة شوي سمعته يقول شكرا ...ثمن قال .. هو الأخ اللي في النص مين .. قلت انا محسوبك ( دحيم ) آداب .. قلت آداب وأنا ما أدري وش معناها اسمعهم يقولونها في أفلامهم .. قالي أعوذ بالله وقيت للحج عشان تِكَفر .. قلت يا عمي وش اكفر التكفير بيد لله سبحانه وتعالى مهوب لنا .. قال إيه اللي انت بتؤوله .. انا أأصد أنك قيي تغسل ذنوبك .. قلت وش اللي أغسل ذنوبي والله لو أني فاتح مغاسل وألا شايفني بطشتي جالس معك .. تصدق اللغة الفرنسيه أسهل من كلامك .. وش اللي أغسل حنا يا السعوديين معروفين التغسيل على حريمنا .. سكت شوي ثمن قال ( حمدي ) هو الأخ الحمار اللي في النص جنسه إيه .. رد عليه ( حمدي ) وقال والله ما أنا عارف بس باينته ( حمار ) ترعه
سبحنا وخلصنا .. وطلعت وجلست أنتظر هاله .. شوي حسيت أن فيه واحد مسك كتفي التفت وناظرت واحد لابس أحرام ومطلع كتفه ثمن قلت له أي خدمه يا الحبيب .. ضحك وقالي دحيم في ذمتك ما عرفتني .. قلت والله مشبه على الصوت كنه فصالة ركب مافيها صابونه .. قال أنا زوجتك هاله هي قالت هاله على طول فصخت أحرامي اللي على كفتي ورميته على وجها وغطيتها وهي تصارخ تقول ما يجوز تغطية الراس قلت .. نعنبو خيرك .. لابسه لبس رجال .. لا ومطلعه كتفك من زينه .. هاللي كله نفر كنه واحد مطشم عليه بقلم أحمر سايل .. قالت ليش مهوب كذا الحج أني البس كذا .. قلت لا الحرمه لبسها غير .. روحي شوفي الحريم وش لابسن وسوي زيهم بسرعه ...
راحت بسرعه .. وأنا جالس عند الباص .. شوي جا ( حمدي ) و ( حماده ) وكل واحد منهم يلبي .. وفي يده مصحف صغير .. وفي اليد الثانية عصار ( مرهم ) ووقفوا عندي قلت لهم صراحه لبسكم ناصع البياض... تنفعون في دعاية (( تايد )) .... قال متأرش .. أصل إحنا ما مبنستحماش إلا مره وحده مع ( الحج ) بس .. قلت وكثيرة بعد حاول أنك تقلل عشان ما تروح ألوان بشرتك .. وبعدين عندي سؤال اللي في يدك اليمين عرفته مصحف ،، بس اللي في يدك اليسار وشو .. ناظر فيه وهو يضحك وقالي .. دى .. أصل انت عارف (الحج ) .. فيه مشي كتير وعرء والحاجات دي بتسبب تفلخات وتزلغات في الفخدين .. قلت يعني مشق .. إيوه بلغيتكوا ( مشق ) .. دنت عليك كلام ..
توه بيكمل كلامه قال راعي الباص .. بسرعه تراكم عطلتونا .. اخلصوا .. قلت له يا الحبيب انتظر شوي .. بس عشر دقايق .. زوجتي بتغتسل وتجي ..
وأنا أتكلم جت هاله عليها عباة وصخه كنها ستارة مجلس في شقة مصاريا وتقطر مويه .. ناظرت فيها وقلت .. وش القصة وراك مليانه مويه فيه أحد ما عجبة شكلك وغرقك في النافورة .. قالت لا والله يا ادحيم بس زلقت في الحمام وتعلقت في الدش وأنكسر في يدي وقامت المويه تطلع منه كأني جالسه جمب نافورة الملك فهد اللي في جدة ..
وهي تتكلم طمر السواق وقال : أمشي خلاص .. وهو قال كذا على طول رقينا فوق تندة الباص .. كأن حنا إيرانيين ، وانسدحت على ظهري وهي تقول دحيم قم لبي .. لبي .. قلت جالس ألبي بصوت خفيف قالت ما ينفع ردد وراي بصوت عالي ... رفعت راسي لها وأنا أقول ليش أردد وراك والله لو أني كورال عشان أردد وراك .. من زين صوتك وبعدين ترى على فكرة بدعه اللي يرددون مع بعض .. قالت بالله عليك دحيم فقهني دينيا ترى مخي لك عليه في الأمور الدينيه .. قلت وأنا أضحك بس في الأمور الدينيه لك عليه .. أسمحيلي في كل الأمور .. أنا أتوقع أنك تسمعين بشي أسمه ذكاء .. وأنا متأكد أن الذكاء لو جا يوم بيدخل مخك عشان يتحد معه ويلقى حل لأي مشكلة تواجهك .. أتوقع أنه بيحط ورقة لمخك ويكتب فيها (( حضرنا ولم نجدكم )) .. مع أحترامي لك يا هاله راسك عبارة عن كورة بولنق بس ناقصها خفوس
ابتسمت وهي تقول والله يا دحيم هذا أنتم يا الرجاجيل ما عرفنا نرضيكم
أن فكرنا قلتوا ليش تفكرون .. وأن حطينا ميك أب قلتوا ليش تحطون .. وأن لبسنا لبس البيت قلتوا ليش ما تتزينون .. والله أحترنا معكم .... !!
ناظرت فيها وأنا مستغرب وقلت من اللي أحترتوا معنا .. قالت حنا يا الحريم .. ناظرت زياده في وجها وهي تتكلم .. وقلت بكل برود .. بالله لا تنسبين نفسك للجنس الناعم ثاني مره.. انت برادة حديد .. أنت سيارة ماخذينها للتشليح ودبت فيها الحياة في الطريق وصرتي إنسانه .. أنت كارثه نوويه .. أنت عجوز معطينها حبة (( فياقرا )) ورجعت شباب .. أنت عبارة عن قبر فيه جمجمة زرعت على جسم قرد .. أنت ...
صرخت في وجهي وهي تقول .. بس خلاص .. خلاص راع مشاعري حرام عليك كل مره تحسسني أني مو من الأرض .. أني حيوان ضال ...أو أني مخلوقة فضائيه...
قاطتعها بكل برود وأنا أقول ليش أحسسك .. هذا الواقع
ناظرتني وهي تصيح حرام عليك .. حرام عليك ..
وهي تبكي حطت وجها بين يديها وجلست تصيح ... ناظرت فيها بلا مبالات وقلت .. هالحين على بالك بتسوين ( فاتن حمامه ) وقسم بالله ما ركب الدور على وجهك اللي كنه منشفة بنقالي يمسح فيها مكاتب البلديه
توها بتتكلم .. قال السواق ترى وصلنا ... مسحت عيونها بطرف العباة اللي انقلب لونها من أسود إلى أبيض .. قلت وجع وش هالدموع اسيد بطاريه .. قالت والله يا ( دحيم ) قلبي ما يطاوعني أني ادعي عليك في الحرم ... وإلا كان فتحت صدري وجلست أدعي عليك ... قلت انتبهي تفتحين صدرك يشوفونه ناط كنه صحون شوربة مقلوبه

* * * *

وقف الباص .. ونزلت العماله كلها .. وهم يصايحون وصلنا بالسلامه .. شوي نزلت أنا و هاله وقلت لراعي الباص .. بالله تعرف وين حملة ( أم لهيمان ) .. قالي راعي الباص .. والله هالحملة قريبه من المكانا هذا
هو قال كلامه وعلى طول أخذنا معه ورحنا للحملة .. ووقف الباص وقال هذي هي الحملة .. نزلنا أنا و هاله وناظرت في الحملة وقلت يا الأخو أنا أبي ( حملة أم لهيمان ) مهوب المبرة وإلا المجاعه . .. قالت هاله بالله وش هالحملة .. الكل ماسك صحنه وجالس برى وإلا هذاك اللي فارش فراشه ونايم وست مية ذبانه على وجهه كنه منحله .. بالله دحيم هذي الحملة اللي يقول حجزت لكم فيها خويك .. وين الفخامه ووين اللي يقوله لك .. هذا شغل حقين الحملات تقرى إعلاناتهم تقول حنا في فندق خمس نجوم .. وأن رحت يعطونك على برتقاله .. وتفاحه .. وكاس مويه طول فترة الحج ... ويا ويلك أن تكلمت ..
قاطعها حق الباص وهو معصب .. خلاص فكوني ترى متحمل وجيهكم من يوم طلعت من الرياض ... خلاص معد أقدر ، طول الخط ما أكلت شي أخاف استفرغ والسبة حبوب الشباب اللي في وجيهكم من شافها قال طلوع في رقبة خروف
قال كلامه وراح وخلانا .. وأنا و هاله واقفين قدام باب الحملة .. شوي قلت لـ هاله خلينا ندخل خلاص طاح الفاس في الراس .. دخلنا وشفنا أشكال .. وألوان حسيت في لحظة أني داخل معتقل وناس معذبة وأنا أمشي بين الناس توقعت أن يطيح واحد علي ويمسك في رجلي وهو يصيح تكفى ساعدني . . وجمبي هاله تقول وش هالقرف .. وععع .. التفت عليها وقلت يعني أنت هلحين في الرياض ساكنه في قصر .. صدقيني هالمكان أفخم من بيت أهلك اللي كنه عشة دجاجة مطلقة
توها بتصارخ .. إلا قطع كلامها واحد كبير كنه واجة عمارة المملكة من الجهة الجنوبيه يقول عفوا .. وش أساميكم قلت أنا دحيم وهذي زوجتي هاله قام يناظر في أرواق في يده وقال إيه أساميكم مسجلة معنا روحوا شفوا لكم مكان تنامون فيه .. قلت طيب وين قسم النساء .. قال الأخ داخل قصر أفراح وإلا ملاهي الخيمة ... ترى أنت في ( حج ) يعني مافيه الأمور هذي عندنا خليطي .. كل واحد ينام جمب زوجته .. قلت طيب أنا أشوف اللي هنا كلهم رجال .. قال من قالك اكثرهم حريم ... تلفت يمين ويسار .. وأشوف أشناب .. ثمن قلت يا طويل العمر أنا كل شي فيني خربان إلا النظر أشوف زين وكل اللي هنا أشناب .. قالي ما قد شفت حريم مسترجلات .. هو قال كذا على طول ناظرت اللي جمبي .. وقلت وش هالحظ اللي أنا فيه جاي فوق تندة باص طول الطريق ، واتفاجأ بحملة مخيسة وزوجه مخيسة وحتى الوجيه اللي في الحمله مخيسة .. واللي يكلمني هالحين أخيس منهم كلهم .. ناظرني شوي ثمن قال .. يا الله ترى بنأدي مناسك ( الحج ) رجليه عشان الباصات اللي معنا البنزين اللي فيها يا الله يكفينا للرجعه للرياض
هو قال كذا بغى يغمي علي ... إذا أبسط الأمور كذا أجل كيف الأكل شكله قطه
قالي : شف يا الحبيب إذا مو عاجبك شف لك مكان ثاني .. قلت لا عاجبني ... قال شف الأكل هنا وجبة وحدة ، المويه من الخزان حق الحمله ، الحمام مافيه إلا اثنين واحد للحريم و الثاني للرجال .. ولازم تمسك سرى كل ما تجي بدري تخلص بدري .. قلت له هذا مثل اللي يقول نام بدري عشان تصحى بدري .. ناظرني بطرف عين حاره .. قلت يا الحبيب انتبه عينك حمراء .. قال أقول أمشو من قدامي .. قلت ما نقدر نمشي أخاف المرور يعطينا قسيمه .. قال ليش قلت صعبة نمشي وعينك حمراء على الأقل خلها تقلب خضراء عشان نقدر نمشي .. خلصت كلامي شوي رفع يده ومسكني مع العلبة وقالي أقول رح أنت وفك هالحصان اللي حاطه في وجهك :)

* * * *

رحت أنا و هاله أقرب زاويه وتكومنا فيها .. كأن حنا شعب منفي على الحدود .. وجلست أقول وش النكبه اللي طحنا فيها يا هاله شوفي أشكال اللي هنا وأحلبي لبن .. قالت إيه والله يا دحيم أشكالهم غريبه .. كني جالسه في مغسلة سيارات ...شف كيف ياكلون بالله هذا أكل الحملة خبز ومويه ... وشف الفرش كنك جالس في غرفة شغاله معقوله هذي حملة راقية شكله أنصب علينا ... قاطعتها وأنا أقول هاله اللي صار صار خلينا في الواقع هالحين أنا عندي خطة ... قالت وشي قلت أنا .. بيني وبينك .. صعبة ننام كلنا في وقت واحد .. لازم واحد ينام والثاني يجلس حراسه .. الين يصحى الأول .. قالت لي خلاص أبنام أنا وخلك ملاكي الحارس .. قلت لا تثقين فيني أحتمال أسلمك لهم أول ما تغمضين عيونك لأني متأكد وواثق محد راح يقبل فيك لو أحط عليك ألماس وياقوت
جلسنا نسولف أنا وياها .. الين طلعت الشمس وحنا صاحين .. شوي قال منسق الحملة يا الله بنروح لـ ( منى ) عشان وقت المبيت قلنا يا الله
رحت أنا و هاله مشي الين حسيت أن رجلي صارت كنها كليجا من كثر ما مشيت فرشت ولا فرشة كفرات مرسدس ... و هاله تصارخ خلاص توبه معد أقدر أمشي تكفى يا دحيم )خلنا نرمي الجمرات .. ونرتاح قلت يا هاله زحمه هالحين وقت الذروة . :) . العالم متكومين فوق بعض كنهم سمك سلمون توه مصيود ... قالت ما علي منك أبي أخلص رجلي معد تشيلني ... قلت يا الله مشينا

رحنا ورقينا فوق وبشق الأنفس وصلنا للجمرات .. ومعنا الحصى .. و قدمت هاله قدام وصارت على الجدار حق الجمرات وجلست ترجم وهي تقول أعوذ بالله من الشيطان الرجيم .. وأنا أرد الناس عنها عشان ما يلزقون فيها وهي ترجم كان فيه (( يماني )) في الجهه المقابلة .. معه بلكه ( حصاة كبيرة ) رفع يده بكل قوته وقال بسم الله والله أكبر .. رمى البلكه وجت بكل قوتها في وجه هاله أللي أول ما ضربت في وجها على طول داخت وطاحت جوى المرجم ..
أول ما طاحت صرخت مصريه بأعلى صوتها وهي تأشر ( الشيطان طلع يا جدعان ) هي قالت كذا على طول الكل شمر عن ساعديه وقام يرمي الحصى اللي في يده واللي قام يرمي زنوباته .. و هاله تصارخ والله مهوب انا الشيطان .. وفيه مصري من بعيد رمى سطل بويه .. وهو يصارخ يا بن الكلب أنت اللي فرأت بيني وبين مراتي .. و هاله تصارخ وش يعرفني في حرمتك انت الثاني .. وأنا أقول يا جماعه اذكروا الله هدوا .. وأنا أتكلم تحركت قوات الأمن وطوقوا المنطقة وأبعدوا الحجاج عن الجمرات وجت سيارة الأسعاف وشالوها وركبت أنا معها وأنا أناظر فيها وكل وجها مورم كنها مدخلته في خلية نحل .. والأكسجين على وجها وهي تقول دحيم أبقولك وصيتي .. قلت أنا مهوب لازم أسكتي بس
قالت تدري أني معد أحس بعضام جسمي .. أحس أني صرت ذرة .. بالله تكفى خلنا نرجع معد أحس بأي حاجة .. قلت لها والله تبين الصراحه .. لا تلومين الناس يوم يرجمون .. أنا نفسي يوم التفت على صرخة المصرية .. وشفتك ما عرفتك صدقتها وقمت ارجم معهم ألين سمعت صوتك ... قاطعتني وهي تقول كنت عارفه أنك جالس ترجم معهم .. قلت كيف عرفتي .. قالت من ( القبقاب ) اللي انت لابسه يا غوار الطوشي .. هو اللي شق حاجبي .. نزلت راسي وقلت والله يا ( هاله ) أنت لو شفتي وجهك في المرايه هذيك اللحظة ما تفرقين بينك وبين الشيطان .. قاطعتني وقالت نعنبوا خيرك شايف الشيطان انت عشان تقول ما تفرقين
قلت والله ما شفته لكن أسمع انه شين وقلت مافيه أحد أشين منك على وجه الأرض
ابتسمت وهي تقول والله أنك رايق لكن شف أبقولك شي أبي أرجع للرياض
قلت ليش والحمله .. قالت لا تجيب لي طاريها تراني كارهتها وأول ما أرجع ذكرني أكتب خطاب شكوى لوزارة ( الحج ) عليهم .. بصراحه حرام هذا غش وسرقة أموال توهم الحاج انه عندك خدمات وعندك أمور حلوه وآخر شي ما يطلع عندك شي .. وثاني شي الحكومة ما قصرت في وضع الخدمات في ( الحج ) وفي تكريس كل موظفين القطاعات من البلديه في النظافه ، ووزارة الشؤون الإسلاميه في الفتاوي وتوجيه الناس ، والكشافة في الوقوف مع ( الحجاج ) وإرشادهم .. يعني حرام على أخر شي يجون هالحملات ويخربون هالخدمات بعنجهيتهم وسلبهم وخصوصا حقين الجاليات اللي يتعهدون بأنهم يرعون هالمسلمين اللي جايين من أقصى العالم عشان يأدون مناسك ( الحج ) ويشوفون هالتخبط اللي صاير وهالحوسه ويتركونهم في ديرة ما يعرفون فيها شي بعد ما ياخذون فلوسهم .. لدرجة أن المسلمين الغير عرب لما يجون للحج يفكرون ألف مره أنهم يتركون الإسلام والسبب عدم مصداقية الحملات ويفكرون أن الإسلام كله كذب وخداع ونصب .. وحب المال فقط !!
سكت شوي وقلت والله يا هاله أول مره اسمع منك حكمة صح ... هذي الحكمة تخليني أغير رايي في عقليتك .. وتخليني احترمك .. :)
قلت كلامي هذا وأنا أقول في نفسي ... للدرجة هذي الفلوس خلت الواحد ينعمي
ويتلاعب في مشاعر الناس ويستغل حبهم للعبادة والتنازل عن كل شي في سبيل تأدية فريضة من فرائض الإسلام ويطلب منهم دم قلوبهم وهو عارف انهم بيعطونة
!!
وين الناس من الله معد فيه خوف معد فيه قلوب
كيف يتهنون بهالفلوس اللي أخذوها بالنصب والاحتيال بدون ما يتعبون في شي
وأكيد دامهم كذبوا على اللي جايين عبادة أكيد انهم لعبوا على اللي يشتغلون معهم واللي تاركين أهلهم ومتغربين عشان لقمة العيش ... لكن ما نقول إلا

حسبي الله عليهم

( النـــهــــــايــــــه )







 

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 08:18 PM


Powered by vBulletin® Copyright ©2000 - 2024, Jelsoft Enterprises Ltd.
تعريب :عاصمة الربيع

تصميم وتطوير سفن ستارز لخدمات الاستضافة والتصميم