في ظل غياب الدور الحقيقي لمرور حفرالباطن باكستاني يقطع الاشاره ويطلع في حينه ..!!
باكستاني موزع أجهزه الكترونيه اتصل بي في تمام الساعه الثانيه عشر والنصف ليلاً وقال لي البضاعه موجوده (( طلبيه )) بس انا يمسك مرور والحين سجن مرور موجود ..
قلت ليش ؟ وش مسوي ؟؟ جايب العيد ؟؟ قال لا بابا مافي عيد بس انا يقطع اشاره حق طريق رياض ..!!
قلت قطع الله راس العدو .. اجل خلك تستاهل خلك تخيس كلها للسبت وتطلع ان شاء الله ..
قال لا بابا شوف صديق من هنا ولا من هنا شوف واسطه شوف اي شي ,, قلت كفيلك وينه ؟؟ قال بالدمام .. قلت اجل اعتبرها استجمام كلها يومين وتطلع ..
قفلت من عنده واحسه زعلان ويدق علي الساعه وحده ونص بالضبط قال تبي بضاعه انت تعال افتح محل قلت وينك ؟ قال انا كلم نفر كبير وطلع على طول من سجن ..
يامرور حفرالباطن
تتأخرون بالحضور للحوداث نقول ماعليش
نفتقد الترتيبات والتنظيم نقول ماعليش
نشوف الزحمه في ظل غياب تواجدكم نقول ماعليش
بس كل شي ولا قطع الاشاره ولا من من ؟؟ من اجنبي والله العالم كيف طلع ومن طلعه ومن المستفيد !!!
كيف بالله شخص يقطع اشارة على خط دولي وسريع ويطلع في اقل من ساعه من الحجز ؟؟
والله لو كان سعودي ولا عنده واسطه كان اقل شي يجلس 24 ساعه وبعدها يطلع من الحجز وهالاجنبي خلال ساعه وحده طلع من الحجز ؟؟؟
بغض النظر عن كونه اجنبي لماذا التساهل مع الي يقطع الاشاره ؟؟؟
وليش يطلع هالعامل شخص مو كفيله ؟؟؟ ولا وكيل للكفيل ؟؟؟
تصدقون اني قلت للباكستاني عطني رقم جوال الي طلعك ممكن احتاجه في يوم من الايام :(
نتمنى ان لا تكون العدوى المنتشره في مكتب العمل بحفرالباطن وصلت لكم يارجال المرور (( واللبيب بالاشارة يفهم ))