صباح الخير جميعاً
فساعة شغموم تشير الى الساعة / الثامنه صباحاً بعد النومة المبكرة لي البارحه وكما يسميها
احد اصدقائي بنومة الدجاج غضباً على تخلف احد افراد الشلة الموقرة عن السهرة في ايام العطل الاسبوعية لكن ان شاء الله نعوضه هذا اليوم الخميس ...
في اثناء ارهاقي ليوم امس وانتظار صلاة العشاء لانني لااريد ان انام قبلها كنت قد دخلت الى حفرالباطن القديمة برفقة احد الاصدقاءوتحديداً في شارع الملك عبدالعزيز او مايسميه اهل الحفر طريق السوق ورغم ان الاسم كبير لهذا الطريق باسم موحد المملكة العربية السعودية الا انه لو يريوس سيكل ابو 16 ممكن يسكره ويعطل مرور السيارات ...!!
طبعاً تواجدي في هذا المكان كان للسؤال عن اسعار الحملات بعد اتصال احد الاقرباء النشبة
بي وتكليفي بهذه المهمة وحتى لايلومني الاعضاء على تسمية قريبي بالنشبة فساقول لهم السبب على عجالة ،، فقريبي هذا من اهل الدمام وماشاء الله تبارك الله مليان فلوس حتى يعلق عليه أحد الحاسدين عليه من العائلة بان مخابيه دايم تشقق من كثر الفلوس اللهم لاحسد
لكن فيه طبيعة مزعجة وهي انه يجب ان يكون على علم بما يحصل بالدولة فهو يريد اسعار
الحملات بالحفر ليس لانه يفضل الحملات الفخمة في حفرالباطن لكن ليتباهى امام الناس بالمجالس بمعلوماته عن اسعار الحملات في المملكة ويفرح كثيراً اذا سمع عبارات المدح وقول الناس له : ماشاء الله يابو نواف كل شيء تعرفه ...!!
طبعاً افتخاره هذا على حساب شغموم وشاكلته من اللي يستحون من الاقرباء ...!!
سئلت عن الاسعار في بعض الحملات ثم ركبت سيارتي وفي هذه الاثناء توجهت لاحد الصيدليات القريبة من هذا المكان لان صديقي يريد تغيير حليب الاطفال لبنته فمن البخل ماوده يروح لدكتور متخصص وقال ان الصيدلي مايفرق عن الدكتور ،، دخلنا الصيدلية وبدأنا نتشاور عند رف الحليب ومن ثم تكلمت من اللقافة بصوت عالي مع الصيدلي عن افضل انواعها اللي مايسبب مشاكل للمعده فكانت فيه أحد اخواتي النساء عند الصيدلي فجاوبتني وقالت : كم عمر الطفل ..؟؟
قلت :سنتين
قالت : حليب بروميل زين رقم 3
قال زميلي : والله جربناه ولانفع
قالت : عودوها على أكل البيت
قلت : والله انك احسن من ابو دماغ اللي بجنبك ..!!
فضحكت وضحك بعض الحاضرين ماعدى المصري لانه مافهم عبارتي زين
فخرجت بعد ان حاسبت الله يستر عليها ويخلي لها عيالها وهنا كان شيء ازعجني وحز في خاطري فخرجنا من الصيدلية وبداء زميلي يلومني على عدم اللحاق بالمرأه ورأيت كيف كلمتك
وكيف تجاوبك وهذي ماتستحي وكيف تكلم الرجال وشفت وشلون ضحكت وانا ساكت استمع اليه حتى ركبنا السيارة ثم بعد ان شك في سكوتي سألني : شغموم وشفيك ..؟؟
قلت : لو سمحت ودني للبيت ..؟؟
قال : شكلك تأثرت مع البنت هذي ..؟؟
وهنا انفجرت عليه بشكل غير طبيعي
وقلت : لاوالله متأثر من التخلف اللي يعشعش برأسك ونيتك الخبيثة في الناس الحين الحرمه واضح عليها ام عيال وشافتنا مبتلشين ونتشاور وحبت تساعدنا وتوجهنا ربما لخبرتها مع اولادها فهل يعقل بنا ان نشك بكل من يكلمنا ..؟؟ اي فكر تحمله ..؟؟
لو تكلمك ممرضة وترد عليك السلام وتقولك تفضل قلت هذي ماهي مضبوطه ...!!
ولو تكلمك موظفة استقبال في مستشفى وتقولك : مرحبا آمر لقلتم ماهي مضبوطه
ولو ترد عليك مديرة مدرسة وترحب فيك وفي متابعتك لبنتك لقلتم هذي ماهي مضبوطه
الله يقطع التخلف والمتخلفين يعني لازم المرأة ماترد السلام ولاترحب بالمراجعين ولاتلقي نصيحة لمن احتاجها ولاتتصل على برنامج تلفزيوني هل نحن في زمن وأد الاصوات ...؟؟
انا لااشك بان الكثيرين يحملون نفس هذه الثقافة الرجعية والشك بكل ماحولهم ...!!
زميلي هذا لم يحصل وان واجهت موقف معه ازعجني وجعلني اشك بتخلفه مثل هذا الموقف
رغم ذلك سكت عني حتى انتهيت من كلامي فحتى يقهرني نزلني عند البيت ونزل معي وقال عشني من المطعم الفلاني وقلت : الله يعين عليك لاسلمت من فكرك ولاسلمت من بطنك ..
لكن والله ماتهنينا بالعشاء من مهزلة المنتخب البارح ...
دمتم سالمين