قصيده اعجبتني فأحببت نقلها اليكم,,,,,,,,,,,
الله امر بالوصل من بين الاقراب
وحنا بوقت زايد بالقطيعه
وانا من اللي شفت بالحيل منصاب
وضاقت علي الارض لو هي وسيعه
يابوي انا من صدتك عارضي شاب
وحطيت في كبدي جروح شنيعه
ماغير اهوجس مثل منهار الاعصاب
ان اشهد ان صدتك عني وجيعه
ولا لقيت لها تفاسير واسباب
ومعاتبتك محرمه في الشريعه
شفت المهونه من شباب وشياب
وانا عن الحقران نفسي رفيعه
لاني بسربوت ولاني بكذاب
ولاني من الانذال شريه وبيعه
يابوي افك الباب وتسكر الباب
وخصيتني يابوي في ذا الطبيعه
حتى اصغر الاخوان كشر لي الناب
ماكني الا بايق لي وديعه
ولااحد خذالي شور في كل الانساب
يالله دخيلك من حياه القطيعه
ويوم العزايم يايبه صرتو احزاب
احدن نصى جده واحد في البديعه
لكن نبي جمع القرايب والاحباب
قدام كل يغلق الموت ريعه
صارو اخواني عند ورعاني اغراب
شي يولع في ضميري وليعه
اذا سالوني يغرق الدمع الاهداب
يالله عسى من لامني للفجيعه
يونس على كبده مثل عضه الداب
وارحم عياله لا امر مايطيعه
يابوي طيرك له جناح ومخلاب
يحط في ربد الحباري وقيعه
ماهو بحق انك تحطه بسرداب
وتحمله من فوق مايستطيعه
حطه على يمناك وتشوف الاعجاب
وابشر بطلعاته مع اهل الطليعه
العرض العادي
