0
0
0
@الجزء الثاني@
>>بيت بو متعب <<
اخذت جود الجوال ودقت على ريووف بنت عمها
ريووف :-اهلين جوجو
جود :-اهلين ريووف اخبارك
ريووف :-انا بخير الحمد لله .. عايشين
سكتت جود شوي حست بشي مو طبيعي من برود ريووف ..
قالت بهدوء :-ريوف فيك شي
ارتبكت ريوف شوي وقالت بابتسامه حزينه :-مافيه شي جديد ..
مسكت جود اعصابها وقالت :-لا تقولين عمة رجلك مرة ثانيه
رجعت ريوف شعرها الاشقر ورى اذنها وقالت وهي تثني رجلينها تحتها :-الله يسامحها
عصبت جود :-الله لا يسامحها ياشيخه ..
قالت بطيبة قلب :-تعودنا
انهبلت جود :-لو مكانك شرشحت هالعانس الي ماوراها شغله الا رمي الكلام يمين ويسار ..
قالت بصوت رقيق كله محبه وشلون مايكون صوتها رقيق وهي بتنطق اسمه :-من اجل عين تكرم مدينه وعشان خالد يهون كل شي ..
تنهدت جود بصوت عالي :-بدينا في كلام الحب
ريووف :-هههههههه ياشين الغيره
عصبت جود :-انا اغار ههههاي لا يمكن حياتي
ريوف :-اعصابك طيب لا يصير فيك شي
جود وهي تناظر في الساعه :-ريووفوه ووجع لازم انام بدري ورانا مسراح بدري
ريووف :-ياي وناسه
جود بحماس :-تعالي معنا بلا سخافه
ريووف بتردد :-والله مدري عن فضوة خالد
تنحنحت جود وقالت بلهجه فيها خبث :-علينا انتي لا بغيتي الدرب مشيتيه
ريووف :-هههههههههههههههههه وجع استحي
قالت ببراءه :- وجعين ماقلت شي انتي الي تفكيرك غلط
ريووف بصوت فيه ضحكه :-انا
جود :- لاجدتي يالله سيو بروح انام وبليز حاولي تجين والله من زمان عن المكاشيت
ريووف مو تايهه عن طبع جود ولا عن حماسها الزايد للطلعه قالت بجد :-عارفه انك تحبين الشي الي يغث ماجد عشان كذا بتتشققين وناسه
طار النوم من عيون جود وقالت بعصبيه :-من قال له
ريووف :-غشيمه عنك انا
ارتبكت جود وقالت :-بصراحه ايه على ايش شايف نفسه ابوي الي المفروض هو كبير العيله والي المفروض رايه يمشي على الجميع ما يسوي شي الا يشوره
قالت ريووف بعقلانيه :-شي طبيعي هذا بدال ماتفخرين بولد عمك تعصبين
ارتفع ضغطها :-افخر بايش يا حظي باستبداديته (لحقت على عمرها) تكفين ريوف لا تزعلين عشاني اتكلم عن اخوك كذا
ريووف :-ههههههههه مازعلت ولاشي انتي بنت عمي ومجبوره اتحملك غير اني اعرف ماعندك سالفه
كنها ارتاحت شوي :-شكرا دايم تحرجيني بذوقك
ريووف :-هههههههههههههههههههه ولكمو
الا ويقاطعها صوت خالد زوج ريوف :-مسا الخير قلبي
قالت بحنيه :-هلا حبيبي ...
ولع وجه جود وصرخت باستهبال:-وجع ريوفوه يالي ماتستحين نعنبو ابليسك توني ما خشيت دنيا عيب هالكلام
ريووف وش الي مخلي جود غير الناس عندها .. غير روحها الحلوه الطاهره لا تعرف الحقد ولا النفاق ولا الاشياء الشينه ممكن تدعي انها ماتحب ماجد لسبب ما ريووف شاكه فيه ... معقول بعد كل الي صار بينهم فيه شعور باقي ما مات ؟؟
مافيه غير هالسبب لسبب بسيط ان جود ماتعرف تكره
طفله في جسد امراه ... ملامح كلاسيكيه وجه دائري عيون ناعسه بشره بيضا وشعر اسود مقصوص طبقات يوصل لنص الظهر .. الي يشوفها مايعطبها 23 سنه يعطيها 18 ،19 سنه ...لجمالها وبراءة مظهرها
قالت ريووف وهي تضحك :-اقطع يدي ان كنتي صاحيه يالله انا بسكر
جود بخبث :-ايه الحين احترق كرتي
ريووف وهي تضحك بصوت عالي :-جودوه
جود تستهبل :-يمه خلاص بسكر سيووووووووو
ريووف :-ههههههههههه سيو
سكرت جود التلفون وجلست تتقلب ساعه في الفراش .. عيا يجيها النوم سبحان الله قبل شوي كانت راح تنام وهي تكلم ريوف والحين طار النوم من عيونها هواجيس وافكار تضايقها تجي وتروح ...
ماجد ماجد ماجد
الناس ذولا ماعندهم غيره .. مالهم الا سيرته .. وش شايفين فيه بالله يوم متشققين عليه هالكثر .. بصراحه ماتشوف فيه زود عن اخوانها
اخ من اخوانها ...
والله انهم قاهرينها خصوصا بندر الي ماوافق على روحتهن البر الا بعد مشورة ماجد ضربت المخده بيدها بقوه من القهر ليش ياخذ رايه شي يقهر ...
ماتدري كم جلست على هالحاله الا وهي نايمه ...
*
*
*
*
>>> بيت ماجد
صحى ماجد من النوم قبل صلاة الفجر بنص ساعه عشان يصحي اهله يصلون وعلى طول يمشون .. توضى استعدادا للصلاه وجلس على سريره ينتظر الاذان .. عقد حواجبه ووقف وهو يحمد ربه انه ذكر هالشي فتح درجه وطلع منه سلاح الصيد ابتسم بسعه صدر وبال كان وراح يظل الصيد وطلعات البر من احب الاشياء على قلبه نظف سلاحه الا والاذان ياذن للصلاه .. طلع من غرفته وراح لغرفه اخوانه مشاري وفارس عشان يصحيهم للصلاه ...
دق الباب وقال مشاري بصوت كله نوم :-نعم
ماجد بصوته القوي :-قوموا للصلاه
قال مشاري بكسل :-طيب
ماجد بهدوء :-قم وصحي فارس معك
مشاري وهو مدلي يده من طرف السرير :-ان شاء الله
تركه ماجد وراح لغرفه امه الي كان نورها طالع دق الباب..
امه بحنيه وهي على سجادتها جالسه :-ادخل يا ماجد
دخل وهو مبتسم :-كيف عرفتيني
امه بابتسامه :-مافيه احد من اخوانك عنده دم وذوق الا انت انا ادري طالعين على من في دفاشتهم
ماجد :-ههههههههههههههههههههههههههههههههه غريبه هالدفاشه ما اشوفها لابغاني احد منهم
امه باعتزاز :-لانهم يهابونك
كشر :-والله ذي مشكله عمري ماسويت شي يخليهم يهابوني دايم عادي معهم
امه :-هذي هبه من الله مو كل شخص مهيوب ولا كل شخص يحط الله رهبته في قلوب الناس
هز راسه وهو يقول في نفسه /مهيوب مهيوب مهيوب .. لكني مو قريب من احد /
ماجد :-طيب يمه انا طالع المسجد
امه :-الله يحفظك خلاص بنمشي عقب الصلاه
ماجد وهو واقف يعدل شماغه :-ايه ان شاء الله نبي نطلع سيده لبيت عمي ابو متعب عشان نمشي سوى تعرفين مايدل الموقع الا بندر وبندر مو فيه
امه :-وينه ؟
ماجد :-سبقنا للمخيم ..
امه بحزن :-والله انه رجال طيب
ماجد بثقه :-عارف
امه بتردد :-لو البتول تقتنع فيه
ماجد وهو يناظر امه بعيون لابوه اكثر ماهي له :-يمه الكلام في هالموضوع انتهى من 12 سنه تقريبآ بندر بيسوي العرس بالعطله الجايه سواء رضت ولا مارضت انا استعجب (قالها بقهر) قبل كان الموضوع عادي عندها ومن سنتين مسودة لي حياتي بعنادها ودلعها الزايد
امه تحاول تلقى تبرير لسلوك بنتها لكن مالقت ... استاذن ماجد وطلع من الغرفه طفشان وزهقان ...
تذكر اخوانه ومن التعصيبه رجع لغرفتهم وصرخ بصوته :-مشاري فارس
فزوا من اسرتهم متروعين منه قال فارس لمشاري :- ياشينك ورى ماقومتني
مشاري بربشه :-انت الي ورى ماقومتني
فارس وهو يركض يدور ثوبه :-انا عندي دوام ومارجعت الا متاخر
مشاري وهو يلبس ثوبه :-لا انا الي جالس العب ماعندي دوام
فارس بمزاج مقفل :- ها ها ها خفيف دم
مشاري وهو يلقط شماغه :-امش لا يجي يميدنا بالعقال
فارس بدون نفس :-هههههههه اشك في عقلك
مشاري وهو يفتح باب الغرفه :-شعور متبادل
قال ماجد بدون نفس :-لمتى وانا الي اقومكم للصلاه
قال مشاري يستهبل :-مالنا غنا عنك
ابتسم ماجد غصب وقال :-هذا الي فالح فيه وين اخوك
فارس من راهم وهو يرجع اكمام ثوبه من بعد الوضوء :-وراكم
التفت ماجد ، قال فارس :-صبحه بالخير
ماجد "صبحه بمثله يالله بيقيم اخلصوا علينا "
سبقهم مشاري تحت عشان يتوضا .. وطلعوا كلهم سوا
×
بعد ما صلت ام ماجد راحت تصحي البتول لقتها صاحيه ومجهزه اغراضها
ام ماجد :-هههههههه وش صاير بالدنيا اول مره تقومين من بدري
البتول وهي ترفع شعرها ذيل حصان :-اول مره نطلع من يمكن وانا بالمتوسط ماتوقعت ماجد يوافق
قالت امها بلهجه لها معنى :-الفضل من بعد الله لبندر هو الي اقنعه ..
ارتبكت البتول وخرب شعرها وماردت بكلمه
ابتسمت امها وقالت :-عجلي اخوانك على وصول
البتول بوجه مولع :- طيب
ربطت شعرها أي كلام وهي بتموت من التعصيب خير ان شاء الله وش الي صار ولجم لسانها لا يكون بس مصدومه ان فيه احد على وجه الارض يقدر يثني ماجد عن شي ما هو مقتنع فيه .. لايكون بدت تفكر في ايجابياته اكثر من سلبياته الي ترفع لها ضغطها ...
رمت هالافكار عنها هي ماتبيه ماتبيه ولها الحق تختار شريك حياتها بنفسها
وش نقصها عن غيرها ...
رمت فرشه شعرها في شنطتها ... كان باب غرفتها مفتوح قال ماجد وهو مار من عندها" يالله البسي عبايتك مشينا "
ما امداها تلمحه حتى كان زعلان منها رغم انه عادي على طبيعته ماجد العاقل الساكت الي لا تكلم سكت كل من حوله وخلا كلام غيره قدام كلامه حكمته ونبرة صوته ضباب ماله ملامح ولا وزن ولا قيمه ...
ألا إنها تعرفه من نظرته القاسيه ألي كلها جرح من كلامها صحيح إنها اعتذرت وانه تقبل اعتذارها لكن إحساسها يقول انه زعلان عليها ..
مد بوزها من الضيق .. وراحت تسكر الشنط اقل شي تسويه ماتحرق دمه على هالصبح بتأخيرها المعتاد ..
×