اتصل بادارة الموقع البحث   التسجيل الرئيسية

 

إعلانات خيرية مساحة مجانية للاستفسار مراسلة الإدارة

======================================================================================================================


العودة   منتديات حفر الباطن عاصمة الربيع > القسم الادبي > القصــه والقصيــده

القصــه والقصيــده قصص الماضي وحكايات الحاضر

إضافة رد
 
أدوات الموضوع انواع عرض الموضوع
قديم 11-05-09, 08:46 PM   رقم المشاركة : 1
سالم الظفيري
عضو فعال
الملف الشخصي






 
الحالة
سالم الظفيري غير متواجد حالياً

 


 

قصة أهل البويت

في أواخر القرن الثاني عشر الهجري اجتمعت ثلاث قبائل عربيه
هي عنزة وزعيمها جديع بن هذال ( راعي الحصان) , وشمر وزعيمها مطلق الجربا
(زقم العيط ), والظفير وزعيمها دغيم بن سويط ( خيال القروا).

اجتمعوا في فيضه عرفت فيما بعد بفيضة الاديان ,
والأديان : هي جمع دين , والمقصود العهد او القسم ,
فـالأديان ؛ هي العهود التي تعاهدوا عليها وأقسموا ثلاثـتـهم على القيام بها ,
وتم التعاهد ببيت شيخ الشيوخ جديع راع الحصان .
وفي المسلسل كان يظهر جديع الهذال على انه كبيرهم وزعيمهم ؛ وقد كان كذلك.
(ولو ان اسماء الشيوخ ليست كما هي في الحقيقة) .

اجتمع هؤلاء الشيوخ الكبار ومن معهم من شيوخ قبائلهم ,
وتشاوروا في امور هذه القبائل , وماتقتضيه المصلحه العامة
لتلك الـقبائل , طوال فترة وجودهم في تلك الأراضي .

وأتفقوا عـلـى ان يجـنـبـوا قبائلهم الخلاف, لما فيه من الخير لـلجميع ,
وذلك بتحديد كل الأمور التي تجر الخلافات عادة ً
مثل المرعى والموارد وغيرها.

واتفقوا على أن تفرش البيوت ؛ بمعنى انه يحق لكل شيخ من الثلاثه
أن يستعيد أي مذنب او مجرم من قبيلته
قد هرب والتجىء الى احد الشيخين الآخرين ...؟!

لكي لاتعم الفوضى , وذلك ان المعتدي المطلوب في جرم ؛
مطارد من قبل طالبي الثأر , فسيطلبونه من مجيره اما بالقوه او بالحيله!؟
ممايؤدي الى مشاكل قد تـتـشعب وتـكبر ولربما تشمل القبائل كلها .

فبطبيعة الحال , الشيخ مجبور ان يدافع ويغضب من اجل أفراد قبيلته ومصالحهم ,
والا تركوه وتبعوا غيره ..؟!

لذلك اختصروا المسأله وقالوا نـفرش البيوت , يعني اذا حاول يحتمي بك شخص
من قبيله غير قبيلتك ؛ فالطريق مفروش لشيخه يجي وياخذه ... ويقتص منه ...؟!

وبالمناسبه فيضة الاديان يقولون اجتمعوا بها لأنها المنطقه الوحيده اللي مربعه
وهذا مهو صحيح , لأنها أصلا ً منطقه ماينبت فيها شيء...!!
رغم ان وديان عنزة الخمسه تصب فيها , وذلك بسبب طبيعة تربتها .
وديان عنزة : هي مدينة عرعر حاليا ً ... وهي ديار الدهامشه والصقور من العمارات؟!

وفيضة الأديان من ضمن اراضي الجمهورية العراقية حاليا ً,
وهي على بعد عشرين كيلوا متر من الحدود السعوديه .
فالربيع قريب منها وليس بها .

المهم
ظلت هذه القبائل على أحسن حال
الى أن قام مفوز التجغيف الشمري بمطارة رجل , قيل انه اسير لمفوز وقيل غير ذلك ,
المهم
كان الأسير يركض بشدة متوجها ً لبيت ماجد الحثربي الشمري ؛ يريد ان يدخل عليه ,
ليتخلص من آسره؟! ولما أقترب الأسير من حمى بيت الحثربي
( وهي مسافه لها قياس معين عند العوارف , هل يكون دخيل اولا و يقال انها المسافه التي تقدر راعيه البيت ان تحذف الطنب او المطرقه لها بمعنى ان احذفت الطنب و عدا الرجال فهو داخل البيت ).

ضربه مفوز التجغيف بالشلفا وذبحه , وام ماجد تشوفه ,
ويوم شافت اللي صار ,
وولدها غايب , رمت عمود البيت ....؟!

ويوم جا الولد وشاف البيت , سأل امه ؛ وقالت له السالفه كيت وكيت , والبيت
اللي مايفك دخيله مايستاهل اللي ينهض عموده؟

عـندها جلا ماجد يم خواله , يتحيـن الفرص ويفكر كيف ياخذ ثاره ؟!
وخواله هم الشجعان المعروفين عمر وفهيد أبناء عضيب المدلاه ,
اللي فكوا ذود مطلق الجربا بعد اصابته ومقتل ولده بكون العدوه ,
وهالكاليوم وخذت شمر, أخذها الوهابي , ماسلم لهم غير هالذود ,
بسبب شجاعة هالأخوين
واللي قام مطلق يذبح لشمر منه , يوم هو جالي لسوريا
لأن معظم شمر بدون بيوت وحلة وحلال ,
ولولا هالذود لـمات الكثير منهم جوعا ً .

المهم
وكل يوم ماجد يروح الصبح مع طيره سنع قناص , ويجلس على له راس حزم ..!!
ويرجع لخواله بليـّـا صيد , ولا قلطوا له الزاد ماياكل ..؟!
وحاله من سيء لأسوء.

قال خاله غدي هالولد عاشق , وقام وارسل عليه بنته
حتى تجس نبضه , لكنه مالقى لها بال!
ورجعت لأبوها وقالت له ؛ ماهو عاشق ولاهو يم العشق ..؟!

يوم رجع لزم عليه خاله , ورد على خاله بالقصيدة اللي يقول مطلعها :





ياعمـر يالمـدلاة يانـازل الخـوف اذهبتنـي وانـت تنشـد لـك ايـام
ياخو فهيداللي بك الطيب ما صـوف والكل منكم يشبـع الطيـر لا حـام
لو عرضولي لابس الخصر وشنوف بارض الخلا عن دار كفرن والاسلام
لو صوتت باللة وامانة عن الخـوف مابية لو انة علـى الـروح عـزام
ولو جيبلي تمرة شثاثا مع الجـوف ولو حنطة البلقا مع حنطـة الشـام
ولوتمن المشهد على مي حجـروف وحطو فقـار وسيـح الـزاد ايـدام
مابية لـو زينلـي الاكـل بالحـوف ما تقبلة نفـس عليهـا الطنـا زام
شفي مفوز شمعة القـوش منقـوف يازبنهن وان جـن بعيثـا ورضـام
حمايهن لا جمـع الـدو صفصـوف مثل الحباري عن سنا الطير خـرام
اللي كساني ثوب اسود وانا اشـوف خلة يقع في سهر عيني وانـا انـام
ماتشوف حالي كنها حـال ابالعـوف او حال مسكين عن الـزاد صـوام
من عقب ماني قنب صرت انا صوف اجـود للحضـر المقيميـن فـحـام
اتية لو النزل طـوف ورى طـوف واسطي علية بربعـة البيـت قـدام
في كردة حـدة شطيـر ومنحـوف ولالحمت عنـد الصواويـغ بلحـام
حنا على حرب المعادي بنـا نـوف امر من عود الشرى عنـد الالـزام


وبعد ماقال هالقصيدة , راح يم التجاغفه يبي ثاره!؟
و راح لهم بالليل و راح يم عمته بالاول قالت له تراهم منتبهين لك و ماخذين حذرهم مير ما تقواهم يا ماجد و عوّد لخوالك قال ما جيت عشان اعوّد لكن مرت هكالليله و ما سوا شين
و امرح عند عمته يوم اصبح قال لها عطيني لبس من عندك
ولبس ملابس مره , وعباه ,وهو بعد عليه قصايب ( جدايل بمعنى اخر ) ,
فمحد دري له .

وماجد لبس هاللبس لأن التجاغفه ماخذين حذرهم منه
وكانه جا , اكيد انهم يطرحونه , أو على الأقل
مايتمكن من مفوز التجغيف ..؟!

المهم راح كنه حرمة تـبـي تـروي , ومفوز عند المارد
ويوم قرب لمفوز , وهو يضرب مفوز مع رجله بالخنجر
وهو يهج!؟

طبعا ً قصدة يقطع الرجل اللي تعدت على حرمة بيته!؟

واول مازبن , زبن كبير الشيوخ راعي الحصان
ودخل على الحريم

وجا الجربا والتجاغفه بثره , وقالوا لجديع وش حاصل ٍ بيننا؟

قال جديع ما حاصل اختلاف ان شاء الله ؟

قالوا رجالنا عندك!؟
والبيوت مفروشه , والعهد ماهو خفي ٍ على احد
واللي جاك ؛ يدري ان ماله دخاله ...؟!
وظل جديع يسايرهم ويحاول انه يصلح الأمر بشيمه!؟

واخت جديع تسمع , وعرفت انهم تولجوا أخوها
وان ماله مصد عن تسليمه!

قالت جديع حظه كبير وراعي بخت ,
واكيد انه يبي يسلمك لهم
مار وانا اختك هذي بنت الحصان
ان ركبتها مابالعرب اللي يلحقك
وهج بعمرك ...؟!

واركب المهره ياماجد
والعمر ياشامان ,
وطلبوه وعجزوا يلحقونه
ويدخل على الصويط .

وكانت ام دغيم بن سويط توها جايه من الحج
ودخل عليها بالمحرم ,.....!!

وقالت لولدها , وش نيتك لاجو الرجال؟
تبي تسلم لهم دخيلك؟؟؟؟

قال : ماني مسلمه , وغدي الله يفرجها...!؟
قالت قالت يا وليدي ان سلمتوه اقطع ما ارضعتك منه و ترى البويت ماحضر العهد؟!

وجا الطلب , قالوا لدغيم وش حاصل ما بيننا؟
قال ما حاصل ٍ اختلاف؟

قالوا نبي رجالنا اللي عندك؟!
والبيوت مفروشه على العهد!؟
واللي عندك ماله دخاله؟!

قال الرجال عندي مهو غادي
مار عيّنوا خير و الصلح زين وانا حاضر بالعوض
يبي يسايرهم
لكنهم , رفضوا بشكل قاطع..؟!
وهو يحاول بهم , وهم مصرين؟!
لأن الضربه توها صايره وهم جايين بفورة الدم

الين ما قال دغيم : اسمعوا يا شمر الرجال دخل على هالبويت
والبويت ماحضر العهد ..؟!

قالوا تسلمه او نفعل ونفعل
قال مااسلمه
قالوا (( عليك مردود النقا يا بن سويط ))..( اشارة التحدي)
قال : (( ظهورهن ما بريّن يا شمر)) يقصد ظهور الخيل لازالت مدميه

وهم يتقابسون , وصار معترك ,
لكن السويط حموا دخيلهم ...؟!

وفكه الله

ثم ان ماجد تشكر منهم ,
وقالهم جزاكم الله خير وماقصرتوا
ولعلمه ان المشكله راح تكبر

قالهم
بس وصلوني لحايل عند أبا الميخ
وابا الميخ هذا يدخل دخيل العق

ووصلوه لأبا الميخ وقال قصيدته






ياراكب حمراء من الهجن حايـل مبرية الذرعان حمـراء سجلـة
حمراء تشادي ممرسات المحايـل وان سل مخطرها مع البيـر والة
ما ضالني غي السويطات ضايـل دغيم ثنى بالسيف دونـي وسلـة
سويطات ماهم من هزال الحمايـل لباسـة لـدروع ماجـوخ ملـة
سويطات ماهم من هزال الحمايـل من ماكر يفرس من الصيد جلـة
واخو دغيما القرم وافي الخصايل دخيلهم مـا يمشـي الحـق للـة
واليوم احمد اللة بهاك المسايـل بايمـن زرود ونـازل عثعثـلـة
وارعى بضل عصيل ولاني مسايل عنـد المزينـي مطلـع شذرتلـة
ومانش ما لمـت عليـة القبايـل ياكود مـا رب المـلا صافطلـة
ولاسلت عن راس بة الزوم طايل ياكود سعدون وانـا مقنـي لـة



وقاموا جماعة ماجد ونشروا فوق بويت
العجوز الرايه البيضا , اللي لهلحين على بيوت السويط

وهي دايم تذكر بالشعر بشكل مجازي يقولون
تنشرلك البيضا , او الرايه البيضا
يعني مثل هالرايه
وليس قياسا ً عليها .







رد مع اقتباس
قديم 11-05-09, 10:14 PM   رقم المشاركة : 2
شــغــموم
قلم متميز
الملف الشخصي







 
الحالة
شــغــموم غير متواجد حالياً

 


 

رد: قصة أهل البويت

نسأل الله ان يتجاوز عن هؤلاء الاعراب لان ايواء المجرم ملعون صاحبه نسأل الله العافية

اقتباس:
وهالكاليوم وخذت شمر, أخذها الوهابي



بصراحة وقفت كثيراً عند هذه العبارة وهل يعقل من ابناء السعودية من لازال يطنطن
على دولته والاسرة الحاكمة بالوهابية ...






التوقيع :
اللهم صلي على محمد وآل محمد


@sgmoom1 تويت

رد مع اقتباس
قديم 31-05-09, 05:44 PM   رقم المشاركة : 3
راعي الهــدد888
عضو نشط
الملف الشخصي






 
الحالة
راعي الهــدد888 غير متواجد حالياً

 


 

رد: قصة أهل البويت

الله يعآآفيك







رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 10:14 AM


Powered by vBulletin® Copyright ©2000 - 2017, Jelsoft Enterprises Ltd.
تعريب :عاصمة الربيع

تصميم وتطوير سفن ستارز لخدمات الاستضافة والتصميم