بقضي حياتي بين لندن وباريس *** لين المنيه تاخذ الروح وتروح .
. يم الديار اللي تسر المتاعيس *** في جو(ن) يرد المسرات للروح .
. في جو يحييلي حروف(ن) مطاميس *** ينهل قصيدي فيه والبال مشروح .
. وسط الخضار ومع هبوب النسانيس *** تحت المزون وتحت براق(ن) يلوح .
. أبستقر هناك وانفق من الكيس *** ابشتري موتر وشقه لها سطوح .
. وابنزل الاسواق واختار واقيس *** من ماركات(ن) تجعل الشين مملوح .
. وأعرس على أم العيون النواعيس *** ذي غايتي ومناي والشف وطموح .
. يمكن ليا أبعدنا تروح الهواجيس *** ويعتدل حض(ن) من العام مطروح .
. إن غط طرفي في حلوم وكوابيس *** ولا فاد في حالي تساتير(ن) وبوح .
. صبري قضى ودموع عيني محابيس *** وصدري من همومي ترى بادي يفوح .
. بروح وحداني ولا ابغى مجاليس *** أبغى الخواجه صاحبي جد ومزوح .
. مليت من شوف الوجيه المعابيس *** ناس(ن) نماشيها على غير مصلوح .
. لابو الفقر ولعنة الله على ابليس *** خلاني أشيد من أحلامي صروح .
. ومادامني مفطر على فول وتميس *** ببطي وانا في ديرتي عنها ماروح .
صح لسان قائلها