السلام عليكم ورحمة الله وبركاته
أمس كان الأهل بزياره لأحد الأقارب بهجره قريبه من الحفر
وانا طبعا مااحب الطلعات بيتوتيه أستغليت الفرصه بوجود جدتي
وقلت لها تحكي لي حكاوي زمان فقالت بقولك قصص عن النصيب والرزق
صدق ان القصص قصيره بس لها معنى كبير طبعا بقولها مثل ماقلتها
وكلي فخر بلهجتها ماأحب أتبرى من جلدي
المهم نبدأ
كان يما كان كان فيه رجل فقير حيل ماعندوه شي أبد وكان ساكن عنده جاروه
طبعا بالخيام المهم تقول جدتي ان جار هالرجال الفقير عندوه خير ورزق واجد
اذا جاء ولد المقتدر عند ولد الفقير يقوله عندنا حلاوه وعندنا رز وأشياء أخرى
يعني ودوه يحرقه بمعنى يقهره المهم جاء الولد لأموه يبكي راحت الام
لزوجها تقول يابو فلان شف جارنا عندوه وعندوه وحنا ماعندنا شي
المهم الرجال ضاقت به الوسيعه وسج بالخلاء بمعنى ضاق صدره وراح يتمشى بالبر
ويمشي أبعد عن أهلوه حيل ولا هاك الصخره صفاه بمعنى رأى صخره مقسومه ثنين
ومعنى هاك ....لغة أشاره بمعنى هذيك
يطلع من بين الصفا اي الصخره المقسومه أثنين داااااااااب أسود أعمى وشايب
مترهل جلده جدتي جابتها صح داب اسود اعمى وشايب هههههههههههه
المهم نكمل يطلع الداب ويفتح فموه لسماء ولا هاك الطير يجي طاير ويطيح بفموه
الرجال أستغرب وشلون رزقه يجيه بمكانه قاعد يدعي ربوه
يرزقه مثل مارزق هالداب ورجع الرجال من سجته للبيت
ونام على جوعه هو وزوجته وولدوه وصحى من نومه الا قطيع من الابل والغنم
يحرك بيته يحوم حوله....بمعنى يدور حول الخيمه
والقطيع ماعليه وسم يعني مو لأحد أخذه وعاش منه والله أستجاب دعوته
وأنتهت القصه...........