كيف تعرف ان البطيخة كويسة !!!

[نواف التويجري]

هلا ومليون غلا باعضاء منتداي الغالي
بصراحة قريت عن فوائد البطيخ ان فيه عشر خصال هو طعام وشراب واسنان وريحان يغسل المثانة ويغسل البطن ويكثر ماء الظهر ويزيد فى الجماع ويقطع البرودة وينقى البشرة .
وبصراحة بلشت مدري وين اطرح موضوعي
قلت لو في العام مايسوى اطرح موضوع عن بطيخة !!!
الحين سؤالي يالربع ويالربعات البطيخة اللي يسمونها رقي و دبشي وجح .....الخ
شلون الواحد يعرف انها كويسة !!!
لاني بصراحة تعقدت العام الماضي من البطيخ
كل ما اشتري وحدة اطبطب عليها واقول كويسة ويوم اهبشها القاها حمراء بس خربانة
ليت احد يعطينا معلومات عن كيفية معرفة ان البطيخة كويسة والا الدعوة حظ ونصيب !!!
لا تقولون هذا حضري ومدري ايش لا بس الظاهر حظي مش كويس وياليت تعلمونا افضل البطيخ اللي يبيعونه في الشوارع والا اللي في محلات الخضرة واي نوع كويس من البطيخ الاخضر الغامق الدائري والا اللي شكل البيضاوي ولونه اخضر فاتح ؟؟؟


اخوكم / نـواف الـتويجــري

[فايز عايد]

هلا اخوي ابشر بقولك الي عندي

افضل انواع البطيخ هو الاخضر الغامق (الدائري) بالعربي جح الجوف

واذا تبي تعرف كيف هو كويس طبطب عليها ..يعني يطويل العمر كل مكانت قاسيه اعرف انها كويسا

واختصرها لك خذها علي الشرط يعني خل راعي الجح يكسرها لك وهو ابخص
وموصيك تراهم علي الستين عند العثيم

ارجو اني اكون فدتك^_*

[فراج العضيله]

أنا إشتريت مره جحه لونها أخضر فاتح يميل للبياض وكانت قاسيه لما ضربت عليها ولما قطعتها لقيتها حمراء اللون من الداخل وممتازه وبالمناسبه تلقاها دائريه يجيك من الخرج أو القصيم أو الجوف .

بالمناسبه:ترى الآن أغلبية الجح مضروب بالكيماوي .

[مسترمون؟]

يعطيك العافيه على الموضوع..

<< استفااد..


شكرا لكم..

[تركي الوايلي]

[align=center]افى يابو سامي وهذا انت بدوي وشمالي ولاتعرف النوعيه الممتازه من الجح او الدبشي او الحبحب
او البطيخ او الرقي

مايبي لها نشدة شيخ يابو سامي

طبطب عليها مثل ماقالوا لك الشباب اعلاه واذا حصلتها قاسيه فهذه طيبه بلحيل

واذا شفت الطبطبه خافته فهذه تدل انها بيضاء من الداخل ولاهي زينه

واذا حدتك الامور خل راعي الحبحب يشقها لك بالسكين وهذا الافضل !

وملاحظه مثل ماقال اخوي سيف اكثر الجح تراه مضروب بالابر الكيماويه علشان تحمرر اكثر وتكون كبيره الحجم

وبالنسبه للجح الطيب اللي يجيك طويل والدائري كمان حلو ولكن الاحلى هو النوع اللي يجي طويل

وشكرا.[/align]

[محمدالجرمان]

والله صارت فياغرا ياابو سامي0

[نواف التويجري]

اقتباس: المشاركة الأصلية كتبت بواسطة تركي الوايلي    [align=center]افى يابو سامي وهذا انت بدوي وشمالي ولاتعرف النوعيه الممتازه من الجح او الدبشي او الحبحب او البطيخ او الرقي مايبي لها نشدة شيخ يابو سامي طبطب عليها مثل ماقالوا لك الشباب اعلاه واذا حصلتها قاسيه فهذه طيبه بلحيل واذا شفت الطبطبه خافته فهذه تدل انها بيضاء من الداخل ولاهي زينه واذا حدتك الامور خل راعي الحبحب يشقها لك بالسكين وهذا الافضل ! وملاحظه مثل ماقال اخوي سيف اكثر الجح تراه مضروب بالابر الكيماويه علشان تحمرر اكثر وتكون كبيره الحجم وبالنسبه للجح الطيب اللي يجيك طويل والدائري كمان حلو ولكن الاحلى هو النوع اللي يجي طويل وشكرا.[/align]

هلا ابو نواف
ويعني البدوي والشمالي كل شيء يعرفه ههههههه
لا يغرك كله مهايط بالقصايد والا انا لو اشوف البعير انحاش
يارجل هذا انا مبلش راعين المحلات اجيهم واقعد ساعة اطبطب على بطيخهم الين يقولون نبي نسكر واخرتها اخذها والقاها بيضاء والا خربانة
بس تصدق انا فاهم غلط اثرني اطبطب واللي اسمع صوتها خفيف اخذها ههههههههه
بعدين تقولي كيماوي !!!
يا اخي اكثر الاكل الحين كيماوي وش اسوي
يعني تبي ازرع عندي بالبيت ؟

[نواف التويجري]

اقتباس: المشاركة الأصلية كتبت بواسطة KH.AZIZ    هلا اخوي ابشر بقولك الي عندي افضل انواع البطيخ هو الاخضر الغامق (الدائري) بالعربي جح الجوف واذا تبي تعرف كيف هو كويس طبطب عليها ..يعني يطويل العمر كل مكانت قاسيه اعرف انها كويسا واختصرها لك خذها علي الشرط يعني خل راعي الجح يكسرها لك وهو ابخص وموصيك تراهم علي الستين عند العثيم ارجو اني اكون فدتك^_*

هلا بك
ممتاز على المعلومات الحلوة
بس على السكين مو زين ما احبه كذا
ودك تجيك البطيخة بوضعها
السكين يلزق عليها وحوسة
اشكرك على الوصف

[ام ود]

يوم كنا صغار كنا نجمع الجح من المزرعة وماكنا نعرف نطبطب بس كان فى طرف الجحة

عرق لولبى اذا كان يابس (محمس) معناته الجحة مستوية

[نواف التويجري]

اقتباس: المشاركة الأصلية كتبت بواسطة ام ود    يوم كنا صغار كنا نجمع الجح من المزرعة وماكنا نعرف نطبطب بس كان فى طرف الجحة عرق لولبى اذا كان يابس (محمس) معناته الجحة مستوية

اهاااااااااااا مزرعة تختلف ومعلومة جديدة حلوة
بس يا اختي المحلات الجح حقهم مافيه عرق لولبي على قولتك على اساس اعرف هو مستوي والا لا ؟
بس معلومة جديدة تشكرين عليها
عاد انتن يالحريم عليكن حركات بالبطيخ
شوفي الصور :