[لينو]

الحمد لله على نعمة الصحه والعافيه ...
لا تزعلو على اي خسارة بتصير معكم ..
كل شي بهالدنيا بتعوض إلا الصحه اذا خسرتوها ما في شي ممكن يعوضها ...
اليوم صار معي موقف احزني كتير ..
بالصدفه كانت طاولتي بالمطعم بجانب طاوله كان قاعد عليها رجل عجوز مع وحده مو باين هل هي زوجته أو بنته .. بعتقد المرأه بالخمسينات والرجل تقريبا بالسبعينات هيدا اذا ما كان اكبر ...
مسكين هالعجوز بعاني من مرض الرعاش ..
أكيد الكل بيعرف هالمرض أو قارئين عنه ..
عن نفسي أنا قارئه عنه كتير بس ماصادفت شخص ع الحقيقه عنده هالمرض قبل اليوم ...
كان هيدا العجوز عم يحاول ياكل ساندويشه ( هوت دوج ) ويشرب عصير ..
هالوجبه البسيطه بتاخد من الشخص العادي بالكتير خمس دقايق ومعي أنا باكلها بدقيقتين اذا مش أقل ...
لكنها أخدت من هيدا العجوز دهر ..
المسكين ما كان عارف يمسك الساندويشه ..وما كان قادر يتحكم فيها ليحطها بتمه ..
كب ع تيابه .. و وسخ اديه .. وسخ تمه ..
كل هالشي ولسه ما اكل ولا لقمه ..
والمؤلم بالموضوع اللي كانت معه ما كانت معطيته أي اهتمام و كانت ملتهيه بالتلفون ..
هيدا الموقف بكاني .. بكاني بكا يمكن لعشر سنين ادام ..
شعرت بالوجع ..
قلبي وجعني ع العجوز بغض النظر عن تصرف المرأه اللي معه
لان تصرفها هيدا رح ييجي يوم ويرجع عليها ..
حسيت أن مشاعري كلها ضربت ببعض وما كنت افكر الا اني روح طعميه الساندويشه بايدي ..
ولا شعورياً قمت من طاولتي وقعدت ع الارض بجانب العجوز لحتي يكون مستوى نظرنا واحد لاني خفت يتعب اذا رفع راسه اذا حاكيته وأنا واقفه ..
وقلت له " رح كون سعيده إذا قبلت أني ساعدك " لكن العجوز ما كان امريكي ولا عربي للاسف كان اسباني من سكان الجزيره ( كوراساو ) فما فهم علي لما حاكيته بالامريكي وبعتقد أن حتى المرأه اللي معه ما فهمت علي .. هالشي استنتجته من ملامح وجها ..
لكن بكفي أنه منحني نظره حلوه ...
و بعد هيك طلعت من المطعم بدون حتى ما ارجع ع طاولتي لكمل شرب عصيري
وانا عم ردد الحمد لله ..



عم اكتب هالموقف علشان نستشعر بنعمة الصحة اللي وهبنا اياها ربنا
ونرضى بكل شي بصير معنا من خساره و من فقدان ..

رب أوزعني ان اشكر نعمتك التي أنعمت علي وعلى أحبتي
الحمدلله على نعمه التي لا تعد ولا تحصى ..