مطلوب !!

[عـــز الخوي]

السلام عليكم ورحمة الله وبركاتة

شباب ابي احد يعطيني معلومه عن معرض او شخص يقدم تقسيط سيارات مو نظام تاجير منتهي

بالتمليك ابي تقسيط مو مشكله يكون بالحفر او برا الحفر بس ابي الصدق والصدق والصدق فقط

وله مني الدعاء


الله يوفق الجميع ان شاءالله ، ، ، ، ،

[عزوزالحفر]

والله حتى انا ادور

اذا لقيت أبشر بالسعد

[عـــز الخوي]

مشكور اخوي عزوز الحفر والله يجزاك كل خير ،،،،

اتمنى الاعضاء يفيدونا ان حصلو احد

[abo torki]

فيه معرض مشرع العتيبي بمعارض الحفر ومعروف اذا جيت عند الساحه اسئل عن المعرض ويدلونك عندة سيارات تأجير منتهي بالتمليك
ومعرض ثاني اسمه الشهري يقسط دداسن ..

[عـــز الخوي]

مشكور اخوي ابو تركي

انا ابي تقسيط مو تاجير منتهي بالتمليك انا محتاج سيوله نقديه يعني اخذ الددسن وابيعه على طول فا المعرض اللي تعرفه يقسط دداسن عطني خبر انت او الاعضاء الله يجزاكم كل خير ،،،،

[تركي الوايلي]

شوف معرض الجنوب انا اخبره يعطي سيارات بنظام التقسيط

وبالتوفيق لك .

[عـــز الخوي]

رحت لمعرض الجنوب يعطي تاجير منتهي بالتمليك مايعطي تقسيط

تكفون اللي يعرف احد يعطي تقسيط يعلمني وربي اني دورت لين داخ راسي ومو شرط معرض لو احد يعرف شخص يقسط سيارات يعلمني او يعطيني رقمه انا اكلمه او اروح له

الله يجزاكم كل خير ، ، ، ، ،

[فيصل الصقر]

يالحبيب شف معرض الزبيدي يقسط سياراات بشرط الراتب على الراجحي
واتوقع انه الوحيد بين معاارض السيارات بالتوفيق

[عـــز الخوي]

كل عام وانت بخير اخوي فيصل

مشكور على الخبر وربي يجزاك كل خير وماقصرت لا انت والا الاعضاء اللي ردو على ,,,,

بس انا راتبي مو على بنك الراجحي وبكذا مااستفدت ابدا ،،،،

[abo torki]

ياعزيزي عندك معرض الشهري موجود مقابل الساحه من الخلف معروف يقسط ددسن وانا جيته قبل شهر وستفسرت منه يعطيك ددسن القسط 1600 وتطلع عليك 106000 مائة وسته الف ويشتريها منك معرض مشرع العتيبي بالعقد بـ 60,000 الف كاش .
وماعليك الا تروح المعارض وتسأل عن معرض الشهري .