جتني رساله كلها شوق ودموع
.................... وعجزت احبس العين هلت دموعي
من صاحبٍ اقفا (له العذر مقطوع)
..................... ويقول والله غصب ماني قطوعي
يقول حبك بين الاضلاع مطبوع
....................... لو غبت عنك ما تغير طبوعي
في غيبتي يومي غدا كنه اسبوع
................... والشوق نارٍ والحطب له ضلوعي
وليلي قضيته(ااه) والصوت مرفوع
................... واقول ليت اللي مضا له رجوعي
قلت اه واويلاه والقلب مصفوع
.................... ياللي غلاك امشتتٍ له جموعي
صحيح انا من غيبتك طحت موجوع
.................... وهموم بقعاء في حشايا تلوعي
مير الوفا يا منوة العمر مجموع
................. وخابر ظروفك والليالي تصوعي
وانا على ذكراك للشعر مدفوع
..................... اللي ليا مني نخيته فزوعي
من كل بحرٍ ذقت انا منه قرطوع
.................. والجرح دايم للمخاطر طموعي
وجدي على شوفك وانا منك ممنوع
................... وجد الكسير اللي تمنى يفوعي
او وجد منهو داخل السجن مجدوع
................. مظلوم في حكمه ولا له طلوعي
لو بيننا جيش وخناديق ودروع
............... جيتك لو ان الموت دونك مزوعي
مير البلا عذر ٍ له الصد مشروع
................. والصبر مر ٍ ثمرته لي قدوعي
وا قلبي اللي كنه الفيش ملذوع
............... شاف العنا والحظ راضي قنوعي
واختامها من هيض القاف بدموع
................. اللي تمنا ما مضا له رجوعي
يشفيه ربي من بلا فيه مزروع
............... ويرجع لقلب ٍ من بعاده فجوعي
وكل عام وانتم بخير
اخوكم الشاعر/ عبدالله سعيد الشمري ( صدى ضامي )