ما .. أكـــــون " أنـا " .. !!

طلة البدر · 21-10-07, 01:19 AM

ما قلت لك ! لا جار وقتك / والملا بعينك / يضيـق !
تعال / اشيل الهم / عن قلبك / وانا اشرب / علقمه !
وما قلت لي ! انك لها / لا ثـارت بقلبـي حريـق !
تطفي شموع الياس / و تضوي بي / امآل ٍ معتمه !
وش فيك !! يوم ٍ زاد نفسك حملها / مـا لا تطيـق
صديت / كني من وجودك قبـل موتـي / معدمـه !!
وانا التي / أحتاج اعيشك لا غـدى حزنـك عميـق
أذاكـر الهـمّ بعيونـك / واستفيـده / وافهـمـه !
وانا التي / شديت حبل العشق مـن /عهـد ٍ وثيـق
وحلفت / لرضي سرّ بالك / قبل مـا ينطـق فمـه !
وانا التي / اخترت اكون الأهـل دونـك / والرفيـق
وانا التي ارفع جبينـك عـز / وغيـرك اهزمـه !
أنا / المحبه والأخـوه وان تبـي / اوفـى صديـق
ما يكفي اني صرت اشوف الموت / لعيونك سمـه !
ما قالو / ان الحب / شيمه تضحيه وحـس ٍ رقيـق
وان الأمل / من غير حب ليلـة مسافـر مظلمـه !
ما قالو / ان الشوق/ نـاره جنـة الحـب العتيـق
وان العتب / إلى روى بيـض النوايـا / مكرمـه !
والله / لو هم يحسبون النبـض / بحسـاب ٍ دقيـق
ما يعلـم الانسـان كـم لـه نبـض / الله يعلمـه
تعال / وارمي كل ما بك وسـط بحـر ٍ بـك غريـق
ثم احسب النجم بعيوني / لاشتعـل بـي / وارجمـه
واذا تبي انحر ضلوعي / بيـت واسـوار وطريـق
وابني صروح الخوف لجلـك لا غمرنـي / واهدمـه
واذا تبي تجعـل خفوقـي حلـم / علّـه مـا يفيـق
لـو انتظـارك مقتلـي / قـرة عيونـي / مبسمـه
ان ما جعلت / الليل / دونك من مصابيحـي بريـق
وان ما تركت / النوح / جرح ٍ مات واحيى / بلسمه
وان / ما نثرت العمر / بيدك / صبح ورد ٍ بك : يليق
وان ما نذرت / الحرف / يصبح منك / اعظم ملحمه
ما اكون / ذيك اللي تقول / ان جار وقتك / لا تضيق
بعينك الدنيا / وان اكوي الهم / واشـرب علقمـه !