ماهمني ثوبي على المتن مرقوع
بس الاهم نور الحياء مابه ادماس
اشعل من احلامي حقايق من اشموع
واطفي من اوهامي لهب شمعة الياس
لابد مانضحك ولازم من ادموع
ولابد من ظلمه ولابد نبراس
هذي هي الدنيا محادير واطلوع
والشاطر اللي محزمه قوة الباس
سويت لي موضوع من غير موضوع
وانا الذي سم الصبر عندي بكاس
واللي ذهاب لرحلة مابها ارجوع
يبكيه منهو فاقد انفاسه انفاس
اقفى ولا ودع وانا دمعي اجموع
ليت الموادع كان في حضن الاحساس
مرحوم واسمك داخل الصدر مطبوع
مايمسحه ريحن ولاتدفن اطعاس
صحيح حبل الياس ماهو بمقطوع
وصحيح حبلك يالرجاء ضاربه فاس
بس الصبر دايم يهدي لي الروع
وايمان قلبي في ضميري له اجراس
والا الزمن لعبه والانسان مصنوع
سبحان منهو خالق الكون بقياس
واللي غلاها منه القلب مفجوع
انشهد ان الحب للقلب وسواس
تاخذ من اضلوعي وتبني لها ضلوع
وترمي برمحن يشبه لرمح جساس
وتاخذ من افرحي بلا كم او نوع
وتعطي من الا حزان انواع واجناس
ياخيط صبري ياامل يابرة الجوع
ارقع جروحي قبل ماتنظر الناس
غازي مطر