يا حمامه كفى الله لا يجزاك خير &&& من صلاة الصبح وانتي تجرين النياح
كان من جور المحبه غدا شرك شرير &&& والله اني ذايق ٍ قبلك السم الذحاح
وكان لوعاتك من الوقت ومفارق عشير &&& والله ان قلبي من فراق خله ما استراح
وكان مفجوعه على فقد عش ٍ مستدير &&& والله اني فاقد شوف نجد ٍ والفياح
من سمعتك يا حمامه وانا ما اقول غير &&& لى متى هذا الشقى؟؟ واردف الونه صياح
ما عليك خلاف عندك جناحين تطير &&& مير انا وشلون بانزع وانا ما لي جناح
مالي الا اسوق قلبي مع الغربي عصير &&& واسهر عيوني لامن شعاع البرق لاح
اتذكر واتوجد على ما فات مير &&& ما ورا زود التوجاد والذكرى صلاح
قبلنا شالح توجد على أخوه الصغير &&& راح أخوه وعقب ما راح ذيب الخيل راح
واتوجد وجد من صار شره مستطير &&& وجد سعدون العواجي على طيور الفلاح
كل ليل وعبرتي تلتقي عقب الأخير &&& تبتليني دمعة العين لحد الصباح
والبلا لا صاح قلبي ورا الضلع القصير &&& عوية الذيب المذير مع الحزم البراح
لا بغيت ادله من الهم واسلا واستخير &&& حدني من حده القوم بزنود السلاح
من بعد نجد العذية وانا ماني بخير &&& التفت لا اقفيت عنها تلفات الطياح
واتثاقل خطوة الرجل واقدامي تحير &&& وكن صدري باجداته زواريق الرماح
يوم اجيها مثل ورد الضوامي للغدير &&& اتعجل بالمجي واتباطا بالمراح
دبرة الله مجري الفلك بالبحر الغزير &&& جاري حكمه علينا مثل مجرى الرياح
واتعبتني حاجة ٍ وردتني كل بير &&& ارتوي هماج والناس يروون القراح
واحد ٍ حظه يشيله على شداد البعير &&& واحد ٍحظه لا شاله تكرسع ثم طاح
من ثلاث سنين وانا اتحرى للبشير &&& والبشير ابطا وانا سدي من البعد باح
يا بشير الخير عجل عسى دربك سفير &&& لا تخلي للسهر جفن عيني مستباح
كل يوم اقول بكره يجي منك نذير &&& وانقضت الايام والحين ما صار اللقاح
ما توَرد جمة البير بسلوك الحرير &&& ولا اطلق المسجون هرج التعلل والمزاح
ما لقينا بالزمن كود ما يلقى الفقير &&& طامع ٍ بالمال والمال بيدين شحاح
يدري الله والعرب مادروا باللي يصير &&& مير نوحي ياحمامه واجاذبك النياح
العرض العادي
