اتصل بادارة الموقع البحث   التسجيل الرئيسية

 


العودة   منتديات عاصمة الربيع > القسم الادبي > القصــه والقصيــده

القصــه والقصيــده قصص الماضي وحكايات الحاضر

 
 
أدوات الموضوع انواع عرض الموضوع
قديم 18-03-12, 09:43 PM   رقم المشاركة : 1
الرسن
العضوية الماسية
الملف الشخصي






 
الحالة
الرسن غير متواجد حالياً

 


 

قصة الغريب وبنات البدو

غريب وبنات البدو
كان ياماكان في قديم الزمان قبل شهر <<<والله من زين الحكي
كنت طالع للبر ومعاي عزبتي مركبها في صندوق الشاص
ومفلل بنزين وماسك الخط رايح للبر
وانا كافخ بالشاص ومشغل شريط شعر ومحاورات ورابط العمامه على راسي والثوب لونه بني
وحاط القربه على صدام الموتر
الا اشوف هذيك الارض اللي مربعه والخضار ولا احلى منه جايها مطر وش زينه
واهدي السرعه واطلع على البر وادخل مسافه 10 كيلو بر
والا الاقي هاك الابل حوالي 100 راس<<<<<يسابها غنم 100 راس ههههههه كلها نوق ومعهم هذاك الفحل اللي يروع
واشوف بين الابل هذاك الراعي من بعيد واقرب يمه
قلت له :ياغليم <<< مسوي بدوي خخخخ
جاني يدربي راسه الا هو بنقالي مايدري وش الطبخة
قلت له صديق فيه حليب ؟؟!!
قال لي : انا مافيه معلوم
قلت : لاحول الله وش ذا البلشه طيب فيه ميلك << صح ياللغة هعععع
قام يهز راسه ولاهو داري وين الله حاطه فيه
المهم حوم سبدي ثور مايدري وين الله حاطه فيه وخلاقينه مشهبه شكل له شهرين ماغسلها خخ
وريحة الابط حدث ولا حرج
المهم واشوف هذاك الجيب اللي جايني كاافخ وناصيني نفس موتري بس لونه يختلف
قلت عزالله رحت فيها خخخخخخ <<< خفت
والا وهو مقبل علي
واطالع الا ذيك البدويه اللي تطرح الطير من السماء ومعاااها اختها توهم بنات بين 20 الى 25 مايتعدون
قالت لي : ارحب
قلت لها : يالغاليه ماعندكم حليب نيااق
اللي الكلام هذا وقت العصر
قالت لي : والله ان كانك تنتظر الى مسيان ابشر بعزك
قلت لها ابشري
قالت تقهو ممعنا دارنا عنا جنوب
قلت لها تم <<< يخطط
وانا اللي الحقهم بالشاص
ونمشي شوي الا هاك بيت الشعر وجنبه وايت ماء
ونقبل يم بيت الشعر وتوقف السياره
وقالت لي اقلط حيااك الله
وانا اللي اجي على وجهي
اثاري البنات مالبسوا الا براقع هعععع
وانا اللي اقلط عندهم
اثاري ماعندهم ولا رجال يؤ مافيه الا هالبنتين
قالت لي ابوي رايح للديره يجيب اغراض هو مع امنا
وما فيه الا انا واختي وضحى
قلت لها الدار عامره بوجودكم
واجلس في وسط الخيمة
وتروح يم المشب وتولع النار وتزهب القهوه
وتجي وضحى الا هي الصغيره
اقبلت يمي وما تشوفون الا غريب انهبل من جمالها عيون وجسم وشعر وهذيك الحنه اللي على اليدين والرجلين مزخرفتها
ومعهاا طوفريه فيها تمر وتحطها قدامي وتطالعني وتضحك <<< اول مره تشوف حضري خخخخ
وتروح يم اختهاا وتجيب القهوه وتعطيني الفنجال واشرب من هذيك القهوه اللي تفتح النفس لانها طبعا من وضحى خخخخخخ
واتقهوه
واقول لها ليه ماصبيتي لنفسك انتي واختك
قالت انت ضيفنا ولازم نكرمك
والله واشرب الفنجال الاول والثاني والثالث وقلت لها بس كرمتي
قالت لي وضحى وش عند هنياا :
قلت لها والله جاي اشوف الربيع واكشت في البر
قالت لي معك ربع ؟؟
قلت لها لاوالله احب اكون لحالي
سألتني عن اسمي وقلت لها اسمي غريب قلت هذا اسمك او وشو
قلت لها ايه اسمي << نصااب
قالت لي اسمك حلو <<< البنت خقت معي
قلت لها :
غريب الدار ومناي التسلي ... اسلي خاطري عن حب خلي
سمعت الشور من قاصر ما اعرفه ... يحسب البعد عن داره يسلي
قالت صح لسانك
قلتها عاشت اياامك خخخخخخخخ <<< قام يخنبق بالكلام
وضحكت وقامت يم اختهاا وجلسو يتكلمون مع بعضهم بدون ما اسمع
انا قلت شكلهن ذولا بيسوون لي شي الله يستر
وتطقني ام الركب
وشوي الا وجايه وضحى ويا اختها يمي ومعهم الشاهي
ويصبون لي هذاك الشهي اللي لونه اسووووود من كثر ما طبخ
وجلسن معي
وقالت لي اخت وضحى : انت من وين ياغريب
قلت لها من ديار المسلمين
<<< مايبي يعلم خايف يقول الرياض وبيقولون انه حضري رايح فيها
وجلست تسولف لي عن الربيع اللي حولهم قالت لي فيه فيضه تبعد عن هنا زين ربيعها وفيها شعيب ماشي والارض مربعه هنااك
قلت لها زين وينه موقعه بالضبط
تقول اتجه شمال وان جاك رجم اسود خله على يمناك واتجه غرب <<< ابو الشباب مايعرف شمال من جنوب خخخخخخ
قلت زين ابروح اجل ابكشت هناك
والله واقوم واقول لهم اكرمكم الله واطلع من بيت الشعر واروح اركب الجيب الاووضحى جايه مقبله لي ومعهاا طاسه <<< الطاسه هي عباره عن غضاره << يقالكم الحين وضح
الا وفيها حليب قالت هذا اللي انت طلبته
انا ابشركم نااسي الحليب لاني ضايع مع وضحى
وتعطينيااه واخذه واحطه في بريق معي واقول لها تسلمين يالغاليه
انا قلتها ولا ماقلتها البنت انهبلت معي خخخخخ << شكلها اول مره تسمع كلام حلو
واطالع في عيونها نوع من الابتساامه والحرج
والله واشغل السياره وانا اطالعها وابتسم لها وامشي بالموتر
وادور البوصله خخخخخ ما ابيهم يشوفون ابشوف وين الشمال معه
والله وامشي بسفره المغاريب الشمس غابت والظلام بدء يطلع
واتجه يم الرجم اللي قالت لي عنه اخت وضحى
وامشي شوي الا واشوف هذاك الشعيب اللي يحبه قلبكم وهذاك الربيع مشاء الله زين للحين ماجاه احد من البدو ويسرح حلاله عليه
وادور لي هذاك المكان اللي ارضه مستويه وارضيته مهيب طين
واوقف الشاص وانزل عزبتي
واطق رواقي وابرح لمكان شبه النار
واجيب سمري واشب ناري واجهز معاميلي
وامشي على رجولي وادور لي قرقاص واجمع منه على قدي
وارجع يم موتري
واحط هذاك القرقاص في بريقي واخليه يطبخ شوي وازيده شوي زعفران وسكر
واجلس اتقهوة وتجي على بالي وضحى وجالس اتخيلها
البنت هذي صراحه دخلت قلبي وجننتني
بدت تلعب فيني الهواجيس
وجاني ابليس وقال لو انك ياغريب مشبكها او قلت لها تعالي يمي ومن ذا الشخاابيط
وتجي في باللي هذيك القصيدة اللي تقول
أنــا اقــول يــا سـتــار زل اول الـلـيـل ... تـعــدى اولـــه مـــا بـقــي الا قـلـيـلـه
تــرى اللـيـل مــا يصـلـح بلـيـا تعالـيـل .... تـعـالـيـل يــبــرن الـقـلــوب الـغـلـيـلـة
انا اللي جرى لي في حياتي غرابيل .... غـرابـيـل يــدعــن الـدقـاقــة جـلـيـلـة
الا ياعيـونـي هلـلـي الـدمـع بالحـيـل .... علـيـك القـصـيـرة ياعـيـونـي طـويـلـة
الا واعـنـاي مــن اللـيـالـي المقـابـيـل .... لـيـالـي عـلــى الـحـمـى تزيدالمـبـلـة
خذ القلب واودعنـي سـواة المهابيـل .... حسيـن النبـا اللـي نافـل كــل جيـلـه
ملكني هوى راعي العيون المضاليل ... وانـا مـن قبيلـة والغضـي مـن قبيـلـة
صغيـر النهـود اللـي سـواة الفناجيـل .... انـا ماذبحـنـي كــود ظـافـي الجديـلـة
نويت السفر يا الله عليـك التساهيـل .... ابمشـي وحالـي مـن فـراقـه عليـلـة
واتعوذ من الشيطان واقول الجماعة اكرموني وماقصروا وانا جالس اتغزل في بنتهم
والا اجلس ليلي واعوذ من الشيطان قالب راسي قلب
وانا من قصيده لقصيده
وجت على باللي بعد قصيده ثانية وانا جالس اطالع الشعيب
طبعا اتغزل في وضحى مع نفسي
واقول:
البارحـة ليـلـي عـسـى الله يـعـوده ... يازين وصل الليل مـن بيـن الأحبـاب
جيت الحبيب اللي وفت لي وعوده ....مـاصـار لــى منـبـوز الارداف كــذاب
والـى مكانـه خالـي مــن iiحـسـوده .... بـدا التحيـة لـي علـى هجـة الـبـاب
خليـت بــه يــوم الـزواهـر iiشـهـوده .... فـي ساعـة عنـا هـل الشـر غـيـاب
عنـده الـيـن الصـبـح بـانـت iiعـمـوده .... نادى المصلي بالجماعـة iiوالاجنـاب
خلي على راعي الهوى وش كوده .... عليه من هرج العرب ستر iiوحجـاب
شوفـه دواي وعلتـي مـن iiصــدوده .... ودواه شوفي والمودة لهـا iiاسبـاب
الله يديـمـه لــي ويبـقـي iiسـعــوده .... والبيض عقبه لوصفن قلـت iiماانـاب
قـالـوا عشـيـرك يــا ولــد وش iiزوده .... وش نفله بالزيـن عـن تلـع iiالارقـاب
مـن قولـهـم تــو النـظـر بــه iiنـعـوده .... لقيت مابه شي من الشيـن ينعـاب
تسمـعـوا وصـفــه وهـــذا iiوجـــوده .... يـاطـا بـحـدب منـهـن الــروح iiتـنـذاب
والـسـاق دمـلـوج سـقـنـه iiمـــدوده .... فـي منبتـه مـا هـزعـه كــل iiهـبـاب
وانف قسم صافي خـدوده وسـوده .... وخرس بلا كحـل مضاليـل iiواهـداب
جـيــده ونـهــده محفـيـاتـه iiجـعــوده .... وغـــر منـاظـيـم عــذيــات iiوعــــذاب
لا طــول لا قـصـر بمشـيـه iiركـــوده .... لادق لا عــبـــج مـثـانـيــه ورغـــــاب
وتـالـي وصـوفـه ماحصيـنـا iiعــدوده .... لـلـقـلـب نــهــاب وبـالـنــاس iiلـعـابــا
الـشـف يـمــه كـــل خـيــط iiيـقــوده .... ويلـويـه عــن غـيـره لوالـيـب iiدولاب
هـنـي مــن مثـلـي لمثـلـه iiيـفــوده .... هـذا الوكـاد وكـثـرة الـهـرج مـاجـاب
ما دام جسمـي مالجـا فـي iiلحـوده .... ما انساه وهروجه عجاريف iiوعجاب
وصــلاة ربــي عــد مــا رزم iiرعــوده .... على النبي ما طقوا البـدو iiمنسـاب
واقوم من مكاني ابي اشغل نفسي في شي واروح اتمشى على رجولي وما حولي احد
ماغير اشم ريحه النفل والخزامى اللي تفتح النفس
والجو كان روعة والليل قمره
واروح يم الشعيب واجلس عنده شوي
وارجع لمكاني واجهز عزبه الطبخ واجلس اطبخ لحالي مامعي لاونيس ولارفيق يسليني
اسمع صوت سياره مقبله واطالع قلت في باللي شكلهم مكشاته
الا شوي الموتر يقرب يمي
واقوم واطالع وش السالفة الا بدوي جي لحاله
سلم علي وسلمت عليه
قال لي : والله ياخوك اني ضايع لي حوار ومالقيته ماشفته حولك
قلت له لا والله ماشفت شي لي حول الساعتين وانا هنا ماشفت شي
وقال لي ان كانك حولك ماء ابروي عطشي
قلت اقلط
ويجلس معي
واصلح القهوه واجيب له القربه علشان يشرب ماء
وجلسنا نتقهوه انا ويااه
يوم انه ارتوى الرجال وكرمته قام من مكاانه وقال ابستاذنك وابروح يم حلالي
قلت له الله يستر عليك
وروح الرجال
وجلست وقمت اطبخ عشاي وتعشيت والحمد لله
ضفيت عزبتي وغسلت مواعيني
واناظر الساعة الا هي الساعة 11 الليل
واجلس عند ناري ومعي ملقاطي جالس اواسي النار علشان تعلق
وفراشي جنبي اتحرى للنوم
وبدء النوم يجيني وافرش فراشي وانسدح واتعوذ من الشيطان واقرى المعوذات وايه الكرسي
وشوي الا غفاني النوم ابي انام علشان اصحى من الفجر
والله واناام هذيك النومه اللي يوم قمت اني انشط مني ماتلقون
واصحى من النوم
واقوم اشب ناري واطالع اغراضي اشوف يمين يسار يمكن منسرق مني شي الواحد لازم يكون حريص
الا واشوف اثار رجلين يمين يسار واطالع فيها
الا رجلين واحد حافي وفيه جره موتر غريبه في جهه ثانيه مو نفس الجهه اللي جاني فيه البدوي
واطالع جره موتر البدوي وجره الموتر الثاني تختلف قلت يمكن انها قديمه لاني ماشفت شي اول ماجيت المكان
وارجع لمكاني واولع النار وانزل معاميلي واصلح لي قهوه الصبح
واقوم للشعيب غسلت وجهي وتوضيت وصليت الفجر
واجلس اتقهوة واطالع الشعيب والربيع اللي يفتح النفس
واناظر الرعيان وهم يرعون غنمهم واللي يرعى ابله
كلن لاهي في حلاله
المهم غربت الشمس وجالست وصلحت عشاي وتعشيت وتقهويت ونمت على الساعة 10
واناام
يوم جاء الليل على الساعة حوالي 12
الا شوي اسمع صوت حس واقوم واطالع يمين يسار ما اشوف شي من الظلام
قلت اكيد انها وساويس
الا شوي احد يصقع على موتري
خفت واقوم من مكااني وانااظر الا من اللي قدامي
وضحى
انا ماعاد ادري وين الله حاطني فيه
انهبلت مانيب مصدق
الا وتجي وتسلم علي
وتقول لي وش مسوي للحين جالس لحالك
قلت لها وش اسوي اتونس مع نفسي
وجلست معي وانا فاق خشتي منيب مصدق هو حلم او وش الطبخه
قالت لي ماودك تصب لي قهوه
عاد انا حاط القهوة جنب النار والنار للحين والعه والقهوه حاره جت في وقتها
واصب لها فنجال
وتجلس تسولف معي
وتقول لي كيف الربيع وكيف الجو هنا
قلت الحمد لله زين ولا ازين منه ا لاوجودك فيه
قالت لي تصدق ياغريب كل ما بغيت انام ماتجي الا في بالي واتذكر بيت الشعر اللي قلته امس اضحك واستانس وافكر فيك طول ليلي
انا ماعاد ادري وين الله حاطني فيه
وقالت لي والله من شفتك وانا ارتحت لك
<<<< ابو الشباب ماعاد يدري وين الله حاطه فيه
شوي قربت يمي واغمظ عيوني وتبوسني مع خدي
مدري وشلون فتحت عيوني الا والله بعير قدامي وخشته عند خشتي
<<<<<<< ابو الشباب جالس يحلم خخخخخخخخخخ واثاري البعير شكله هو اللي بايسني
وتقفل اخلاقي وامسك هذا البعير واشوته
المهم قضيت لي ليلتين وانا كل ماجاء الليل مايجي في باللي الا (وضحى) اجلس اهوجس فيها
واتذكر ضحكتها اللي تفتح النفس وحلمي فيها واتذكر البعير واضحك على نفسي حتى في الحلم ماتهنيت
ويوم طاح اللي في راسي من الربيع ضفيت عفشي وابي ارجع للرياض
وانا راجع قلت ياغريب مر ثاني مره وسلم عليهم وشف وضحى << ابليس شغال
وارجع للمكان اللي هم فيه
وما لقيت خيمتهم شكلهم شدو
واطالع يمين يسار ماحولك احد
والله ويضيق صدري
واسري من مكااني
وجت في باللي هذي القصيده
نويت مرباع الغضي سيد الاحباب=قصدي يزول الجرح زاد التهابه
جيت وبقايا نارهم حول الاطناب=بيت الشعر مطوي وباقي زهابه
على غزير الدمع ضميت الاهداب=صديت لين الدمع يكفي سحابه
بعض الوجاع يمكن تداويه الاعشاب=بعض الاوجاع يا ويل منهو سطا به
عشق بدوي لا حب ماهوب كذاب=يوفي ولو جرحه تجدد صوابه
واليوم وصلت بيننا مثل الاجناب=ذاك الغلا يا ضيعته يا سفابه
باكر اذا جينا لهم مثل الاغراب=من بعد ما كنا الاهل والقرابه
الامر لله كل شي له اسباب=والا الهوى وش لي على هد بابه
وشلون قلبي ما يجي اليوم منصاف=على الرجم منقوش بعض الكتابه
حتى اثر مشيه مع سهول وهضاب مره يبين ومره ما يندرى به
قلبي من الفرقا صويب ومرتاب=كنه غدى نصفين منهو لفا به
حزني عليه انه تسبب ولا طاب=نظره طبيبه عجلت في ذهابه
ريح الخزامى والنفل زين الاطياب=يشدني ريح السمر في ثيابه
لا اقبل نسيم الليل له خيل وركاب=وله في طلوع الشمس عز ومهابه
وارجع للرياض وانا ضايق صدري
رايح اوسع صدري واستاانس
رجعت وانا متكدر
م.ن







التوقيع :
.

قديم 18-03-12, 10:10 PM   رقم المشاركة : 2
الشعبان
عضو متألق
الملف الشخصي






 
الحالة
الشعبان غير متواجد حالياً

 


 

رد: قصة الغريب وبنات البدو

هههههههههه
الله يبيض وجهك على هالقصة الجميله
امتعتنا بقووووه
مشكوووووووور يالغالي







قديم 18-03-12, 10:18 PM   رقم المشاركة : 3
الرسن
العضوية الماسية
الملف الشخصي






 
الحالة
الرسن غير متواجد حالياً

 


 

رد: قصة الغريب وبنات البدو

هلا وغلا باخوي الشعبان شسوي وانا اخوك اشوف حفلات الاعراس يمين وشمال وانا وانا ماغير اسطر من هالقصص والقصيد من شئ بالقلب تهيض الله يصبرني بس .







قديم 19-03-12, 03:51 AM   رقم المشاركة : 4
ريم النواااظر
مراقبة الاقسام الادبيه
الملف الشخصي







 
الحالة
ريم النواااظر غير متواجد حالياً

 


 

رد: قصة الغريب وبنات البدو


؛

قصه فكاهيه رائعه
نقل مميز
سلمت الايادي
ِ







التوقيع :













قديم 22-03-12, 05:36 AM   رقم المشاركة : 5
قحطه
عضو نشط
الملف الشخصي






 
الحالة
قحطه غير متواجد حالياً

 


 

رد: قصة الغريب وبنات البدو

حمد الله انك ماقلت ديوان شعري لو صابر شوي سويت معلقة بس يعني صراحة انا منحرج جداا جدااا منكم يااصدقائي قرقاص هذا شنو مدري فرقاص من طول القصة ماقدرت اركز على اسمة







التوقيع :
[SIGPIC][/SIGPIC]

 

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 01:58 AM


Powered by vBulletin® Copyright ©2000 - 2024, Jelsoft Enterprises Ltd.
تعريب :عاصمة الربيع

تصميم وتطوير سفن ستارز لخدمات الاستضافة والتصميم