الضحك على هيئة سواء كانت تنسيفة ولا قذلة أعتقد مافيه شيء لأن صاحب الصورة تعمد رسم البسمة بطريقتة . لكن الضحك على الصفة الخـِلـقـِـيــة سواء بحجم الأنف أو العيون فيه إستهزاء بمخلوقات الله وهذا لا يجوز كما تدل عليه الآيات الكريمة والأحاديث الشريفة .
شفت الموضوع البارح ، وبصراحة أول ما قرأت العنوان توقعت إنها هالصورة ، لأن أول ما شفتها قبل كذا شهر ضحكت كثير عليهم . وقلت شكل نواف التويجري هو ابو قذلة . وتعور قلبي يوم عرفت إنه أنا هههه . نواف التويجري لابس وزرة ، ماكان يعرف السروال ، شكله الحين يشتري بالدرازن كتعويض عن السنين العجاف . بعدين الروايات تقول إن أحد الرؤوساء الفرنسيين ــ أظن إنه شارل ديغول ــ كان طالع من قصرة وكان الجو ممطر ، وكان فيه بقايا من المطر على الأرض وحتى لا يتسخ البنطلون اللي كان لابسه راح وصفطه من تحت ، من بكرة لما شاف الفرنسيين هالصورة بالجرائد وإن رئيسهم اللي يعتبرونه الأب الروحي لهم صافط بنطلونة كلهم صفطوا بناطيلهم وغزت هالموضه أوروبا وأمريكا ودول شمال أفريقيا وباقي دول العالم . أذكر لما جاء المصور وكان حضري من شقراء وقال يالله بطق لكم صورة وكان هالكلام في نهاية الستينات ، قلت وقتها لازم أكون مميز <<< يمديكم ، ولازم صورتي تكون علامة فارقة في تاريخ التصوير وتكون لي كاريزما تخلق ناس متأثرين فيني . صورة على هالوضعية وبعد 14 سنة تقريبا ً طلع جيل كامل يحب التصوير على جنب .