السلام عليكم
اتمنى ما تكووون قديمه
هذي اخر قصيدة
للشاعر الكبير
الملقب ببستان الشعر \ محمد خلف الخس
حنا سمعنا الحكي من كـل هـذار
ناس تبـا تطمـع بنـا واتحدانـا
ناس تقول الدار ماهـي لكـم دار
والدار دار جدودنـا هـم وابانـا
الدار من ساقـان للباطـن حيـار
ملكن لنا دايم وهـي فـي حمانـا
موسعين حدودها يميـن ويسـار
غصبن على العدوان محدن عطانا
راسين فيهـا ماتخوفنـا الانـذار
لـو اننـا سهليـن كلـن وطانـا
لابكّر الوسمـي ونبتـن الاشجـار
وتخالـط المكنـان والقحويـانـا
ونبتت فياض الصلب صمعا ونوار
وحزومهـا ملّـيـح وقليقـلانـا
نرعاه بأقطاعن وسيعات الانشـار
قطعان كسب جدودنا مـن عدانـا
ماوالله احدن بطرفه يشعـم النـار
الا مطيـري طلـيـق اللسـانـا
محدن يطبه كود منهو لنـا جـار
يرعى وهو متـذرّي فـي ذرانـا
دامه قصير بيوتنا مطلـق اشكـار
يرعى ومستانس بأمـان وطمانـا
من طيبنا للجار عنـده لنـا كـار
يمحا عن الدنيـا وهـو مانسانـا
متيّهين الجـار مهديـن الاعمـار
حنا وحنـا اللـي بعيـدن مدانـا
وسلومنا نفخر بها قدم مـن سـار
للضيف والمنيـع ناسـم عصانـا
يروح منا لين يقطـع لـه ديـار
بوجيهنا يمـرح ويسـرح بأمانـا
ودخيلنـا مايقربـه طالـب الثـار
ياخذ سنه محدن لمسـه المسانـا
هذي سلوم مطير وافين الاشبـار
لطّامـة الضـد العنيـد لطمـانـا
وحنا هل الصمان وعيـون عمّـار
فالنـار وانكانـه زعـل ماشقانـا
حنا حماه انكان عج الرمـك ثـار
يدرون عما اقـول كـل احددانـا
ياللي تبا الصمان يمنـاك والحـار
دونـه معيّيتـن سواعـد لحانـا
حامينها علوى على قحص الامهار
ياويل من يوحـي عليهـن ندانـا
حامينها فـي كـل شلفـا وبتـار
ومطير حمـران النواظـر ورانـا
بقيـادة اللـي للطوابيـر كسـار
زعيم كـل مطيـر قبـل الخوانـا
هو الدويش اللي مثاره ليـا ثـار
يكسـر عروشـن كبـارن متانـا
فيصل ولد سلطان ماهو فالاقطـار
اليا وصله العلـم يقـف اوقفانـا
مقدم جموعن كنها خشـم سنجـار
وخيلـن تبـارا كنهـا الديدحانـا
خيلن عليها كل فـارس ومغـوار
بظهورهـا فرساننـا وومـرانـا
مكسرة راس العـدو ليـن ينهـار
ماهوب تـوه مـن قديـم الزمانـا
الحر الاول عقب خلافـه احـرار
ماكن الاول غـاب عـن المكانـا
عيال ابوسطره على الارض حضّار
الله منـهـم لايخـيّـب رجـانـا
لـو ان للافعـال دربـن ومعبـار
كان فعلـوا مثـل الـذي للجنانـا
مع لابتن عاداتهم دوس الاخطـار
لو قدمهـم نـارن تغلـي اغليانـا
جزّاعتـن بتّاعتـن دمهـم حـار
رجالهـم لامـن نخـي ماتـوانـا
حنا مطيـر مطوّعـة كـل جبـار
كم شيخ قومن طاح فـي ملتقانـا
يهتز من صولاتنا اللي ورا الطـار
يعـرف مراجلنـا وبعـد مغزانـا
ثلاثة اشهر نجتلد فـوق الاكـوار
هل الفعـول المعجـزات عقدانـا
كم جنبتـن خذولهـا جـل وبكـار
البعـد دون حدودهـا ماحـدانـا
من عقدانا قاطع السـرح مسمـار
مبيّـد الهجـن الخفـاف السمانـا
حيثه يوديهن مـن ديـار لديـار
يقطع بهن سرح العـدود اقطعانـا
ومثل بن لامي قاطع السرح لاغار
مصبّـح العـدوان فأيـة مكـانـا
ماهو مغزا واحد مـرارن وتكـرار
هـو وعقدانـا متعبيـن الهجانـا
كسّابة البل فـوق نسّـاع الازوار
يشعون قطعان الحفيـف اشعيانـا
ولاينسّون اللي للأضـداد جٍـزّار
حماة الضعون ان طار عقل الجبانا
جهز وبن جبرين فرسان وخيـار
مقدم جموعن كبر ضلعـان ابانـا
وبن بصيّص مودع عـداه دمّـار
ماهـو بقـول فـلان والا فلانـا
مقدم جموعن مالهـا كـل حكّـار
بفعولهـم يامطـيـر مايستهـانـا
الله مسلطنا على روس الاشـرار
مـن مبتدانـا قبـل لامنتهـانـا
والله يالولا اللي حكم كل الامـدار
عبدالعزيز اللـي حكمنـا وولانـا
انّا لنفعـل فبعـض العالـم انكـار
فعلـن يشوفونـه عيانـن بيانـا
حريبنا لو له مـع الشـط معبـار
سرى قبل وقـت السحـر ماتنانـا
يرثع قعـوده ويتلفـت ليـا نـار
مايقظبه حبـل الحقـب والبطانـا
يدريبنا اللي مادرى قبل وش صار
لايحسبـنّ سكاتنـا هـو جـدانـا
منقووول