لا واحسافه بعض الاصحاب يغرك
ياسرع بيعـة صحبتـه لا نواهـا
تغتر في طبعـه وهرجـه يسـرك
يعطيك هرجه ماوصـل مستواهـا
اليا سمعته قلـت بالطيـب بـرك
غلطان منهو صحبتـه ماشراهـا
يمشـي معـك وتـقـول لله درك
صحبتك انا ماظن القـاء سواهـا
واليا حصل موقف بسرعه يفـرك
ينسى علوم امجاده اللـي ادعاهـا
ويصيرخصمك ثـم يبـدا يضـرك
ويسعى بفضح اسرارك اللي لقاها
تقول مايعرف أبـد عـن مقـرك
وتقول واحيفـاه صدقـه قضاهـا
بعض الصداقه للمخاطـر تجـرك
والبعض تسحب لك بلاوي وراهـا
والبعض ماتميز لبـردك وحـرك
تمشي ولو هي ماشيه في عماهـا
والبعض منها مثـل ألـه تحـرك
تعطي فوايدها لمـن هـو قناهـا
والبعض منها كافي اكفيني شـرك
صحبتك يالماخـوذ يلعـن ثواهـا
والبعض منها يحتفظ لـك بقـدرك
والكل حاجه عارف(ن) ويش دواها
واغلب صداقات البشر حذر حذرك
لايغرك المظهـر علـى ماخفاهـا
ترى الصداقه شي ضروري لأمرك
اختارهـا بحـكـام والا بـلاهـا
للشاعر
محمد بن خيرالله الردادي