[poem=font="Simplified Arabic,4,black,bold,normal" bkcolor="transparent" bkimage="" border="solid,4,black" type=0 line=0 align=center use=ex num="0,black"]
ياطول صبري عليه ومطول المده = والنفس مابين ماموره ومنهيَه
الحب والشوق والضيقات والصده = حطت على وجهي المقبول ماريَه
احدن زهاله سواد الخال في خده = واحدن بخده من هموم الدهر كيَه
يقفي به الشك صوب اللوم ويرده = واذا رجع مالقا الا رسم اثاريَه
وتزيد به ضيقة العشاق وتهده = ويبكي على حاجة ماهي بمبكيَه
يزل واقول يمكن ماهو بوده = غلطة ويمكن على ماقيل عفويَه
حتى ولو قالها قاصد ومن جده = يشفع لحاضر غرامه زين ماضيَه
اعشقه واشتاق له واهواه واوده = ومن الغلى نسبة المليون في الميَه
ألد عيني لكن ماهي بمنلده = هو اول الحب في عيني وتاليَه
واغر قلبي على النسيان وآحده = لا شك عيا من النسيان مو ليَه
عزي لحالن على فرقاه منحده = وعزي لقلبن لا من حل طاريَه
يتوق توق الوحش في كف من هده = لا طار مالد عينه صوب راعيَه
ياشين فرقا اللذي تغليه وتوده = لا صار حين ولا تقدر على جيَه
ياجعل ربي يصبرني على الشده = لين مايجتمع غالي وغاليَه
لو طال صبري عليه وطالت المده = ياحي شوفه قبل لاموت ياحيَه [/poem]
العرض العادي
