[تركي الوايلي]

[align=center]السلام عليكم ورحمة الله وبركاته

عندي مداخله ومداخلتي هذه ليست ضد او على الاخ ابو فهد ناوي الحربي

انا كلامي موجه لجميع اعضاء المجلس البلدي بحفر الباطن

الحين انتخابات وشوشره وعزايم وصجه ولجه
ورح وتعال واشغلونا واشغلو خلق الله بهذه الانتخابات

سؤالي منذو تأسيس المجلس البلدي بحفر الباطن

ماذا قدم هؤلاء الاعضاء لحفر الباطن ابي شيء
واحد يعتبر زين عملوه لحفر الباطن ولأهالي حفر الباطن
ماعمري سمعت ولا قرأت انه تم تنفيذ مشاريع بطلب من اعضاء المجلس البلدي

فقط يقترحون ويدرسون ولكن لايوجد اي تنفيذ لهذا الكلام

يعني مثل قولة كلام الليل يمحوهـ النهار واحلام في مهب الريح

بالله عليكم يا اخواني خلونا نكون صريحين وواقعيين

ماذا قدموا لحفر الباطن

حتى لوحات كبيره زينه لمداخل حفر الباطن مافي شيء
بينما السعيره وهي احد توابع حفر الباطن انواع الزينه والمظهر الرائع لمداخلها

من عشرين سنه وحتى يومنا هذا مافي اي تطور فقط الطرق
يتم ازالتها ومن معاودة زفلتتها من جديد وحطوا كم شجره على الطرق العامه

احنا مانبي هذا الشيء نبي تطور لمحافظتنا نبي اشياء جديده
حالنا حال بقية المحافظات والمناطق وترى المناطق الاخرى
ماهي احسن من محافظة حفر الباطن ووش ناقصنا احنا

نبي قول وفعل نبي مشاريع ترفيهيه لأطفالنا ونبي خدمات يرضى لها اهالي حفر الباطن ونبي تحسين الاوضاع العامه بحفر الباطن ونبي ونبي ولو نكتب وننفخ ونسلخ ونهايط من هنا الين بعد سنه ماراح نخلص من المطالب المهمه لمحافظة حفر الباطن ولأهالي الحفر وفوق ذلك انا اجزم ان هالكلام اللي اقوله هذا ماراح يجيب نتيجه معهم لكن اقول لعل وعسى يجيب نتيجه في يوم ما من الايام

لكن سالفة نقترح وندرس وبالاخير مافيه فعل هذا الشيء
غير مقبول بتاتا ويكفي تطبيل ومجاملات لانفع بها
واللي ماهو قد المسؤوليه لايشابط بنفسه مع الرجال نبي رجال اكفاء وقول وفعل

ماهو بس اكل مفطحات وتدسيم الشوارب واطلاق الضحكات وناسف البشت على الكتف
وكلن يقول الزين عندي ولا فيه اي مصلحه له بخدمة المحافظه واهاليها

ياليت ضبط النفس ومخافة الله فوق كل شيء
وان ينظرو الى خدمة بلدهم وخدمة اهالي حفر الباطن

واهالي حفر الباطن هم منكم وفيكم اذا لم يتم تنفيذ هذه الخدمات والمشاريع
فلن تتطور حفر الباطن حتى تقوم القيامه

وشكرا . [/align]