دايم للأسف نواجه كلمه من أكثر الشيبان وهي ( اعيال هالوقت خايبين )
دون أخذهم مبدأ التعميم والتخصيص ........
وقد حدث لي هذا الموقف بشكل غير مباشر في أحد المجالس الكبيره بالرياض
عندما كنت جالس بجوار صاحب المجلس وكان المجلس مكتض بالناس حيث جاء رجل متوسط العمر
ولم يجد له مكان حتى امر صاحب المجلس له بمكان فجلس ( وعلمت من مكان جلوسه من هو بالمجتمع )
وكانت عيناه تنظر لي بغضب وأخذ يشتم ( اعيال هالوقت )ويلومهم حتى رد عليه صاحب المجلس
الذي فهم أن الرجل يقصدني بكلامه وقال له لا تشمل ولا تعمم فقد كان بين الناس بالسابق الطيب والرديء
ولازال بينهم الطيب والرديء إلا إن الرجل لم يقتنع برد صاحب المجلس عليه رغم سكوته ....
فقلت هذه القصيده بناءً على هذا الموقف والتي أتمنى أن تحوز على رضاكم وإستحسانكم .....
[poet font="Simplified Arabic,4,black,normal,normal" bkcolor="transparent" bkimage="backgrounds/18.gif" border="none,4,gray" type=0 line=200% align=center use=ex length=0 char="" num="0,black" filter=""]
سمعت لي علم ٍ على غير برهان= يقول جيل اليوم يا فلان خايب
من شايب ٍ ماهو على عز كبران= لا شاف كون ولاعلق بالركايب
قام ايتخبط في سواليف بهتان= يظلم اعيال ٍ مثل خير السحايب
وباتكلم دون جيلي علشان= يبين للشيبان ما كان غايب
لاشك أحشـّـم من لهم بالزمن شاااان= اللي لحاهم شيبت بالكرايب
ماهوب عود ٍ طيبه افلان وفلان= ضار ٍ على نقل الخزا والسبايب
يسرد وكنه حاضر ٍ وقت الأكوان= وقت المغازي والقشر والنهايب
وهو كذوب ٍينقل الكذب بأيمان= قاعة عرب به لعنة ٍ بالصلايب
اليوم يا عود الندم خير وآمان= ما عاد هو وقت القشر والحرايب
وطيب الفتى بهالوقت في خيرالاديان= ولا صار واصل للأهل والقرايب
وإن زانت أخلاقه ترى مسلكه زان= وإن زاد علمه نال جم الوهايب
وحفظ السلوم اللي بها خير وإحسان= هذي اسلاحه في زمان العجايب
وترك السلوم اللي بها الشر عنوان= خير ٍ يحس بنعمته كل تايب
والعيب ماهو بالحضاره والأزمان= التربيه هي عيب من صار عايب
تطلق ولدك ولاتشوفه بالأعيان= وعقب ٍ تخسره بالنهر والطلايب
وترى البيوت بلا قواعد وعمدان= تطيح لا هبت عليها الهبايب
وترى الحمايل قربها يرفع الشان= وياما تواصوا بالحسب والنسايب
أول وكل ٍ دون حقه بالأيمان= الحي حي والميـــِت ماله نصايب
واليوم خير وعز وأصحاب وإخوان= والحمد للي صاغنا من ترايب
تحمدوا رب المخاليق والجان= وخلوا سواليف القشر والنشايب
والمعذره عن كل زله ونقصان= لا شك هاضتني سواليــــــف شايب
[/poet]