يالله يارب الضعوف المساكين
اللي لك المخلوق يحسن صلاته
تستر على غوشن صغارن مكفين
أكبرهم العارف دليله عصاته
لايا عيالي كلبوكم حبيبين
عندي وعند الناس كل وذاته
عندي غلاكم يدفن الزين والشين
وعند العرب كلن تشاف خملاته
ياعبيد انا خابرك ورعن لهالحين
داوي بغبت الجهل وظلماته
لاشك علمي لك محبه وتفطين
تسمع الوالد وثبت وصاته
وصاة مخلوقن يعرف القوانين
مافاة عمره بالجهل والهياته
ياعبيد انا اوصيك مني بثنين
ثنتين هن سوء البشر وحسناته
أوصيك لاتبحث سدود المغيبين
ولاتجهر اللي غارقن بغفلاته
ترى النميمة تمحق الرزق والدين
والمنزل العالي تهدم طبقاته
لاتحسب ان اهل الظليمة بخيتين
كلن يواف ماعمل في وفاته
وانذرك حق الضعيف المسكين
اللي على حقه يهل اعبراته
ترى الضعيف الليا غدى الليل ليلين
يدعي وعند الله توافق دعاته
الظلم فإن الظلم يفني السلاطين
ياويل راعي الظلم من مقبلاته
وانذرك عن ربعة رخو من هياسين
اللي سوالفهم بوده وهاته
وياعبيد الاقشر لوصفالك نهارين
نهار ثالث جاك يرفع عصاته
والله عندي ربعة الناس الاقصين
ولاصديق يبلشك في حياته
ترى الرجال بهم فهود وحياوين
جاك الكلام اللي صحيحا ثباته
ان كان ما تدري ترى الناس دارين
الرجل مدحه بالمجالس طراته
رجلن تعلق به جالن مسلمين
عز الرفيق وابته زالحماته
ورجلن تشوفع جسم وعيون ويدين
ولولا الشعر ماتفرقه من خواته
كم واحد بالبيت يضرب بسيفين
وان جتء حزم الكلاب قبع عباته
والحلم عن الغيض ينجي الشياطين
يكفيك شر إبليس هو ودحراته
الشاعر : مرشد البذال رحمه الله