قلي وش اللي تستفيـده علـى شـان
انا اعترفلـك بالخطـا فـي لسانـي
تعبت ابرر موقفـي واحلـف اديـان
اني معك ماني معى شخـص ثانـي
والله لو مرت علـى البـال يانسـان
ماكـان ضاعـت ساعتـي بالثوانـي
ادري المواقف تخذل انسان واحيـان
انسـان يخـذل بالمواقـف معـانـي
والشرهه اللي من ورى دمع الاعيان
اكبـر مـن انّـه يحتويهـا زمانـي
كانت عصافيـر وتغنـي للاغصـان
واقرب من انفاس العطـر لاغشانـي
الين مالت فـي متاهـات الاحـزان
وجف العطر في ليلتـي مااحتوانـي
وغنت على جرحي بلا صوت والحان
احسهـا ميسـم بقلـبـي كـوانـي
تعبت اغنـي للوطـن مابـه اوطـان
تعبت اصـوّت فـي دروب الامانـي
الصوت بح ووجهتـي دون عنـوان
والدرب مـل مـن النـدى مالقانـي
غربة حزن مدري حزن صار ميـدان
بـس الوكـاد انـي بليلـي اعانـي
واحتـاج ياليـل المتاهـات خــلان
من شان افضفض عن حديث المحاني
الله يالليـل السهـر حيـل تعـبـان
ودي على صـدرك انـام وعسانـي
انسى بعض ماصار واللي بعد كـان
وارتاح لحظه مـن عيـون الانانـي
خلاص ملت رحلتي حمل الاظعـان
وتعبت انا اعطي يوم غيـري نسانـي
ياااادمي ماكنـت انـا يـوم غلطـان
ليتك تجـي لحظـه تصيـر فمكانـي