مشاركتي الشعريه في ندوة المرشح عبدالله فارس الاسمر في الكويت
ما جيت ادور صيت ومدور شان
جيت بحمية حاتمي ما يراوي
/
سلام ياللي من نصاكم فلا هان
زبن الدخيل ومبعدين الهقاوي
/
مابه اجناب وكلنا ربع واخوان
ي مرحبا باللي يجينا عناوي
/
سلام واللي لا حما العلم ما بان
ما نفرقه عن لابسات الغطاوي
/
وانا لبيبي عندي الطيب مجان
ماقدمه راجي مديح وحكاوي
/
قصيدتي هذي بها اشكال والوان
ناموس من راسه على العز ناوي
/
والله لا اعلقها على لسان ولسان
الين ما تصدح باذن كل هاوي
/
يالبرجسي مادام لك ربع واعوان
اهل الكرم ومزبنين الجلاوي
/
فضول دونك مع مغيره وكثران
ضرابهم يوم الوغا ما يلاوي
/
لبيب مع صرخه وغزي وسلطان
وبرجس حزامك عن جميع العزاوي
/
ابشر بعزك لعنبو كاينٍ كان
الموت دونك والحياة متساوي
/
يعني على ما قال في ماضي الازمان
ابن الرشيد اللي على الطيب غاوي
/
(اضرب على الكايد ليا صرت بحلان)
ما تستوي القمه يدين الحياوي
/
لا عودت لمزارق الطيب فرسان
تاريخنا في قمة المجد ضاوي
/
كبارنا يوم المواقيف شجعان
وصغارنا عند البلاوي / بلاااوي
/
وردينا عند المهمات ما خان
ليا انتخا اشهر من سبوق النداوي
/
عاداتنا نرجح على كل ميزان
وفعولنا يشهد لها كل راوي
/
تكفون لا يلحق بنا اليوم خذلان
ونجر ثوب المهزله والمساوي
/
خويكم وان زان من طيبكم زان
والطيب عدٍ في يديكم رهاوي
/
اردا فعايلكم بها يعجز الجان
واكبر مصيبه مثل شرب القهاوي
/
وترا الكلام ليا فقد زبدته شان
سلام عن كثر الحكي واللغاوي