تعليم لهجة اهل نجد لغير اهل نجد

[عبدالاله$الرياض]

بسم الله الرحمن الرحيم

اخواني هذا الدرس لتعليم لهجة اهل نجد لغير اهل نجد

نبدا


هذا درس لغير الناطقين بلغة اهل نجد وضواحيها...

تسذا ... المعنى واضح يعني كذا ولازم تقولها وانت ماد براطمك لتحت..

فيذا .... يعني فيذا . هنا . " حط العشا فيذا " يعني هنا..

مير .... والله الورطه وش معناها ذي مير بعلكم ههههههه معناها (بس_لكن)..

غديه او غديها .... يعني كوده او كودها ... (( يعني بيفهمون الثانيه )) ,,,,,,,,, مثل ما يقول الابو لولده التسبير " رح ادرس كود اخوانك يغارون منك ويذاكرون " او رح ادرس غديك تنجح باتسر وتطلع دختور ...

صزز ..... يعني صدق والا صززيه يعني صدقيه

زلابه ,,,,, يعني بطه مالها معنى ثاني..

دبوووووووج ,,, ؟؟؟؟؟؟؟؟ بس انها شينه يعين اذا واحد قالها لك تراه يسبك..

وفيه كلمه معناها " لا " بس صعب كتابتها ممكن تصير تسذا (( تسو )) ولازم تصر براطمك وتسحب لسانك جوا وتطلع معك الكلمه وممكن يطلع معها صفيره ,, وبعد فيه " ءء " وتطلع من الحلق مثل اذا جيتا لبزر وقلت له عطني الكوره بيقول لك " ءء " وبيرفع خشته فوووووق وهو يقولها ...

هزع ... او تهزع يعني تطمن والا تنزل ,,, اللي تبي

منهو .... من هو وانتهينا

اشبك البلا فشكلك ..... مهيب تبعنا هذي حقت الحجاز.

مهيب والا مهوب ... بالعربي ( ليس ) مثل " هذا التفتر مهوب لتس يامنيره هذا التفتر لاختس حصه "

هق! وتي .... يعني ( اظن ) مثل " هقوتي انه فيذا ..

توحي ..... تسمع ,,, اذا جيته تسلم على شايبن من شيابكم تهزع على راسه وتقوله مساك الله بالخير بيقول لك وشوووو ,, بتقول له انت توحي (( في وسط اذنه على يسمعك ) وبيقول لك من انت ولده ... الخ "

ابووو ,,,,, هذي مالها معنى صزز بس ممكن تسمعها من البزران اذا قال واحدن منهم ابوو اللي شاف دوكفليد في الشارع امس (( يلعن ام النصاااااب )) وتسمع هالبزارين كلهم يقولون ااابوووو ,,,,, علشان ما يقهرهم .

تباوووو ,,,, هذا اذا كنتم بتلعبون كوره (( ولازم تكون كورة صب )) لازم يروح كل اثنين يتباوون , ويقول الاول انا بردقانه والثاني تفاحه ويرجعون ويقولون يابردقانه ياتفاحه (( والله لو يستخدمونها في كاس العالم اصرف من هالقرعه ))..

يوووووووووووووه نسيت اهم كلمه ,,,,, كتر ,,, ويقول الوا! حد لاخوه وهم يتغدون من صحن واحد " لا تاكل من كتري " تشلق ,,, يعني تشلق وشلون اقولها ذي ؟؟؟؟ المهم عكسها غط .... اكيد واضحه يعني وانت تاكل فول فيه فرق بين انك تشلق شلق ولا تغط غط ,,,,,,

جغمه ,,,, يعني جغمه !

بصرك ,,,, يعني بكيفك .... تقول لواحد تعال معنا ... ويقول لك لا منيب جاي ,, ترد عليه "بصرك "

بعدي ...... مهوب بعدي يعني بعدي بس بعدي .... يعني مثلا يقول الابو لولده ,,, يعدي ابوي بس مدري وشلون تنشرح ..

امصع ..... يعني اسحب بقووووووه مثل الام اذا قالت لولدها تراني بمصع اذنك لو ما درست

امحق ... هذي محتارين فيها العلماء بس انشالله خير وبيطلعون لها تصريفات للماضي والمستقبل ,,,, واللي عنده مثل عن امحق يلحقني لاني تورطت بهالكلمه..

يدربي ...... يعني يدحرج .... مثل واحدن من الشباب اسمه مدربي رويسه ....

دنينه .... سياكلنا من اول (( ااااان اااااااان )) ترا الاصوات لازم اللاعب هو اللي يطلعها (( حلوه اللاعب ,, اقصد المبزره اللي يلعبونها من اول ))..

دبق .... اسالو البنات القديمات في الاقلاع يعلمونكم اللعبه وطريقتها ..... كل ما ضاع زرار والا صاموله والا اي شي من القطع الصغينونه ,, دوره عند البنات ,, يجمعونه ويلعبون بها دبق..

كنادر .... جزمه ..


حمش ......... يعني رجال وشهم مثل بنت خطبها واحد وجو بنات جماعتها وحريمهم الكبار وقالولها يافلانه خذيه والله ان فلان حمش..

زبيريه ..... نوع من النعال وهو احسن مبيد للصوارير والضواطير ! والحشرات الزاحفه الاخرى

برندا ..... ميراندا,, لان اول واحد قالها في الرياض كان مزكم وقال براندا محلي ......... مصدي ياخزياه ....... اكثر من يقولها العجز الله يخليهم لنا ولا يحرمنا من حتسيهم ديرمه ....... روج الاولين يصطر ......... يصفق مثل ترا ابصطر كف يعني بصفقك كف..

سواني ,,, رح للجنادريه وانت تعرف وشي ,, ترا مهيب السوق ...

زبيل .,,, وانت رايح للجنادريه تشوف السواني اسئل عن الزبيل

سماط ,,, لا تروح للجنادريه , رح لاقرب محل مواعين وقل عطني سماط ,,,,, مفرش ناكل عليه ومنول نسميه سفره

دارسين ,,, عودان يحطونها الحريم مع الاكل بس مدري وشي..

مراصيع ,, وفي روايه اخرى رصع ,,, اسالو الحريم ويعلمونكم عنه

صبيب ! ,,,, انظر اعلاه مثله بس بطريقه ثانيه..مثال اذا طلعو بنات للسوق قالت حصه يالبندري ناظري بذالفستان والله انه يصلح في حفلة صديقتنا صيته وقالت البندري صدقتي بس ناظري بذاللي فوقه زيه بس لونه يختلف...

ترم ترم ,,,,, فلم كرتون نسميه منول ترم ترم وبعض البزران يسميه ابو تتنه (! ( اللهم لك الحمد )) وغيرهم يسميه ابوذنب (( ياربي لك الحمد )) وعيال النعمه يسمونه النمر الوردي..

قاف ,,,,, منطقه غير معروفه احتارو فيها اكبر علماء الجغرافيا والتاريخ والفلك والاثار في تحديد مكانها ودايمن تقول الام لولدها اذا ازعجاها " رح في قاف " اي روحه بلارده.


عوافي الله.... هذي الكلمه عقدت كل البزران دايمن تستخدمها الامهات لتخويف البزران اذا بغو يطلعون للشارع بالليل وتقول ترا بتجيك عوافيالله ..


جعل عيني ماتبكيك..... ودائما يستخدمونها العجايز والبنات يعني اذا البنت بغت تتميلح عند اخوها والا زوجها قالت جعل عيني ماتبكيك ابغى الحاجه ذي..... واذا عيا قالت العكس جعل عيني تبكيك واذوق حزنك يعني تمرض او تموت لاسمح الله.....

تو ...... اي قبل شوي . مثال مره اتصلت على خويي وردت امه وقلت وين عبدالمجيد قالت تو كان فيذا وعقبها طلع...

انشالله فهمتو الدرس الاول..


باااااااااااااااااااااااااااااي

[الرحال]

مساءك الله بالخير

اخوي

عبدالاله الرياض

بصراحه اختيار موفق لكلمات يا كثر ما تمر والواحد مفهي مو عارف معناها

بس انتي ما تلاحظ انك شرحتها بنفس اللهجه

يعني اذا انا اصلا مو عارف معاني هالكلمات وشلون تشرحها بنفس لهجتها

يعني فسر الماء بعد الجهد بالماء

تحياتي لك والله اني ابحرت معها وذكرتني عندما كنت هناك وشلون كنا نسوي باللي يسيرون علينا ونجلس نهرج ولا هم معنا


تحياتي لك

[هنوف نجد]

هههههههههه
فعلا فسرت الماء بعد الجهد بالماء
لوأن ماعندى خلفيه عن معانيها
كان ضعت مثل الرحال
يعطيك عافيه
خيوووووووووو

[امــــــ الليل ـــــير]

اشبك البلا فشكلك ..... مهيب تبعنا هذي حقت الحجاز

ايوا هذي للحجاز


انتبه خليك بنجد






عوافي الله.... هذي الكلمه عقدت كل البزران دايمن تستخدمها الامهات لتخويف البزران اذا بغو يطلعون للشارع بالليل وتقول ترا بتجيك عوافيالله


من عذرهم يوم تعقدهم الكلمه


فيه كلمه احسن واسهل منها












عووووووووووووووووووووووووووووو


ههههههههههههههههههههههههههههههههههههههههههههه

[عبدالاله$الرياض]

اقتباس: مساءك الله بالخير اخوي عبدالاله الرياض بصراحه اختيار موفق لكلمات يا كثر ما تمر والواحد مفهي مو عارف معناها بس انتي ما تلاحظ انك شرحتها بنفس اللهجه يعني اذا انا اصلا مو عارف معاني هالكلمات وشلون تشرحها بنفس لهجتها يعني فسر الماء بعد الجهد بالماء تحياتي لك والله اني ابحرت معها وذكرتني عندما كنت هناك وشلون كنا نسوي باللي يسيرون علينا ونجلس نهرج ولا هم معنا

اهلا وسهلا بالرحال منور حبيبي اما بالنسبه لتفسير معانيها فسرت ياقلبووو راجع الكلمات كويس وانت حتعرف يعني مب كل الكلمات فسرتها بس اظني بذلت جهد.

اقتباس: هههههههههه فعلا فسرت الماء بعد الجهد بالماء لوأن ماعندى خلفيه عن معانيها كان ضعت مثل الرحال يعطيك عافيه خيوووووووووو

\


ياهنوف مافسرتها لك انتي ادري انك من نجد كيف افسرها لك مدلخه انتي والا تستدلخين هههههههههه انا تاركها لبعض الناس الي مايعرفون بعض كلمات اهل نجد رجاء خاااااص اهل نجد لايردون على الموضوع مثل هنوف وغيرهاخخخخخخخخ هههههههههه على العموم مشكوره اختي هنوف على مرورك ولاتدخلين مره ثانيه ترا بتجيك عوافي الله هههههههههههههههههه..

اقتباس: اشبك البلا فشكلك ..... مهيب تبعنا هذي حقت الحجاز ايوا هذي للحجاز انتبه خليك بنجد

يمه خوفتني امير شكلك من الحجاز طيب طال عمرك انا بنتبه ومااتكلم الا في نجد ههههههههه

مشكور امير على مرورك يالغالي وعلى تعليقك.

[كل العرب]

المشكلة اني فاهمهن كلهن ولابووه صعوبة بهن

مدري علشان اني متأقلم مع القصمان او لا

الله يعطيك العافية

[السيل]

عبدالاله$الرياض




مرحبا باحلى عضو



شلونك طيب الله يحييك



اه بس لو تاخذ لك لفه شوي على المنتدى




يا عيني على نجد وهلها وي حليلها ويا حليل حتسي اهلها




منقول طيب منك يا بيي



ودئيييييييييييييييي يا مزيكا



يعني مكرررررررررررررركر يا بو الشياب





خوذو خبرة عضو قديم بالمنتدى مشطنا المنتدى تمشيط






عبدالاله$الرياض



احلى تحيه وتقبل مني الاحترام والتقدير

[عبدالاله$الرياض]

بسم الله الرحمن الرحيم

شكرا اخوي كل العرب على مرورك.

ويااخ السيل انا طيب ولله الحمد بس كيف انا مافهمتك تقول مكررر يعني وشو مافهمت قصدك.