[align=center]السلام عليكم
أتركم مع الموضوع <<< ماعنده وقت
ابي اشتغل .. ملــّـيت !
طيب وش شهادتك ..؟
متوسطه .. <<< وان خربها .. ثانويه عامه !
الحيـن الجامعيين مب لاقين وظايف تقوم انت
تبي وظيفه ؟
طيب لقيت لك وظيفة كاشير بالسوبر ماركت الفلاني
راتبك 1800 ريال .. ومع انتظامك والتزامك ..
يزيد لين يوصل لل5500 ريال !
لا ؟ بالله ؟ وشو اشتغل كاشير ؟ هندي انا ولا فلبيني؟
طيب والحل ؟
ما اقول الا من عض على ضرسه نفع نفسه !
خلك عسى عمرك ما اعرست ولا سويت شي
ماينفع لك الا البطاله وانا اخوك
انت انخلقت عشان تكون باطل . عاله . جاهل
* الرجوله
هي ان تعرف قدر نفسك فلا تتجاوز بها الحد !
@@@@@@@@@@@@@
يبا وين بنسافر ؟
والله ياولدي الاسهم نازله ولا هنا سفره ..
نبي نصبر لين يتعدل الوضع ولا نشوف لنا دبره ..
بالله ؟ وشو يعني كلن يسافر الا حنا ؟ وش ناقصنا؟
هذا عيال الفلاني بيروحون جنيف ..
وعيال العلاني امس راحو باريس
وغيرهم في لندن ولا بيروت ..
وش معنى حنا يعني ؟ وانت اتجر منهم ؟
انا ماعندي سيوله الاسهم نااازله افهمي .
لحوووول يعني لاسفر ولا شي ؟
وهذ انا نقول لك انقلنا بيت جديد تعيي
وطلعات من زين ذا الطلعات منتب تطلعنا ولا شي
ننتحر يعني ولا وش نسوي ؟
الله يلعن ذا الحاله !
يعني اذا انت تشوف حالة ابوك صعبه
وماعنده سيوله ليه ماتقدر ؟
الوضع صعب ولا الظروف تسمح بسفريه !
وانت يوم انك تدخل بالاسهم وتحط كل حلالك
ومالك فيها ؟ ماحطيت في بالك ان عندك بيت وعيال ؟
يبون مصاريف يبون روحات وجيات ؟
لا ! ليته بيت واحد .. الا معرس على ثنتين
وكل وحده عندها كومة لحم الله يحفظهم !
* يقال كل دمعة لها نهاية .. ونهاية أي دمعة بسمة ..
ولكل بسمة نهاية .. ونهاية البسمة دمعة ! ..
ولحن الحياه بداية ونهاية ،، بسمة ودمعة ،،
فلا تفرح كثيرا ،، ولا تحزن كثيرا
فإذا أصابك أحدهما فنصيبك من الآخر آت مع صفحات القدر..
@@@@@@@@@@@
وبعدين معك انتي ؟ كل يوم تروحين لاهلك ؟
الله اكبر عاد ! وانت كل يوم تروح لربعك ؟
وش اقعد اسوي لحالي؟
لازم تطلعين طيب؟ ممم مممم ليه ماهم يجونك ؟
الطلعات مب كل يوم ومافيها شي لو قعدتي بالبيت
سبحان الله انت ماتفهم بروح بيت اهلي ويوم تعرف قيمتي
تعال خذني
احسن احسن روحي بيت اهلك اصلا انتي ماتحبيني
ولا لو تحبيني تسمعين كلامي
لاوالله؟ صرت الحين انا اللي مااحبك يعني ؟
وانت لو تحبني تسكني ببيت كبير مو شقه .!
بعدين لو تحبني تسفرني كل صيف .. وشف كل البنات
عندهم ساعات الماس وطقوم وفلوسهم بين يديهم
مثل المويه مو انا استغفر الله ماعندي شي
وشلون يعني ؟ كل ماشفتي شي تبين مثله؟
من قال اصلا انك بتجيب لي شي؟
انت ابوك يصرف عليك ولا انت هذاك حتى جامعه مامعك
شوي شوي ارفقي علينا يعني انتي اللي معك دكتوراه؟
ترا راس مالك ثانويه !
انت ليه طيب ما تـ .. الخ الخ
انتي روحي شوفي البنات العاقلات وش .. الخ الخ
والحل مع ذا البزران اللي يعرسون ؟
الواحد ماطبق ال23 الا وهو ماسكن البنت عنده
عمرها 17 سنه ولا 18 سنه !
ومشاكلهم تافهه ! ابي مثلا فلانه ولا علانه !
ليه تخلون عيالكم بهالدوامه ؟
مب حرام ؟
يعني وش ذنبهم يطيحون بمشاكل بايخه
وبالغالب نهايتهم الطلاق !
لانهم بزران وتزوجوا !
ما اعمم ..
لكن اشوف ان 75% من زواجات الصغار فاشله ومضطربه!
* تستغرق مناقشة المسائل التافهة وقتاً طويلاً
لأن بعضنا يعرف عنها اكثر مما يعرف عن المسائل الهامة..!!!
@@@@@@@@@@@
ماشاء الله كم عمره ولدك احمد ؟
والله عمره 10 سنين
الله يحفظه .. بس يختي كيف تخلينه يروح ذا الحلقات؟
ماتخافين عليه من اختلاطه بالناس اللي بالمساجد؟
ليه وش فيهم ؟
يختي والله يصير ولدك بعدين ارهابي ههههههههه.. !
نعم ؟ يعني اذا الولد من صغره تربى على حلقات الذكر !
وحفظ القرآن .. والاحاديث وعرف الاحكام وتقرب من ربه
يصير ارهابي ؟يعني اخليه يهيت بالشوارع ؟
ولا تبينه يصير سربوت بالنوادي والاسواق يتحرش
في بنات خلق الله يرقم ذي ويطلع مع ذيك ؟
لا يختي مو كذا بس والله ترا تأثر عليه الافكار الدينيه
البحته .. والله اذا كبر يصير ملتزم يختي مب زين التعقيد
اللي ياخذونه بالمدارس كافي !
لا يختي شوفي الباقين دشير اصلا حتى صلواتهم ماتقبل
تلقينه مسبل ثوبه .. ومطول شعره,,هذولا صايعين
انا ما ابي ولدي يصير مثلهم .. هذولا مايعرسون
ولا وحده بترضى تزوج بنتها داشر حالقن لحيته !
عساتس المصع انتي وياه ؟
وش ذا الهرج ؟
يعني اذا الولد يحضر حلقات ذكر هالشي يأثر على افكاره؟
ويخليه ارهابي ؟
ولا اذا الواحد حلق لحيته صار سربوت ولاتقبل صلاته؟
يابنتي انتي وهي .. لاافراط ولاتفريط ..
ياما ناس لحاهم الى بطونهم ولايتركون القران ولا الصلاة
بس العن ماخلق ربي ! لاتعامل ولا خلق حسن ولا لسان نظيف
وياما ناس حالقين لحاهم ومطولين شعورهم ويغازلون
ويدخنون ... بس احسن ناس معامله واخلاق
وعارفين ربهم صح !
يا اختي .. الدين المعامله .. مو شكل !
يعني الحين اذا راح لحلقات الذكر والتزم قلتوا ارهابي
واذا طلع وتمشى وصار على الموضه وكول .. قلتوا
داشر ..
طيب والحل ؟؟؟؟
* قل ماشئـت في مذمـتي,,فسكـوتـي عن اللئـيم.. جواب
ماأنا بعـادم الجـــواب ولكــن مامن أسـد يجيـب الكلاب ..
@@@@@@@@@
يماااا يماااااااا ,, بسرعه بسرعه تعالي .. بدت روبي !
تجي الام طايره تراكض وتبرك على الكنبه وتتابع مع بنته!
البنت ام 7 -8 سنين وتتابع مسلسل مكسيكي ؟
لاعاداتهم ولا افعالهم ولا تقاليدهم مثلنا !
يعني وشوله تتابعه ؟
خوسي يحب ماريا
وماريا تنام مع فرناندو
وفرناندو كان معرس على مدري منهي !!
وش تستفيد البنت ؟ مب لازم تناظر هالتفاهه
انتي تبين تناظرها كيفك بحريقه ! بس بنت صغيره لا
حرام .. تدخل براسها افكارهم السقيمه ..
يمكن أثرها مايبين بوقتها .. بس بعدين تتأثر البنت
وحتى الولد .. ماله داعي يناظرون اشياء اكبر منهم ..
خلوهم على مسلسلات عربيه صحيح انه فيها
مايقهر وماهو غلط .. بس نوعا ما عرب !
اجل جايه تقول لاختها ترا ان ماشريتو لي مدري وشو
بقطع يدي بالسكين ؟
عشنا وشفنا يازمان العجايب !!
يمين بالله لو عندي بزر مايتعدى سبيس تون ولا ثري والله امصع رقبته
* إحساس مخيف جداا ...
ان تكتشف موت لسانك عند حاجتك للكلام .....
وتكتشف موت قلبك عند حاجتك للحب والحياة
وتكتشف جفاف عينيك.. عند حاجتك للبكاء,,
وتكتشف انك وحدك ..كأغصان الخريف عند حاجتك للآخرين.
@@@@@@@@@@
عبدالله .. تعال الغدا ..
يجي يتغدا ويطلع على النت !
عبد الله تعال سلم على جدك ..
يجي يسلم ويطلع على النت !
عبد الله امش بنروح زواج عمك ..
يروح الزواج ويرجع على النت !
عبد الله تعال ابوك يبي يجونه رجال ..
يجي يقعد معهم لين يروحون ويرجع على النت !
عبد الله قم الصبح رح جب اغراض امك ..
يروح يجيبهن ويرجع على النت !
نت ! نت ! نت ! نت ! نت !
ماقلنا لاتقعدون مراهقينكم على النت ..
بس وش يسوون ؟
تدرون عنهم ؟ تلقاه ماكل شارب نايم على النت !
وان طلع مع اخوياه راحو مقهى انترنت
وليه الاهمال؟ وش يضرك لو جيته فجأه وقعدت معه؟
شفت وش يسوي ؟
كذا الولد يبي يحس ان عليه رقيب !
ما اقول لك اقعد على راسه قل
ياكلب وش تسوي ؟ من هاللي تحاكيه ؟
وش انت فاتح ؟ لا !
بالعكس كذا اخر همه يروح مقهى ويرتاح منك !
لو تجيه بالطيب .. وحسسه انك بس جاي عشانه هو
مب عشان تشوف وش يسوي
سولف معه..اضحك اجدع لك كم نكته بس لاتسيمج مره
بس ! اسم انك انت تطمنت وشف ولدك وش عنده
ووش ماعنده !
حرام ولدك يضيع .. النت يجيب بلاوي ..
بالتوك سكاي بي افلام مواقع صور الخ الخ
وش الفايده ؟
ما اقول اكتم المراهق .. اقول راقبـه بدون مايحس انك تراقبه
حسسه انك معه .. مو ضده !
السلام عليكم صمت الوداع
ياكثر هرجي صح ؟ بتشوتني؟
خلاص ابمشي
<< ضف عفشه ومشى
بس آخر شي
* لاتسالوني وش جرى في حياتي
خلو همومي بالحشى مستقره
الصمت ثوبي والمواجع عباتي
والحزن كله وسط قلبي مقره
لو استعيد بواقعي ذكرياتي
احيا واموت في الثاانيه الف مره
همي يجيني من جميع الجهاتي
تجاوز حدود الفلك والمجره
سلام! [/align]
العرض العادي
