لولا جراده ماوقع عصفور

[نسيم الصمان]

يقولون أن فيه رجال وزوجته كانوا ساكنين في أحد القرى وبذاك الوقت كان ذابحهم الفقر ((( مابعد اكتشفوا البترول )))) ويوم زاد عليهم الفقر واشتد عليهم قالت الزوجه واسمها جراده لزوجها عصفور قالت له ياعصفور شرايك تغير الديرة ونشوفلنا ديرة ثانية نترزق الله فيها الديره هذي مالله كاتب لنا فيها رزق قال عصفور يالله مشينا وخذوا عفشهم ونقلوا لديرة ثانية قالتله زوجته ياعصفور تعلم الطب وخذ لك من الاعشاب وعالج الناس وقل انا طبيب ما لنا الا هلون وش نسوي قام الشقردي عصفور واخذ له بعض العلاجات الشعبية والاعشاب وقام يعالج الناس ويوصف العلاجات للناس اللي لاتضر وبعضها يصيب وبعضها ماله أثر ومع الوقت اشتهر امره بين الناس وكثرت الرجل على بيته وتطور الامر معه واستانس عصفور وتحمس وصار يقول للي يجيه انت فيك كذا قبل لايتكلم قالوا له انت تعلم الغيب قال لا لكن هذي فراسة وتطور الموضوع حتى وصل الخبرللامير واستدعاه الامير وقال له تعال ياعصفور وش العلاجات التي تعطي الناس قال اعشاب شي للماغص وشي للراس وشي للكبد وقام يعطيه من الاعشاب والناس بهاك الوقت فيهم جهل ولايعرفون قاله الامير طيب الناس تقول انك تعرف المرض قبل لايتكلم المريض انت تعلم الغيب قال لا ياطويل العمر هذي فراسة اخذتها من ابوي وجدي ،،،،،،
عندها قام الامير يفكر وقال رح ياعصفور الله يوفقك وجابه باليوم الثاني وقال لخوياه جيبوا لي عصفور وجراده وحطوها في ماعون او قدر عنده او اناء من فخار وسكروه ونادى عصفور وقاله ياعصفور اما انك تعلمني وش اللي داخل القدر والا ابقطع راسك ،،،،،،،،،وقتها تورط عصفور واخذ يلوم نفسه وتذكر اللي سببت له هالمصيبة زوجته جراده وقام يهذري على نفسه وقال لولا جراده ماوقع عصفور وسمعه اللي حوله وقاموا يصيحون فيه بانه عرف وش اللي داخل القدر ،،،،،، وعصفور مايدري وش الطبخة قاله الامير اسمع ياعصفور علمني وش القصة ووش السر وانا اغنيك من هالحين الى ان تموت قال اسمع ياطويل العمر القصة كذا وكذا وكذا وعلمه بالصحيح وضحك الأمير وعطاه من الخير ورجع عصفور لديرته غني .وسلالالالالالالالالالالالالالالالالالالالالالالام تكم .

[مرهف الاحساس]

سالم وغانم

وشكرا على القصه الاكثر من رائعه

[links]

تسلم اخوي على القصه

ننتظر منك المزيد

[نسـ الشمال ـــيم]

منقول طيب


اخوي ابو تركي


ننتظر الجديد منك


خااااااااااالص الود

[نسيم الصمان]

للعلم
كل القصص منقولة من شريط المسيميري فنجال وسيحة بال

[@ ابوسلطان @]

وانت سالم وغانم يابو تركي ونطمح بالمزيد وازين شيء بقصصك انها غير مملة وجميلة وخفيفة