[align=center]بيني وبين الشقا سلام رديه ... يفتل جروحي وانا انقضها بموالي.
عيد بي الهم واثر الدمع عيديه ... ولآني بذاخره دام عيوني عيالي.
ياعين هلي دموعك كل عصريه ... وإن لمتك بيوم قولي مالك ومالي.
محتاج طاروق له معنى وقافيه ... وإستبشري خير والشعر يتهيالي.
القدح من فكري وفي الراس جنيه ... وإن حضرت بي كتبت العالي العالي.
ماشلتها عرضه ولاهي هجينيه ... غنيتها مدري الطاروق غنالي.
بس الوكاد إنها قصة غراميه ... ابطالها همي وغمي وغربالي.
وإن قالو الناس ذا طبع الهواويه ... قلت استوا عندي الترياق والحالي.
العشق بلوى ونفسي فيه مبليه ... خلوني اكتب وافضفض لا تفضالي.
المسأله اكبر من احلام ورديه ... الحزن لامن لفا جيته على فالي.
حزني واعرفه واعرف ابسط مواريه ... ولاني لحالي كثير اللي عرف حالي.
ياوجد حالي وجود اللي هقاويه ... خانته بأغلى رفيق ولا لقا والي.
وياوجد حالي وجود اللي بناخيه ... عن عسر حاله وضيقه داله وسالي.
في غيبة اللي تمادى في الانانيه ... وخلاني بوجه حزني واقف لحالي.
ياموسع الضيق لامن مر طاريه ... كن الوسيعه تضيق إن مر في بالي.
وين انت ياللي بعادك مثرن فيه ... غايب واحسك معي واشوفك قبالي.
طيفك اليا مر حاجه لا اراديه ... اتبع سرابه واجيه اسابق ضلالي.
ياللي من حروفك تغار الرومانسيه ... والله قبل لا افقدك فاقدك جوالي.
في بحتك شي يشبه حزن مرثيه ... ومن غاب صوتك وانا اللي صدق يرثالي.
وعيونك السود اعجاز وخياليه ... نادر شبها مثل ماتندر خصالي.
ونظرتك تهدم كياني بكل عفويه ... سلهم وكيف يبدا فيه زلزالي.
وعودك اليا مال يالمترف بحنيه ... قمت اتعزوى واطوح لأجله عقالي.
وقلبي على ضمتك يسابق يديه ... ويردني طيب ابوي ومرجلة خالي.
تكفون ياللي تمرونه على نيه ... قولو له الموت لامن غاب يبرالي.
وقولو له ان غيبته ماهي بعاديه ... وخلوه يرجع يشوف بعينه احوالي.
وقولو له انه ذبحني لعنبو حيه ... مايرحم الشوق غالي ينتظر غالي.
وقولو له إن صد والصده نهائيه ... اشوالي اصد لا والله وش اشوالي.
حيل الله اقوى عساها روحه بجيه ... وعساه مايبطي ويرجع ويسعالي.
وقولو له الله حسيبه كان له نيه ... ماعاد يرجع لي وقولو له التالي.
حرام كلي ضما ويديه وسميه ... وحرام مالي امل دامه أمالي.[/align]
كلي ظما
العرض العادي
