راحت وقلبي عقبها اليوم منصاب
وشلون اميز يا بشر في ادروبه
حشمت شيباناً وحشّمت الاشناب
هجرتها حشمه و صارت عقوبه
ماود اسكر باب و افتح بعد باب
كويه بوسط القلب هم ما دروبه
صدوا و لا قالوا بعد ويش الاسباب
مثل السروق اللي بليلاً سروبه
ما كل جرح تفيد والله به اطباب
بعض الجروح تموت ما عالجوبه
امسيت انا و خلي على حب و اعجاب
واصبحت و انهم في هواي غدروبه
غشتني الضحكه على كشرت الناب
وبسنونهم سم الغدر قّطروبه
تغافلوني لين جوها به اجناب
ثم زوجها و اعلنوا بالخطوبه
يا قلب لا تحزن ترى الحظ قد خاب
اصبر و عند الله الجزا و محسوبه
راحت و انا يا قلب ماني بمنعاب
ولاني من اللي لازعل شق ثوبه
ادري النصيب اليوم مكتوب بكتاب
مالي سوى المكتوب لو عارضوبه
والله ما انساها و لو عارضي شاب
حتى العرب تنسى سلوم العروبه
#عبدالله_بن_فلاح