إهداء من الشاعر محمد بن فهد الوجعان الى الأخ الفاضل الشيخ / ندا بن خلف الدويهم
مع جل الإحترام والتقدير
سلام ياوجه السعد دمت محشوم
وسلام ياراس ملته النعاره
ياللي جميله مالك راسي اليوم
إسمه زبون النادرات بجداره
ندا الدويهم ياغدا للزمن حوم
شيخ زهت لاسمه طروق الاماره
شيخ ليامن قلت يامقدم القوم
تسابقت لك كبرياه ووقاره
أبلج عرب ماشوفته شوفت رخوم
حر على الشم الشوامخ قراره
طحطيح قوم نادر الفعل صيروم
عوق السمين اللي عريض فقاره
شيخ نزيه النفس عن كل ثالوم
بليهان يامن السنين استداره
عن واجبه ماقط سلهم ولايوم
يكفيك عن طول السوالف قصاره
اليا لفاه العلم ياصارت علوم
لاصد عنك ولا حسب للخساره
يفرح ليامنك نصيته بملزوم
ويزعل ولو تشر لمدحه باشاره
ترفع له البيضا على كل مزموم
اللي مسار اهل المعالي مساره
مدهل مداغيش النشاما على الدوم
كل ابلج قرم طوال شباره
في مجلس يجلا عنا كل مهموم
ودلال رسلان جديد بهاره
يا بارك الهمال ريضان وحزوم
يتبع هوى صفر ترزم عشاره
صفر تغيض كبود وتضيع هموم
ماجمعه من سوق راع التجاره
ورث لبوه ولاخلط وسمه وسوم
يرعا بها روض جديد خضاره
تزهاك ياطير السعد مبعد الحوم
ومن لافعل مثلك فذوده خساره
ياعل من جابك عن النار معصوم
وعسى يمينك من زمانك مجاره
لافعال مثلك يقعد المدح ويقوم
وقول بلا برهان مابه نماره
لو قيل يااهل الطيب من يفرق السوم
عزالله انك ياندا بالصداره
الشاعر/ محمد بن فهد الوجعان