السلام عليكم ورحمة الله وبركاته ..
اسعد الله أوقاتكم بكل خير وسعادة ..
يسعدني ويشرفني ان اضع بين ايديكم محاورة بين الأخ / سعد بطيان العازمي .. وأخوكم / متعب عبدالله الشعباني
بدأ الاخ / سعد بطيان العازمي بهذه القصيدة ..
الرائعه والأكثر من رائعه فهذا ليس بغريب عليه ..
وشفيك يامتعب تجر المواويل = ياشوق عذرن ماتدانى الشريده
قبلك انا بالحب شفت البهاذيل = من حب ريمن في هواها عنيده
ماني مزيّنها بكثر الطهابيل = لك موقفن بالطيب كلّن يشيده
اقسم بربّن داحرن ابره الفيل = واللي خلق خلقه ويرزق عبيده
ان تاخذه مادار دور المقابيل = مدام دمّي جارين في وريده
تامر وانالك ريف مثل المخاييل = هذا كلامن جد ماهومكيده
شرواك نازن له ونوفي المكاييل = وناقف مواقف بالوفا له سديده
نسعى على عرف الرجال المشاكيل = اللي لهم بالطيب وقفه رشيده
انااشهد انك من رجالن حلاحيل = والله ماتوفيك حقّك قصيده
يامتعب امثالك يقدم لها الهيل = والحيل بصحونن كبارن ركيده
والعود الازرق قبل مد الفناجيل = نقدمه لمثالكم يالوليده
وصلاة ربي عد وبل المخاييل = على نبين قادنا للعقيده
صح الله لسانك يالاخ / سعد بطيان العازمي ..
وهذا ردي المتواضع على هذه القيصدة .. إليكم الرد اتمنى أن ينال اعجابكم ..
يامرحبا ترحيبة البدو بالسيل = براع المعاني والبيوت الفريدة
من قلب مايرضى ولا ينقص الكيل = وافي بلين الوقت وإلا شديدة
بالشاعر اللي كل شعره تهاويل = مطـوعّ القـيفـان فـي ما يـريـدة
إليا تغنى جاب حلو التماثيـل = قصـايدة للـنـاس دايـم مـفيــدة
شاعر كفو مايلتفت للمحاصيل = حر(ن) قطامي يعجبك في هديدة
من روس قوم يحتمون المداهيل = نيـرانـهم دايـم سنــاهـا وقـيــدة
لا تلوم متعب يوم جر المواويل = أخَير من شوف القلوب البليدة
والله مافكر بكـثـر الغـرابـيـل = ولا اتشفـق للحـياة الســعيدة
انا هواوي والهواوي مع الليل = ياخذ ويعطي باللحون الجديدة
وأغيّر التفكير وأحط واشيل = وآخذ مع التفكير لحظه زهيدة
ياكثر ما اسامر معا نجمة سهيل = لونـها بـعـض المـواجـع تـزيـده
والله على شوفة سعد بالمقابيل = راع الخصال النادرة والمجيدة
كم واحد(ن) ودة معه بالتعاليل = لنه كفـو والـكـفو كـلـن يـردة
وصلاة ربي عد ما تصهل الخيل = على النبي راع الخصال الحميدة
* ملاحظة للإدارة :-
الاخ سعد بطيان قام بتسجيل عضوية لدينا هنا بهذا المنتدى الكبيـر وتم قبول التسجيل ولكنه لا يسطيع الدخول بعضويته نأمل من الإدارة سرعة حل هذا الخلل .. ربما يكون من الرقم السري او بإسم العضو ..
تحياتي للأخ / سعد بطيان العازمي ...
تحياتي للجميع ..][~
أخوكم / متــ ع ــــب الشــ ع ـــبــانــي
محاورة شعرية بين الأخ سعد بطيان العازمي وبين اخوكم متعب الشعباني
العرض العادي
