اليو عندي قصة تعتبر من اروع القصص اللي سمعتها في التراث والشعر الشعبي
هذا واحد اسمه بصري الوضيحي الشمري شاعر غزل وهزل يوم كبر وتقدم به العمر حس بالندم على شعره ومافيه من غزل ومن أمور هزليه فحدثته نفسه بالتوبه وعزَم على التوبه وقال لولده الكبير انا ودي اتوب وودي اروح احج عسى الله يغفر لي ويرحمني المهم نوى الحج هو وولده وتكلوا على الله وسافروا الى بيت الله الحرام
يوم وصلوا مكة دخلوا الحرم وطافوا وجا بصري يبي يحب الحجر الاسود وكان عند الحجر زحمة شديدة يوم وصل الحجر كان فيه جنب الحجر امراة جميلة وكانت شديدة البياض وفارعة الطول يوم شافه بصري ضاعت اموره وبدال مايحب الحجر حب البنت البنت زعلت وقالت كيف تسوي كذا وانت بالحرم فجا ولده يبي يلملم الموضوع وقال تايه تايه يعني (مهذري ومخرف ) فقال بصري القصيدة يرد عل كلمة ولده
((يمكن الرواية وبعض الابيات تختلف شوي لأن القصة قديمة وتختلف الروايات بس هذا المشهور
وبصري توفي عام 1250هـ ))
التايه اللي جاب بصري يقنه=جدد جروح العود والعود قاضي (( يقنه =يجره ويسحبه))
جينا نحب ونطلب الله جنه= جنة نعيم ويوم يابس لحاضي
ياليت كانت حبتي في معنه= يوم العيون عن الخوامل غواضي
يامن يعاوني على وصف كنه= اشقح شقاح ولاهق بالبياضي
لاريحة قشرا ولاهي مصنه= ريح النفل بطمطمات الفياضي
ونهودها للثوب الحمر شولعنه= حمر ثمرهن واقفات غضاضي
والخد ذابح القلوب المرنه= براق مزن لاعج اللون ياضي
ياليت سني على وقم سنه= بايام مابيني وبينه بغاضي
ايام جلد الذيب عندي محنه=نصبح وزرق الريش لهن انتفاضي
وا جرح قلبي جرح واد وطنه= غر المزون اللي وطنه وفاضي
والبيض قبلي محسن عذبنه= ونمر على وضحى جرى له عراضي
والبيض كم واحد يبسنه= يبسة شماشيل العذوق النفاضي
عزي لمن غر الثنايا كونه= واركن على كبده كوي عراضي
شوفي بعيني والخدم يركبنه= بنت الشيوخ مخدمين الفياضي
على اشقح من زمل ابوها مظنه= ركبت عليه اتشنطح باعتراضي
بمشجر من سوق هجر مغنه= على خياطه ناب الارداف راضي
وين انت يامشفي على طردهنه= انا طويت رشاي واقفيت قاضي
احد يطيح بنار واحد بجنه= وترى الحضيض اللي له الرب راضي
يوم رجع بصري من الحج سألوه جماعته : هاه يابصري وشلون حجكم فقال بصري هذه الابيات التي اصبحت مثلا يضرب الى وقتنا الحاضر
ياليتنـا مـن حجنـا سالمينـا
كان الذنوب اللي علينا خفيفـات
رحنا نبي نخفف ذنـوب علينـا
وجينا وعليها كثرها عشر مرات
الله يرحم بصري ويغفر له
واعذرونا على الاطالة وارجو ان تنال هذه القصة اعجابكم
وسلامتكم،،
م.ن