عليكم السلام والرحمة يا تركي
هو بيني وبينك تقدر تتخيل إن هذا بيتكم وإنك جالس في المكان الفلاني وتخلق جو يخليك ولا هارون الرشيد في زمانه . لكن ياخوك عجزت اهضم سالفة إن عندك قصر او فيلا فخمه " والدينمو " ماهو على يسارك وانت داخل الحوش . كل بيوت حارتنا احصل الدينمو على اليسار ، ما أدري وش الحكمه ! .
بعدين وش الأيام الخوالي اللي تقصد ؟ . يا إنك تسذوب :) أو إن ذاكرتي معطوبه . الأيام الخوالي اللي أذكرها هي أيام الثانوي . لما كنت أجلس " بالدكه " عند الشيبان ، تخيل في هالوقت وبعد صلاة العصر مباشرة أنتظرهم يطلعون من المسجد عشان أقهويهم ، وأستلم ثلاث ساعات وأنا أقهويهم . ماكان يفرق معهم الجو ، إنتصف عمر الواحد فيهم وهو ما عرف المكيف ، وتبيهم بالأخير يقولون يووه وش هالحر ؟ . حتى المكيف الصحراوي اللي كان بالحوش يقولون مانبيه . اذكر مره كنت جالس اقهويهم وكأني داخل فرن من شدة الحر ، الوكاد فجأة وهي تهب علينا عجة ، ما صدقت خبر ، وأنا أخمط صحن الفناجيل والماء واوديهم للمجلس ، وأرجع باخذ القهوة والشاهي ، قال أبوي ــ الله يغفر له ــ : وين بتوديهم ؟ . قلت جتكم عجة يالله قوموا ، والله إني أذكر اقولها وأنا متحمس ومتأكد إنهم بيسمعون كلامي . قال واحد من الشيبان ماعليه ، وهو يعدل جلسته ويتلطم . قال ابوي هات القهوة والشاهي . هالموقف عجزت أنساه .
الشرقية حلو جوها الإسبوع اللي طاف ، فيه نسمة ّ هواء من الصباح لين بعد الساعة 9 بالليل ، وما دام الرطوبه ماجتنا لهالحين فالأمور طيبه .
تعال بدري ترى كلها اسبوعين وتبدأ الزحمه ـ الله يعين ـ .