[align=center]السلام عليكم ورحمة الله وبركاته
نتكلم اليوم عن شراء أجهزة اللابتوب الجديدة
تعليق على بعض الأخطاء والنصائح وتعريف لبعض التقنيات الجديدة
الخطأ الأول
هو السؤال : وش أفضل جهاز ؟
الخطأ في هذا السؤال إنه عام
لأن فيه مئات الأجهزة ( حرفياً ! )
التصحيح :
وش أفضل جهاز يناسب طبيعة استخدامي ؟
الخطأ الثاني :
سؤال اللي تعرف واللي ما تعرف عن اقتراحاتهم ؟
السبب إن معظم المستخدمين ماعندهم خلفية تقنية قوية
فتلاحظ الاجابة تكون خذ من شركة كذا او كذا وبس دون ذكر موديل معين !؟
التصحيح :
سؤال من تثق بخبرته ويكون شخص متفهم لطبيعة استخدامك
وابحث عن المعلومات والمواصفات وجديد الأجهزة
الخطأ الثالث :
سؤال البائع عن رايه في الجهاز او اقتراحه ؟
عمركم شفتوا بائع يقول هذا الجهاز ما يصلح او فيه عيوب ؟
البائع عبارة عن مسوق ، ورح يسوي اي شي لابراز المزايا واخفاء العيوب
لذلك لا تعتمد على رايه بشكل مباشر ، بالاضافة الى وجود عدد كبير من البائعين ماعندهم خبرة
التصحيح :
مقارنة المواصفات بين الأجهزة بنفسك
وعدم سؤال البائع الا عند الاستفسار عن احد المواصفات
الخطأ الرابع :
أبي جهاز يكرف & يتحمل ؟
الكل يرغب في جهاز يكرف ويتحمل
لكن وش تعريف الكرف والتحمل ؟
اذا كان مفهومك للكرف انك تخبط بالجهاز وكل شوي طايح منك وتقول ليه يخرب او يتفكك
او انك تتركه عند بزارين وشغالين تقشيع في الكيبورد وتقول ماش شكله مب اصلي
تراك يالطيب فاهم الكرف غلط
التصحيح :
كل الأجهزة تتحمل وتكرف في حال الاستخدام السليم للجهاز
الخطأ الخامس :
ما رح اشتري الجهاز الفلاني لاني شفته يعلق او سمعت عنه ان فيه مشكلة
ساعتها ممكن تغير رايك مباشرة عن الجهاز
التصحيح :
تأكد من سلامة المعلومة بالبحث عن الجهاز وقراءة تجارب الآخرين
بالاضافة ان التعليق او المشاكل غالباً يكون سببها software (النظام او البرامج)
يمكن ابوالشباب مغير النظام ونصف التعاريف مفقودة ويقول الجهاز زبالة
الفرق بين الجهاز الغالي والرخيص ؟
يمكن الكل لاحظ نزول أسعار الأجهزة مؤخراً
حتى وصلت 999 ريال لجهاز لابتوب جديد
وش السالفة !؟ الدعوة فيها نصب ولا الدعوة صارت أصلي وتقليد !؟
لايزال يوجد اعتقاد سائد عند الكثير ان الجهاز الممتاز لازم يكون غالي
يمكن يكون هالكلام صحيح في بعض المنتجات لكن ما ينطبق على الأجهزة
سبب انخفاض أسعار الأجهزة مؤخراً :
1- تعدد الشركات المنتجة واختلاف الأجهزة
2- تعدد الوكلاء وتنافس محلات البيع بالعروض
3- إنتاج أجهزة للاستخدامات المتخصصة بدلاً من انتاج أجهزة شاملة
4- التطور السريع للتقنية
5- تصنيع الأجهزة وملحقاتها في الصين بإشراف الشركة الأم
مختصر الكلام أعلاه
إن الجهاز اللي شريته بـ 4000 قبل سنتين
ممكن تشتريه اليوم بـ 2000 بالراحة[/align]