طال الصبر يا ذيب والحظ ما قام
طال الصبر يا ذيب والحظ ما قام = مدري علامه ما انتهض من منامه
تظنه اتوفى ولاقيه قــــدام = والا يضيعني بيوم القيامـــــه
يا حظ بعدك عايش مثل الأيتـام = من بعد موتك ما عرفت السلامـه
خليتني للوقت يحكم بالإعــدام = يبيني أحيا مثل بوم وفدامــــه
ذنبي الصراحة بين حاقد ونمـام = تجار نقل الهرج بخبث ولآمـــه
وانا على الفطرة على دين الإسلام= واضح وضوح البدر ليلة تمــامه
رضعت من نجد الشجاعة والإقدام= وأسقيت ورعي من حليب الشهامة
الوقت ضدي فارض صعب الأحكام= ومن لا عرف للصقر ظنه حمامـه
وقت الحصاني بين فندم وهنـدام = من مظهره يخدعك ، حتى كلامـه
تعلم اللهجة عرف كل الأنغــام = وكسب الرجال العاقلة من سلامـه
تمسكن بخبث ، تمكن بالاختـام = وصار يتصرف دون حد وعلامـه
هذا الأمر يا ذيب من عدة أعوام = وهذي الحقيقة دون عذل وملامـه
وهذا البحر صعب تحديه لو نـام = ما بين مد وجزر صعب إفتهامـه
خلك مع إللي تفهمه دون أوهـام = من طاوع الأوهام يلقى الندامــه
أبيك تكشف كل حصني وهــدام = وتعرف عدوك قبل يرمي سهامـه
وترعا عيالك كان فكرت قــدام = درعك وسيفك في شديد العتامـه
أهل الكرم والمرجلة طول الايـام = واهل الوفا وقت الوفا والشهامـه
وان كان تنساهم وترضى بالازلام = لا بد ما تخسر ومنك الملامــه